ޝަމްއާން ދެއްވީ އާންމުން މާޔޫސްވިޔަ ނުދޭނެކަމުގެ ޔަގީންކަން

ރާއްޖޭގައި ގަވާއިދާ ހިލާފަށް އުޅޭ ބިދޭސީންނަށް އެހީތެރި ނުވުމަށް އެދިވަޑައިގަންނަވާ ކަމަށާއި އިމިގްރޭޝަނުން މިހާރު ފަށާފައިވާ އޮޕަރޭޝަންތަކުގައި އާންމުން މާޔޫސްވިޔަ ނުދެއްވާނެ ކަމަށް އިމިގްރޭޝަން ކޮންޓްރޯލަރު މުހައްމަދު ޝަމްއާން ވަހީދު އިއްޔެ ވިދާޅުވެއްޖެ އެވެ.

އޭނާ އެ ކަމަށް އެދިވަޑައިގަތީ ގަވާއިދާ ހިލާފަށް އުޅޭ ބިދޭސީން ހޯދަން ހުޅުމާލޭގައި އިއްޔެ ހިންގި ހާއްސަ އޮޕަރޭޝަންގެ ތެރެއިން މީޑިއާއާ ވާހަކަ ދައްކަވަމުންނެވެ.

އިމިގްރޭޝަން ކޮންޓްރޯލަރު ވިދާޅުވީ، ގަވާއިދާ ހިލާފަށް އުޅޭ ބިދޭސީން އަތުލައިގަތުމުގައި އާންމުންގެ އެއްބާރުލުން ވަރަށް ބޮޑަށް ބޭނުންވާ ކަމަށެވެ.

"އަދި މޯލްޑިވްސް އިމިގްރޭޝަނާ މެދު އާންމުން ދެކޭ ގޮތް ބަދަލުވެ އަޅުގަނޑުމެންނާ މެދު ކުރާ އިތުބާރު ބޮޑު ވެގެންދާތަން އަޅުގަނޑުމެންނަށް އެބަ ފެނޭ. އެހެންވީމާ ތި ގޮތުގައި އިތުބާރު ކުރައްވާށޭ. އަޅުގަނޑުމެން ޑިސްއެޕޮއިންޓް ނުކުރާނެ ކަމުގެ ފުރިހަމަ ޔަގީންކަން އަރުވަން،" ޝަމްއާން ވިދާޅުވި އެވެ.

ގަވާއިދާ ހިލާފަށް އުޅޭ ބިދޭސީން އަތުލައިގަތުމުގެ އޮޕަރޭޝަން މިހާރު ހިންގަނީ މާލެ ސަރަހައްދުގައި ކަމަށް ވިޔަސް އޭނާ ވިދާޅުވި ގޮތުގައި އެހެން އަތޮޅުތަކަށް އެ އޮޕަރޭޝަން ފުޅާކުރުމުގެ ޕްލޭންތައް އަންނަނީ ރާވަމުންނެވެ.

އިމިގްރޭޝަންގެ އެންމެ އިސްވެރިޔާ ވިދާޅުވީ، މި ސަރުކާރުގެ އަމާޒަކީ ގަވާއިދާ ހިލާފަށް އުޅޭ ބިދޭސީންގެ މައްސަލަ މި ތިން އަހަރުގެ ތެރޭގައި އެއްކޮށް ހައްލު ކުރުން ކަމަށެވެ. އެހެންވެ، އެއްވެސް ރެކޯޑެއް ނެތް ބިދޭސީން ރަޖިސްޓަރީ ކުރުމާއި ބިދޭސީން ރެގިއުލަރައިޒު ކުރުން ވެސް ކުރިއަށް ގެންދާ ކަމަށް ވިދާޅުވި އެވެ.

"އަޅުގަނޑުމެން ތިން އަހަރަށް ބަހާލައިގެން މި މަސައްކަތް ކުރާއިރު ކޮންމެވެސް ވަރެއްގެ ވަގުތުކޮޅެއް އަތޮޅުތެރެއަށް ރީޗްވާން ނަގާފާނެ. އެހެން ނަމަވެސް އަޅުގަނޑު ދޭން ބޭނުންވާ ޔަގީންކަމަކީ އަތޮޅުތެރެއަށް ވެސް މި އޮޕަރޭޝަންތައް ފުޅާވެގެންދާނެ. އަދި ގަވާއިދާ ހިލާފަށް އުޅޭ ފަރާތްތައް އަޅުގަނޑުމެންގެ ބެލުމުގެ ދަށަށް ގެނެވި، ޑީޕޯޓް ކުރެވެމުން ދާނެ،" ޝަމްއާން ވިދާޅުވި އެވެ.

މި ސަރުކާރު ވެރިކަމަށް އައި ފަހުން، ރާއްޖޭގައި ގަވާއިދާ ހިލާފަށް އުޅޭ ބިދޭސީން އަތުލައިގަތުމުގެ އޮޕަރޭޝަންތައް ވަނީ ވަރަށް ބޮޑަށް ފުޅާކޮށްފަ އެވެ. މިދިޔަ އަހަރުގެ ނޮވެމްބަރު 17 އިން ފެށިގެން މިހާތަނަށް 4،000 އަށް ވުރެ ގިނަ ބިދޭސީން ވަނީ ޑީޕޯޓް ކޮށްފަ އެވެ.

ގަވާއިދާ ހިލާފަށް އުޅޭ ބިދޭސީން ހޯދަން ހުޅުމާލޭގައި އިއްޔެ ހަވީރު ހިންގި ހާއްސަ އޮޕަރޭޝަންގެ ތަފުސީލީ މައުލޫމާތު އިމިގްރޭޝަނުން އަދި މީޑިއާއާ ހިއްސާއެއް ނުކުރެ އެވެ. އެފަދަ އޮޕަރޭޝަނެއް މިދިޔަ މަހު މާލޭގައި ވެސް ހިންގި އެވެ.