ހަ ކެފޭއަކުން 16 ބިދޭސީން ހިފަހައްޓައި ތިން ތަނަކަށް ނޯޓިސް ދީފި

ހުޅުމާލޭގެ ހަ ކެފޭ/ހޮޓާ ބަލައި ފާސްކޮށް އެ ތަންތަނުގައި ގަވައިދާ ހިލަށްފަށް މަސައްކަތް ކުރަމުންދިޔަ 16 ބިދޭސީއަކު އިމިގްރޭޝަންގެ ބެލުމުގެ ދަށަށް ގެންގޮސްފި އެވެ.

އިމިގްރޭޝަނުން މިއަދު އެކްސްގައި ކުރި ޕޯސްޓެއްގައި ބުނީ މިދިޔަ އަންގާރަ ދުވަހާއި ބުދަ ދުވަހު ފާސްކުރީ ހުޅުމާލެ 1 ގައި ހިންގަމުން ދިޔަ ބައެއް ތަންތަން ކަމަށެވެ.

އެ ތަންތަނުގައި ގަވާއިދާ ހިލާފަށް ތިބި 16 ބިދޭސީން އިމިގްރޭޝަން ބެލުމުގެ ދަށަށް ގެންދިޔައިރު ނަގަންޖެހޭ ހުއްދަތައް ނުނަގައި ހިންގަމުންދިޔަ ތިން ކެފޭއަކަށް ކަމާގުޅުންހުރި އިދާރާތަކުން ނޯޓިސް ދީފައިވާނެ ކަމަށް ވެސް އިމިގްރޭޝަނުން ބުންޏެވެ.

ރާއްޖޭގައި ގަވައިދާ ހިލާފަށް އުޅޭ ބިދޭސީންގެ މައްސަލަ ހައްލުކުރުމަށް ފަށާފައިވާ މަސައްކަތުގައި، ބިދޭސީން ދިރިއުޅޭ ތަންތަން ބަލައި ފާސްކުރުމުގެ ހާއްސަ އޮޕަރޭޝަނެއް މިދިޔަ ހަފްތާގެ ބުދަ ދުވަހު ވަނީ ފަށައިފަ އެވެ.

މި އޮޕަރޭޝަން ކުރިއަށްދާއިރު، މި މަހު މާލޭގައި ބޮޑު އަލިފާނުގެ ހާދިސާއެއް ހިނގި، ހެންވޭރުގައި ހުންނަ ގާމަގު ކެފޭގެ މަތީގައި 50 އަށް ވުރެ ގިނަ ބިދޭސީން ދިރިއުޅުނުކަން ވަނީ އެނގިފަ އެވެ.

ތިން ފްލޯއަށް ހުރި އެ ތަނުގެ މަތީ ދެ ފްލޯ ހަދާފައި ހުރީ ޑެގު އަޅައި، ވަށައިގެން ޓިނު ޖަހައިގެންނެވެ. އަލިފާނުގެ ހާދިސާގައި އެ އިމާރާތް ވަނީ އެއްކޮށް އަނދައި ހުލިވެފަ އެވެ.

ގަވައިދާ ހިލާފަށް އުޅޭ ބިދޭސީން ހޯދައި އެ މީހުން ރާއްޖޭން ފޮނުވާލަން ކުރިއަށް ގެންދާ އޮޕަރޭޝަނުގައި މިހާތަނަށް 3،000 އަށް ވުރެ ގިނަ ބިދޭސީން ޑީޕޯޓްކޮށްފައިވެ އެވެ. މިހާރު ވެސް އެ އޮޕަރޭޝަން ކުރިއަށް ގެންދާއިރު ބައެއް ބިދޭސީން ވަނީ އޮޕަރޭޝަނަށް ފިލަން ބައެއް ރަށްރަށަށް ވެސް ގޮސްފަ އެވެ.

އަދި ބިދޭސީން ހޯދައި ޑީޕޯޓްކުރަން ފެށުމުން، ބިދޭސީ ފިރިހެނުން ދިވެހި އަންހެނުންނާ ކައިވެނި ކުރަން ފެމިލީ ކޯޓަށް ހުށަހަޅާ ވަރު ކުއްލިއަކަށް އިތުރުވެފައިވާ ކަމަށް ވެސް ކޯޓުން ވަނީ ބުނެފަ އެވެ. ދިވެއްސަކާ ކައިވެނިކުރުމުން ރާއްޖޭގައި ހުރުމަށް ދިގު މުއްދަތުގެ ވިސާ ލިބޭނެ އެވެ.