އިމިގްރޭޝަނުން 800 އަށްވުރެ ގިނަ ބިދޭސީން ހިފަހައްޓައިފި

މިދިޔަ އަހަރުގެ ނޮވެމްބަރު މަހުން ފެށިގެން 3،500 އަށްވުރެ ގިނަ ބިދޭސީން ބަލައި ފާސްކޮށް، ގަވާއިދާ ހިލާފަށް އުޅުނު 800 އަށްވުރެ ގިނަ މީހުން އިމިގްރޭޝަންގެ ބެލުމުގެ ދަށަށް ގެންގޮސްފި އެވެ.

ގަވާއިދާ ހިލާފަށް އުޅޭ ބިދޭސީންގެ މައްސަލަ ހައްލުކުރުމަށް ފަށާފައިވާ މަސައްކަތުގައި، ބިދޭސީން ދިރިއުޅޭ ތަންތަން ފާސް ކުރުމާއި ގަވާއިދާ ހިލާފަށް އުޅޭ ބިދޭސީން ހޯދުމުގެ ހާއްސަ އޮޕަރޭޝަނެއް އިމިގްރޭޝަނުން ހިންގާތާ މިހާރު ދުވަސްތަކެއް ވެއްޖެ އެވެ.

އިމިގްރޭޝަންގެ އޮފިޝަލަކު "މިހާރު" އަށް ވިދާޅުވީ މިދިޔަ އަހަރު ނޮވެމްބަރު މަހުން ފެށިގެން މި މަހުގެ ފަސް ވަނަ ދުވަހުގެ ނިޔަލަށް އެކި އޮޕަރޭޝަންތަކުގައި މިހާތަނަށް 3،549 ބިދޭސީން ފާސްކޮށްފައިވާ ކަމަށެވެ.

އޭގެ ތެރެއިން 867 ބިދޭސީން އިމިގްރޭޝަންގެ ބެލުމުގެ ދަށަށް ގެންގޮސްފައިވާ ކަމަށް ވެސް އޭނާ ވިދާޅުވި އެވެ.

ރާއްޖޭގައި ގަވާއިދާ ހިލާފަށް އުޅޭ ބިދޭސީން ހޯދުމުގެ އޮޕަރޭޝަންތައް ވަނީ ވަރަށް ބޮޑަށް ފުޅާކޮށްފަ އެވެ. މިދިޔަ އަހަރުގެ ނޮވެމްބަރު 17 އިން ފެށިގެން މިހާތަނަށް 4،000 އަށް ވުރެ ގިނަ ބިދޭސީން ވަނީ ޑީޕޯޓް ކޮށްފަ އެވެ.

އޭގެ ތެރޭގައި މަސާޖް ޕާލާތަކުގައި މަސައްކަތްކުރާ ބިދޭސީންނާއި ކާބޯތަކެތި ހަދައިގެން ވިއްކާ މީހުންނާއި އެކި ކަހަލަ މަސައްކަތްތަކުގައި ގަވައިދާ ހިލާފަށް އުޅޭ ބިދޭސީން ހިމެނެ އެވެ.

މިހާރު ވެސް އެ އޮޕަރޭޝަން ކުރިއަށް ގެންދާއިރު، ބައެއް ބިދޭސީން ފިލަން ރަށްރަށަށް ވެސް ދިޔަ އެވެ. އަދި ބިދޭސީން ހޯދައި ޑީޕޯޓްކުރަން ފެށުމުން، ބިދޭސީ ފިރިހެނުން ދިވެހި އަންހެނުންނާ ކައިވެނި ކުރަން ފެމިލީ ކޯޓަށް ހުށަހަޅާ މިންވަރު ކުއްލިއަކަށް އިތުރުވެފައިވާ ކަމަށް ވެސް ކޯޓުން ވަނީ ބުނެފަ އެވެ. ދިވެއްސަކާ ކައިވެނިކުރުމުން ރާއްޖޭގައި ހުރުމަށް ވިސާ ލިބެ އެވެ.