ރާއްޖެއަކީ ދުނިޔޭގެ ކުރިމަތީގައި ބަސްބުނަން ކެރޭ ގައުމެއްކަން ރައީސް ސާބިތުކޮށްދެއްވައިފި: ގާސިމް

ކުޑަ ގައުމަކަށް ވިޔަސް، ރާއްޖެއަކީ ދުނިޔޭގެ ކުރިމަތީގައި ބަސްބުނަން ކެރޭ ގައުމެއްކަން ރައީސް ޑރ. މުހައްމަދު މުއިއްޒު ސާބިތުކޮށްދެއްވައިފި ކަމަށް މާމިގިލި ދާއިރާގެ މެމްބަރު ގާސިމް އިބްރާހިމް މިއަދު ވިދާޅުވެއްޖެ އެވެ.

ޖުމްހޫރީ ޕާޓީގެ ލީޑަރުކަން ވެސް ކުރައްވާ ގާސިމް އެކްސްގައި ކުރެއްވި ދިގު ޕޯސްޓެއްގައި ވަނީ އދ. ގެ އާންމު މަޖިލީހުގައި ރައީސް މުއިއްޒު ދެއްވި ތަގުރީރަށް ތައުރީފު ކުރައްވައިފަ އެވެ. އދ. ގައި ރާއްޖޭގެ އަޑު އިއްވުމަށް ރައީސް ކުރެއްވި މަސައްކަތްޕުޅު ފާހަގަކުރައްވައި ގާސިމް ޝުކުރު އަދާކުރެއްވި އެވެ.

އދ. ގެ އާންމު މަޖިލީހުގެ 79 ވަނަ ބައްދަލުވުމުގައި ބައިވެރިވެވަޑައިގަތުމަށް އެމެރިކާގެ ނިއު ޔޯކަށް ކުރެއްވި ހަފުތާއެއްގެ ދަތުރުފުޅު ނިންމާލެއްވުމަށް ފަހު ރައީސް މުއިއްޒު ވަނީ މިއަދު ހެނދުނު އެނބުރި މާލެ ވަޑައިގެންފަ އެވެ.

ގާސިމް ވަނީ އޭނާ އާއި ޖުމްހޫރީ ޕާޓީގެ މެމްބަރުންގެ ފަރާތުން ރައީސަށް މަރުހަބާ ދަންނަވައިފަ އެވެ.

ގާސިމް ވިދާޅުވީ ރާއްޖެއަކީ ކިތަންމެ ކުޑަ ގައުމަކަށް ވިޔަސް، މީގެ ކުރިން ވެސް ރާއްޖޭގެ ބައެއް ވެރިން އދ. އާންމު މަޖިލީހުގެ ބައްދަލުވުންތަކުގައި ބައިވެރިވެވަޑައިގެން ރާއްޖެ ތަމްސީލުކުރައްވައި، މި ގައުމާއި ދުނިޔެ އަށް ކުރިމަތިވެފައިވާ އެކިއެކި ގޮންޖެހުންތަކާ ގުޅޭ ގޮތުން މުނާސަބު ގޮތެއްގައި އަޑުއުފުއްލަވާފައިވާ ކަމަށެވެ.

"ނަމަވެސް ޝައްކެއްނެތް ގޮތުގައި، މީގެ 59 އަހަރު ކުރީން ދިވެހީންގެ ފަހުރުވެރި މިނިވަން ދިދަ އދ. ގެ އިދާރާގައި ވިހުރެން ފެށި ފަހުން، މި ގައުމުގެ ވެރިޔަކު އދ. ގައި ދިވެހި ގައުމު ތަމްސީލްކުރުމުގައި އަދުގެ ރައީސުލްޖުމްހޫރިއްޔާ ޑރ. މުހައްމަދު މުއިއްޒު ދިވެހި ގައުމު ތަމްސީލު ކޮށްދެއްވީ، ނުހަނު ވިސްނުންތެރިކަމާއި އެކު ވަރަށް ފުރިހަމަ އަދި އެހާމެ މުނާސަބުކޮށް ކަމަށް އަޅުގަނޑު ދެކެމެވެ،" ގާސިމް ވިދާޅުވި އެވެ.

"މި ލޮބުވެތި ގައުމަކީ ފަހުރުވެރި، ކެރޭ، ހަރުދަނާ، ދުރުވިސްނޭ، އިލްމާއި ހުނަރު ލިބިފައިވާ، ތަރައްގީއަށް އުންމީދު ކުރާ ތަސައްވަރެއް އޮތް، އަދި މުޅި ދުނިޔޭގެ ކުރިމަތީގައި ބަސްބުނަން ކެރޭ ގައުމެއްކަން، ރައީސް ޑރ. މުއިއްޒު އެ ވަނީ ވަރަށް ސާބިތުކަމާ އެކު ދައްކުވައިދެއްވައިފަ އެވެ."

އދ. ގެ އާންމު މަޖިލީހުގައި ރައީސް ދެއްވި ތަގުރީރަށް ދުނިޔޭގެ ސަމާލުކަން ލިބުނު ކަމަށް ވެސް ގާސިމް ވިދާޅުވި އެވެ.

ކުރީގެ ރައީސް އަބްދުﷲ ޔާމީނަށް އިޝާރާތްކުރައްވައި ގާސިމް ވިދާޅުވި ގޮތުގައި، މިހާރުގެ ސަރުކާރާ އިދިކޮޅު ބޭފުޅުން އަދި ހާއްސަކޮށް ވެރިކަމުގެ ފަސް އަހަރުގެ ދައުރެއް ލިބިވަޑައިގަތް ނަމަވެސް، އދ. ގައި ރާއްޖެ ތަމްސީލްކުރައްވަން ކެރިވަޑައިނުގެންނެވި ބޭފުޅަކަށް ރައީސް މުއިއްޒުގެ ތަގުރީރު އޮޅުންފިލާވަޑައިނުގަތަސް، ދުނިޔޭގެ ބޮޑެތި މީޑިއާތަކުގެ ފަލަ ސުރުހީތަކުން ޖާގަ ހޯއްދެވި އެވެ.

ޔާމީންގެ ފަސް އަހަރުގެ ވެރިކަމުގައި އެ މަނިކުފާނު އދ. އަށް އެންމެ ފަހަރަކު ވެސް ވަޑައިނުގަންނަވަ އެވެ. ބަދަލުގައި ފޮނުއްވެވީ ހާއްސަ މަންދޫބުންނެވެ.

ޔާމީންގެ ޕާޓީ ޕީއެންއެފުން ސިލްސިލާކޮށް ބާއްވަމުން އަންނަ ޖަގަހަ ޖަލްސާތަކުގެ ތެރެއިން މިދިޔަ ހަފުތާގައި ބޭއްވި ޖަލްސާއެއްގައި ޔާމީން ވިދާޅުވެފައި ވަނީ އެ މަނިކުފާނު އދ. އަށް ވަޑައިގުނެންނެވީ "ކަންނެތް ކަމުން ކަމަށް" މި ސަރުކާރުގެ ބައެއް ބޭފުޅުން ވިދާޅުވަމުން ގެންދެވިޔަސް އެއީ ދޮގެއް ކަމަށެވެ.

އދ. ގައި ތަގުރީރު ކުރައްވަން ފުރަތަމަ ފަހަރަށް ފުރުސަތު ލިބިވަޑައިގަތް ދުވަސްވަރަކީ ހައްޖުގެ އަޅުކަން އޮތް ދުވަސްވަރު ކަމަށާއި އެހެންވެ، އޭރު އިސްކުރެއްވީ ހައްޖުގެ އަޅުކަން ކަމަށް ޔާމީން ވިދާޅުވި އެވެ.

ޔާމީން ވިދާޅުވި ގޮތުގައި، ހައްޖުގެ އަޅުކަމަށް ފަހު އެނބުރި ރާއްޖެ ވަޑައިގެންނެވި ތަނުން އެ މަނިކުފާނު ދަތުރުފުޅު ކުރެއްވި ރައީސުލްޖުމްހޫރިއްޔާގެ ރަސްމީ ލޯންޗުކޮޅުގައި އެއްޗެއް ގޮއްވާލި އެވެ. އޭގެ ފަހުން ސަރުކާރާ ދެކޮޅަށް ބަޣާވާތްތައް ރޭވުމުން ޖެހިވަޑައިގަތީ ގައުމު ހަމަ މަގަށް އަޅުވަން މާލޭގައި މަޑުކުރައްވާށެވެ. އދ. އަށް ވަޑައިގަތުމަށް ވުރެ އޭރު މުހިންމުވީ ގައުމު ހަމަ މަގަށް އެޅުވުން ކަމަށް ޔާމީން ވިދާޅުވި އެވެ.

ފަލަސްތީނުގެ ހައްގުގައި ދެއްކެވި ވާހަކަފުޅަށް ތައުރީފު

ރައީސް މުއިއްޒު އާންމު މަޖިލީހުގެ ބައްދަލުވުމުގައި ފަލަސްތީނުގެ ހައްގުގައި ދެއްކެވި ވާހަކަފުޅަށް އިސްލާމީ ދުނިޔެ އާއި ދުނިޔޭގެ އެހެން ގައުމުތަކުން ވެސް ތައުރީފާއި ތަރުހީބު ލިބުނު ކަމަށް ގާސިމް ވިދާޅުވި އެވެ.

އެ ބައްދަލުވުމުގެ ހަވާސާގައި ކުރިއަށް ގެންދިޔަ މުހިންމު ބައްދަލުވުންތަކުގައި ވެސް ރާއްޖޭގެ ކުރިމަގަށްޓަކައި ރައީސް ވަރަށް މުހިންމު ވާހަކަތައް ދެއްކެވި ކަމަށް ގާސިމް ވިދާޅުވި އެވެ.

"ވަކީން ހާއްސަ ގޮތެއްގައި ދިވެހި ގައުމުގެ ވިންދާއި ގުޅިފައިވާ ފަލަސްތީނުގެ މައްސަލައިގައި ސިހްޔޫނީ ދައުލަތުން ހިންގަމުން ގެންދާ ޖަރީމާތައް ކުށްވެރިކުރައްވާ ދެއްކެވި ވާހަކަފުޅު މުޅި އިސްލާމީ ދުނިޔެ އާއި އަދި ދުނިޔޭގެ ގިނަ ގައުމުތަކުން ބަލައިގެންފައި ވަނީ ނުހަނު މަތީ ތަރުހީބަކާއި އެކުގައި ކަން ފާހަގަކުރަމެވެ،" ގާސިމް ވިދާޅުވި އެވެ.

ގާސިމް ވިދާޅުވީ 2040 ވަނަ އަހަރު ރާއްޖޭގެ މިނިވަން ކަމަށް 75 އަހަރު ފުރޭއިރު، އެ ދުވަސް އަންނަން ވާ އިރު ރާއްޖެއަކީ، ފުރިހަމައަށް ތަރައްގީވެފައިވާ ގައުމެއްގެ ގޮތުގައި އޮތުމަށް މާދަމާއަށްޓަކާ ރައީސް މުއިއްޒު ކުރައްވާ ތަސައްވަރުތައް މުޅި ދުނިޔޭގެ ކުރިމަތީގައި ހާމަކޮށްދެއްވި ކަމަށެވެ.

"މި ދިވެހި ފަސްގަނޑާއި ރައްޔިތުންނާއި މެދު ތިޔަ ދައްކުވައިދިން ފަހުރުވެރި ނަމޫނާއަށްޓަކައި، މަނިކުފާނަށް އަދިވެސް އެއްފަހަރު ހިތުގެ އިހުލާސްތެރި ތަހުނިޔާ އާއި ޝުކުރު އަދާކުރަމެވެ،" ގާސިމް ވިދާޅުވި އެވެ.