ބޭނުންކުރެވޭ ރިޒާވް ހަ ޕަސެންޓް އިތުރުވެއްޖެ

މިދިޔަ ފެބްރުއަރީ މަހު ޑޮލަރުގެ ރިޒާވްގެ ތެރެއިން، ބޭނުން ކުރެވޭ ރިޒާވް ހަ ޕަސެންޓް އިތުރުވެފައިވާ ކަމަށް މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން ބުނެފި އެވެ.

މަރުކަޒީ ބޭންކުން ނެރުނު އިގްތިސާދީ ރިވިއުގައިވާ ގޮތުން ބޭނުންކުރެވޭ ރިޒާވްގެ އަދަދު ވަނީ 213.3 މިލިއަން ޑޮލަރަށް ފެބްރުއަރީ މަހު އިތުރުވެފަ އެވެ. މިއީ އަހަރުން އަހަރަށް ބަލާއިރު 16 ޕަސެންޓްގެ ކުރިއެރުމެކެވެ.

ބޭނުންކުރެވޭ ގޮތަށް ހުންނަ ރިޒާވަކީ ރާއްޖެއަށް ބޭނުންވާ ކާބޯތަކެއްޗާއި ބޭހާއި ތެލާއި އެނޫން ވެސް އަސާސީ ބޭނުންތަކަށް ބޭނުންވާ ތަކެތި އެތެރެކުރުމަށް ހުންނަ ޑޮލަރެވެ.

އެމްއެމްއޭގެ ރިވިއުގައިވާ ގޮތުން ފެބްރުއަރީ މަހު ރާއްޖޭގެ ރަސްމީ ރިޒާވްގައި ހުރީ 516.8 މިލިއަން ޑޮލަރެވެ. އޭގެ ކުރީ މަހު ރަސްމީ ރިޒާވްގެ ގޮތުގައި ހުރީ 476.1 މިލިއަން ޑޮލަރެވެ.

ފެބްރުއަރީ މަހު ރިޒާވް އިތުރުވިއިރު، މިދިޔަ ޑިސެމްބަރު މަހު ރިޒާވް ވަނީ ވަރަށް ބޮޑަށް ދަށަށް ގޮސްފަ އެވެ. އެއީ، އިންޑިއާގެ ޖީއެމްއާރަށް ފައިސާ ދައްކަން މަރުކަޒީ ބޭންކުން ބޮންޑް ގަތުމުންނެވެ. މޯލްޑިވްސް އެއާޕޯޓްސް ކޮމްޕެނީ ލިމިޓެޑް (އެމްއޭސީއެލް) އިން ވިއްކި 140 މިލިއަން ޑޮލަރު (2.2 ބިލިއަން ރުފިޔާ)ގެ ބޮންޑް އެމްއެމްއޭ އިން ގަތީ ތިން އަހަރުން އަނބުރާ ދައްކައި ހަލާސްކުރާ ގޮތަށް، 4.9 ޕަސެންޓުގެ އިންޓަރެސްޓް ރޭޓެއްގަ އެވެ.

އިގްތިސާދު ކުރުކޮށް

މި އަހަރު ރާއްޖޭގެ އިގްތިސާދު ކު4.7 ޕަސެންޓުގައި ކުރިއަރާނެ ކަމަށް މަރުކަޒީ ބޭންކުގެ ތަފާސްހިސާބުތަކުގައި ލަފާކޮށްފައިވެ އެވެ. މިއީ މިދިޔަ އަހަރާ އަޅާބަލާއިރު 0.8 ޕަސެންޓުގެ ކުރިއެރުމެކެވެ.

އިގްތިސާދީ ރިވިއުގައިވާ ގޮތުން ކަރަންޓް ޑެފިސިޓް (892.1 މިލިއަން ޑޮލަރު) އަށް ނުވަތަ އުފެއްދުންތެރިކަމުގެ ނިސްބަތުން 21 ޕަސެންޓަށް އިތުރުވާނެ އެވެ. މިދިޔަ އަހަރު އެ އަދަދު ހުރީ 666.7 މިލިއަން ޑޮލަރުގަ އެވެ.

މިދިޔަ ފެބްރުއަރީ މަސް ނިމުނުއިރު ސަރުކާރުގެ ކޭޝްފްލޯ ހަމަޖެއްސުމަށްޓަކައި 23.2 ބިލިއަން ރުފިޔާ ޓީ ބިލާއި ޓީ ބޮންޑް ވިއްކާފައިވެ އެވެ. އެއީ އޭގެ ކުރީ މަހާ އަޅާބަލާއިރު 83.8 މިލިއަން ރުފިޔާ އިތުރު އަދަދެކެވެ. އެ މުއްދަތުގައި ބޭންކުތަކުން ޓީ ބިލް ގަތް އަދަދު މަދުވި ނަމަވެސް އެހެނިހެން މާލީ އިދާރާތަކުން ވަނީ އެ މުއްދަތުގައި ޓީ ބިލް ގަތް އަދަދު އިތުރުވެފަ އެވެ. އަދި ސަރުކާރުން ސެކިއުރިޓީސްގައި އިންވެސްޓްކުރި އަދަދު ފެބްރުއަރީ މަހު ވަނީ 15 ޕަަސެންޓް އިތުރުވެފަ އެވެ. އެގޮތުން ޓީ ބިލް ވިއްކި އަދަދު 23 ޕަސެންޓް ވަނީ އިތުރުވެފަ އެވެ.