ރައީސްގެ އެމެރިކާ ދަތުރުފުޅަށް ހަރަދުވީ 2.5 މިލިއަން ރުފިޔާ

އދ. ގެ އާންމު މަޖިލީހުގެ 79 ވަނަ ބައްދަލުވުމުގައި ބައިވެރިވެވަޑައިގަތުމަށް ރައީސް ޑރ. މުހައްމަދު މުއިއްޒު މިދިޔަ މަހު އެމެރިކާއަށް ކުރެއްވި ދަތުރުފުޅަށް ހަރަދުވީ 2.5 މިލިއަން ރުފިޔާ ކަމަށް ރައީސް އޮފީހުން މިއަދު ބުނެފި އެވެ.

ރައީސްގެ ރަސްމީ ދަތުރުފުޅުތަކަށް ހިނގާ ހަރަދު ރައީސް އޮފީހުން މިހާރު ގަވާއިދުން އާންމުކުރެ އެވެ. އެމެރިކާ ދަތުރުފުޅަށް ހިނގި ހަރަދުގެ ތަފުސީލު ވެސް އެ އޮފީހުން މިއަދު ވަނީ އާންމުކޮށްފަ އެވެ.

ރައީސް އޮފީހުން ބުނީ ރައީސް ނުވަ ދުވަހަށް އެމެރިކާއަށް ކުރެއްވި ދަތުރުފުޅަށް ދިވެހި ދައުލަތުން ހޭދަކޮށްފައި ވަނީ 2،455،583.01ރ. ކަމަށެވެ.

ރައީސް އޮފީހުން ބުނި ގޮތުގައި މިއީ ކުރީގެ ރައީސް އިބްރާހިމް މުހައްމަދު ސޯލިހުގެ ސަރުކާރުގައި އެމަނިކުފާނު އެމެރިކާއަށް ކުރެއްވި ދެ ދަތުރުފުޅުގައި ވެސް ހޭދަކުރި ވަރަށް ވުރެ ކުޑަ އަދަދެކެވެ.

ރައީސް އިބޫގެ ވެރިކަމުގައި ސެޕްޓެމްބަރު، 2019 ގައި 11 ދުވަހަށް އެމެރިކާއަށް ކުރެއްވި ދަތުރުފުޅަށް ވަނީ 4.2 މިލިއަން ރުފިޔާ ހަރަދުކޮށްފަ އެވެ. އަދި 2021 ވަނަ އަހަރު 11 ދުވަހަށް އިބޫ އެމެރިކާއަށް ކުރެއްވި ދަތުރުފުޅަށް 5.3 މިލިއަން ރުފިޔާ ހަރަދު ކޮށްފައިވެ އެވެ.

"ވީމާ، މިފަހަރުގެ ދަތުރުފުޅުގައި ސަރުކާރުން ކުރެއްވި ހަރަދު ވަނީ މީގެ ކުރީގެ ދެ ފަހަރާ އަޅާ ބަލާއިރު ވަރަށް ބޮޑުތަނުން ކުޑަ ކުރެވިފަ އެވެ،" ރައީސް އޮފީހުން ބުންޏެވެ.

އެނގިފައިވާ ގޮތުގައި، މީގެ ކުރިން ރާއްޖޭގެ ރައީސުން ދަތުރު ކުރައްވަނީ ފަސްޓް ކުލާހުގައި ނަމަވެސް، އެމެރިކާއަށް ރައީސް މުއިއްޒު މިފަހަރު ދަތުރު ކުރެއްވީ ބިޒްނަސް ކުލާހުގަ އެވެ.

އެމެރިކާގެ ނިއު ޔޯކަކީ އެކޮމޮޑޭޝަންގެ އަގުތައް ދުނިޔޭގައި އެންމެ ބޮޑު އެއް ސިޓީއަށް ވާތީ، އެތަނުގައި ހުންނެވުމަށް ޕްރެޒިޑެންޝިއަލް ސުއިޓެއްގެ ބަދަލުގައި ރައީސް މުއިއްޒު ބޭނުން ކުރެއްވީ ހޮޓަލެއްގެ ދެ ކޮޓަރިކަން ވެސް ވަނީ އެނގިފަ އެވެ. އެއީ ރައީސް ހުންނެވުމަށް ކޮޓަރިއަކާއި އޮފީހާއި ރަސްމީ މަސައްކަތްޕުޅަށް ކޮޓަރިއެކެވެ.

އެ ދަތުރުފުޅުގައި ވަޑައިގެންނެވި ސަރުކާރުގެ ވަފުދުގެ ފަރިއްކޮޅުގެ ކަންކަން ހަމަޖެއްސީ ވެސް ދައުލަތުގެ ހަރަދުގައި ނޫން ކަން ވަނީ އެނގިފަ އެވެ.

ސަރުކާރުން ކުރިން ބުނީ ރައީސް މުއިއްޒުގެ އެ ދަތުރުފުޅުގައި ދުނިޔޭގެ އެކި ގައުމުތަކުގެ ވެރިންނާއި ޖަމާއަތްތަކުގެ އިސްވެރިންނާ އެކު ބޭއްވި ބައްދަލުވުންތަކުގައި ރާއްޖެއަށް މުހިންމު ގިނަ ކަންތައްތަކެއް ފަހިވާނެ ކަމުގެ ޔަގީންކަން ލިބިފައިވާ ކަމަށެވެ. އަދި ކުރިމަގުގައި އެ ގައުމުތަކާ ގުޅިގެން ރާއްޖޭގެ ތަރައްގީއަށް މުހިންމު މަސައްކަތްތައް ކުރުމުގެ ފުރުސަތު ވެސް ލިބޭނެ ކަމަށް ސަރުކާރުން ބުންޏެވެ.