މާލޭގައި ކޮންމެ ފަސް މިނިޓަކުން ފުލުހަކާ ދިމާވާ ގޮތަށް އޮޕަރޭޝަން ބަދަލު ކުރަނީ

މާލޭގެ މަގުތަކުގެ ރައްކާތެރިކަން ކަށަވަރު ކުރުމަށްޓަކައި ކޮންމެ ފަސް މިނިޓަކުން ފުލުހަކާ ދިމާވާ ގޮތަށް ފުލުހުންގެ އޮޕަރޭޝަނަށް ބޮޑެތި ބަދަލުތަކެއް ގެނައުމުގެ މަސައްކަތް ފަށައިފި އެވެ.

މާލެ ޓްރެފިކް ބެލެހެއްޓުމުގެ މަސައްކަތަށް ގެންނަ ބަދަލާ ގުޅޭ ގޮތުން "މިހާރު" އަށް ދެއްވި އިންޓަވިއުއެއްގައި ޕޮލިސް ކޮމިޝަނަރު އަލީ ޝުޖާއު އިއްޔެ ވިދާޅުވީ، މާލެ އާއި ހުޅުމާލޭގައި މި ފަހުން ހިނގި ނުރައްކާތެރި އެކްސިޑެންޓުތަކާ ގުޅިގެން މަގުތަކުގެ ރައްކާތެރިކަން ކަށަވަރު ކުރުމަށް ބޮޑެތި ފިޔަވަޅުތަކެއް އަޅަން ޖެހިފައިވާ ކަމަށެވެ.

އެހެންވެ، ފުލުހުން މީގެ ކުރިން މަގުތަކުގައި ހަރަކާތްތެރިވަމުން އައި ގޮތަށް ބޮޑެތި ބަދަލުތަކެއް ގެނެސްފައިވާ ކަމަށް ޝުޖާއު ވިދާޅުވި އެވެ. އެ ފިޔަވަޅުތައް އެންމެ ފުރިހަމަ އަށް ތަންފީޒު ވާން ފެށުމުން މާލޭގެ މަގުތަކުގައި ކޮންމެ ފަސް މިނިޓަކުން ފުލުހަކާ ދިމާވާނެ ކަމަށް ސީޕީ ވިދާޅުވި އެވެ.

"އަޅުގަނޑުމެން މި ފައްޓަނީ މާލެ އިން. ރައްޔިތަކު ނުކުމެގެން މާލޭގެ އެއްވެސް ތަނަކަށް ދާއިރު އެންމެ ގިނަވެގެން ފަސް މިނިޓުން ފުލުހަކު ފެންނަން ޖެހޭނެ. އެކަން ހާސިލް ކުރުމަށް މިހާރު މަސައްކަތް މި ކުރަނީ،" ސީޕީ ވިދާޅުވި އެވެ.

އެ މަގްސަދު ހާސިލް ކުރުމަށްޓަކައި ތަމްރީންތަކުގައި މިހާރު ތިބި ފުލުހުންގެ ބެޗު ނިމުމުން މަގުތަކަށް ނެރޭނެ ކަމަށާއި ދުވާލުގެ ގިނަ ވަގުތުގައި ބޮޑު ބައެއް ފުލުހުން ބަލަމުން ދާނެ ކަމަށް ޝުޖާއު ވިދާޅުވި އެވެ.

ސީޕީ ވިދާޅުވިގޮތުގައި، މިހާރަށް ބަލާ ނަމަ މާލޭގެ މަގުތަކުގައި ބާރުބޮޑުވާ ގަޑިތަކުގައި 21 ސަރަހައްދެއްގައި ފުލުހުން ހަރަކާތްތެރިވާނެ އެވެ.

މީގެ ކުރިން މި ގޮތަށް ގިނަ އަދަދެއްގެ ފުލުހުން ނެރެގެން ހަރަކާތްތެރިވަނީ ހާއްސަ އޮޕަރޭޝަންތަކުގައި އެކަންޏެވެ. ނަމަވެސް ޝުޖާއު ވިދާޅުވީ، މިހާރު މިއީ ވަކި ދުވަސްވަރަކަށް ކުރިޔަށް ގެންދާނެ ކަމެއް ނޫން ކަމަށާއި ކުރިމަގުގައި ފުލުހުން އޮޕަރޭޓް ކުރާނެ މޮޑެލް އެ ގޮތަށް ބަދަލު ކޮށްފައިވާ ކަމަށެވެ.

"ރައްޔިތުން އެންމެ ބޭނުން ވާނެ ހެން ހީވާ ތަންތަނުގައި ފުލުހުން ދެން ބަރާބަރަށް މޮނިޓާކޮށް، ހަރަކާތްތެރިވަމުން ދާނެ،" ޝުޖާއު ވިދާޅުވި އެވެ.

މަގުތަކުގައި ފުލުހުން ހަރަކާތްތެރިވަމުގެ އިތުރުން ސެންޓްރަލް ކޮމާންޑެއް ގާއިމްކޮށް މާލެ އާއި ހުޅުމާލޭގެ ހުރިހާ ހަރަކާތެއް ލައިވްކޮށް މޮނިޓާ ކުރެވޭނެ ނިޒާމެއް ވެސް ވަނީ ގާއިމުކޮށްފަ އެވެ.

މާލޭގައި ފުލުހުން ހަރަކާތްތެރިވަމުން އަންނަ ހުރިހާ ސަރަހައްދަކާއި މީހުން ހުއްޓުވައި ސުވާލު ކުރަމުން އަންނަ ވަރާއި ބާރު ބޮޑުވާ ސަރަހައްދުތައް ލައިވްކޮށް އެ ކޮމާންޑުން މޮނިޓާ ކުރެ އެވެ.

މާލޭގައި ކުށް ކުރާ ގޭންގުތައް ހަރަކާތްތެރިވަމުންދާ ސަރަހައްދުތަކުގައި ވެސް އެކަމަށް ހާއްސަ ފުލުހުން އަބަދުވެސް ހަރަކާތްތެރިވަމުން އަންނާނެ ކަމަށް ޕޮލިސް ކޮމިޝަނަރު ވިދާޅުވި އެވެ.