ނަތަންޔާހޫ ވާހަކަ ދައްކަން ފެށުމުން ރާއްޖެ ހިމެނޭ ގޮތަށް ގިނަ ގައުމުތަކުން ޖަލްސާ ދޫކޮށް ނުކުމެއްޖެ

އދ. ގެ އާންމު މަޖިލިހުގެ 79 ވަނަ ސެޝަންގައި އިޒްރޭލުގެ ބޮޑުވަޒީރު ބެންޖަމިން ނަތަންޔާހޫ ތަގްރީރު ކުރަން ފެށުމާއެކު، ރާއްޖެ ހިމެނޭ ގޮތަށް ގިނަ ގައުމުތަކުގެ މަންދޫބުން އެ ޖަލްސާ ދޫކުރައްވާފައި މިއަދު ނުކުމެވަޑައިގެންފި އެވެ.

ރައީސް އޮފީހުގެ ތަރްޖަމާނު ހީނާ ވަލީދު އެކްސްގައި ކުރެއްވި ޕޯސްޓެއްގައި ވިދާޅުވީ "އިޒްރޭލުގެ އަނިޔާވެރި ބޮޑުވަޒީރު" އދ. ގެ އާންމު މަޖިލީހުގައި ތަގުރީރު ކުރަން ފެށުމުން އެ ތަނުން ރާއްޖޭގެ ވަފުދު ނުކުތީ ރައީސް ޑރ. މުހައްމަދު މުއިއްޒު ފަލަސްތީނާ މެދު ގެންގުޅުއްވާ ހާއްސަ ކަމާއި އެ ގައުމުގެ ހައްގުގައި އެ މަނިކުފާނު ކުރައްވަމުން ގެންދަވާ މަސައްކަތްޕުޅަށް އިހުތިރާމް ކުރުމުގެ ގޮތުން ކަމަށެވެ.

އާންމުވެފައިވާ ވީޑިއޯތަކުން ފެންނަ ގޮތުގައި ނަތަންޔާހޫ ވާހަކަ ދައްކަން ފެށުމާ އެކު، އދ. ގެ ގިނަ މެމްބަރު ގައުމުތަކުން ވަނީ އާންމު މަޖިލިހުގެ ޖަލްސާ ދޫކޮށް، އެތަނުން ނުކުމެފަ އެވެ. އެއީ އިޒްރޭލުން ފަލަސްތީނުގެ ރައްޔިތުންނާ ދެކޮޅަށް ހިންގާ ލާއިންސާނީ އަމަލުތަކާ ގުޅިގެން ނުރުހުން ފާޅުކުރުމުގެ ގޮތުންނެވެ.

އދ. ގެ އާންމު މަޖިލިހުގެ މި އަހަރުގެ ބައްދަލުވުމަށް މިހާރު އެމެރިކާގެ ނިއުޔޯކަށް ކުރައްވަމުން ގެންދަވާ ދަތުރުފުޅުގައި ރައީސް މުއިއްޒު ވަނީ ފަލަސްތީނުގެ ރައީސް މަހުމޫދު އައްބާސްއާ ވެސް ބައްދަލުކުރައްވައިފަ އެވެ. ފަލަސްތީނަކީ މިނިވަން ދައުލަތެއްގެ ގޮތުގައި ބަލައިގަތުމަށް ބައިނަލްއަގްވާމީ ގޮތުން ކުރެވޭނެ މަސައްކަތްތަކުގައި ސާބިތުކަމާ އެކު ރާއްޖެ އޮންނާނެ ކަމުގެ ޔަގީންކަން ރައީސް މުއިއްޒު ވަނީ ފަލަސްތީނުގެ ރައީސަށް އަރުވައިފަ އެވެ.

އާންމު މަޖިލީހުގެ ބައްދަލުވުމުގައި ވާހަކަފުޅު ދައްކަވަމުން ވެސް ރައީސް މުއިއްޒު ވަނީ ފަލަސްތީނުގެ ބިންތަކަށް ވެރިވެގަންނަން އިޒްރޭލުން ހިންގަމުންދަނީ ގަތުލުއާމެއް ކަމަށާއި އެކަން ދުނިޔޭގެ ގައުމުތަކުން ހުއްޓުވަން ޖެހޭ ކަމަށް ވިދާޅުވެފަ އެވެ.

ރައީސް ވިދާޅުވީ އެއްވެސް ގައުމަކުން ހައްގެއް ނިގުޅައިގަތުމަކީ ގަބޫލުކުރެވޭނެ ކަމެއް ނޫން ކަމަށާއި އަސާސީ ހައްގުތައް ރައްކާތެރުކުރަން އެންމެ މުހިއްމު ކަމަކީ އެ ހައްގުތަކަށް އިހުތިރާމުކުރާ ސަގާފަތެއް އާލާކުރުން ކަމަށެވެ. އެކަމަކު އިޒްރޭލުގެ އަމަލުތައް ހުރީ އެގޮތަށް ނޫން ކަމަށް ވިދާޅުވެ ރައީސް މުއިއްޒު ވަނީ ދުނިޔޭގެ ގައުމުތަކަށް ވެސް އެކަމުގައި އެކަށީގެންވާ ފިޔަވަޅެއް އެޅިފައި ނެތުމުން ކަންބޮޑުވުން ފާޅުކުރައްވައިފަ އެވެ.

ރައީސް ވިދާޅުވި ގޮތުގައި އިޒްރޭލުން ހިންގަމުންދަނީ ބޮޑު އަނިޔާވެރިކަމެކެވެ. އަދި އެއީ ނަސްލު ނައްތާލުމުގެ އަމަލެއް ކަމަށާއި ބައިނަލްއަގްވާމީ ނިޒާމާއި އިންސާފަށް އިޒްރޭލުން ގޮންޖެހާފައިވާ ކަމަށް ވެސް ރައީސް ވިދާޅުވި އެވެ.

އދ. ގެ އާންމު މަޖިލީހުގެ ބޮޑު އަޣުލަބިއްޔަތަކުން މިދިޔަ މެއި މަހު ވަނީ އދ. ގެ ފުރިހަމަ މެމްބަރެއްގެ ގޮތުގައި ފަލަސްތީނު ބަލައިގަންނަން ވޯޓު ދީފަ އެެވެ. ނަމަވެސް އިޒްރޭލުގެ އެކުވެރި އެމެރިކާއިން ވަނީ ވީޓޯގެ ބާރުގެ ބޭނުންކޮށް އެ ނިންމުން ފެއިލްކޮށްލައިފަ އެވެ.

އެގޮތަށް ކަންތައްވެފައި ވަނިކޮށްމ މި މަހުގެ ތެރޭގައި އާންމު މަޖިލީހުން ފާސްކުރި ގަރާރަކުން ނިންމާފައި ވަނީ އާންމު މަޖިލީހުން ފަލަސްތީނަށް ގޮނޑިއެއް ދޭށެވެ. އެކަމަކު މި ގޮނޑި ލިބުނު ކަމުގައި ވިިޔަސް އާންމު މަޖިލީހުގެ ނިންމުންތަކުގައި ވޯޓު ދިނުމާއި ސަލާމަތީ މަޖިލީހުގެ މެންބަރަކަށް ވުމުގެ ހައްގެއް ނުލިބެ އެވެ.

މި މަހުގެ 18 ގައި ވެސް އދ. ގެ އާންމު މަޖިލީހުން ވަނީ ފަލަސްތީނުގެ ބިންތަކުގެ އިޒްރޭލު އެއް އަހަރު ތެރޭ ފައިބަން ގޮވާލާ ގަރާރެއް ފާސްކޮށްފަ އެވެ.