250 ބައިވެރިންނާ އެކު ޓީޗަރުންގެ ކޮންފަރެންސް ފަށައިފި

ޓީޗަރުންނަށް ހާއްސަ ކޮށްގެން ބާއްވަމުން އަންނަ އިންޓަނޭޝަނަލް ޓީޗާސް ކޮންފަރެންސް 250 ބައިވެރިންނާ އެކު މިއަދު ފަށައިފި އެވެ.

ނެޝަނަލް އިންސްޓިޓިއުޓް އޮފް އެޑިއުކޭޝަން (އެންއައިއީ) އިން ކޮންމެ ދެ އަހަރުން އެއް އަހަރު ބާއްވަމުން އަންނަ އެ ކޮންފަރެންސް ކުރިއަށް ގެންދާނީ މިއަދާއި މާދަމާ އެވެ. މި އަހަރުގެ ތީމަކީ "އެޑިއުކޭޓް އެމްޕަވާ އެލިވޭޓް އިކުއިޓެބަލް އެޑިއުކޭޝަން ފޯ ޓުވެންޓީ ފަސްޓް ސެންޗުއަރީ އެކްސެލެންސް" އެވެ.

މާލޭ ސީއެޗްއެސްސީގައި ކޮންފަރެންސް ފެށުމަށް ބޭއްވި ރަސްމިއްޔާތު ޝަރަފުވެރި ކޮށްދެއްވީ ފަސްޓް ލޭޑީ ސާޖިދާ މުހައްމަދެވެ.

އެޑިޔުކޭޝަން މިނިސްޓްރީން ބުނީ އެ ކޮންފަރެންސްގައި ބައިވެރިވުމަށް 250 ޓީޗަރުން ރަޖިސްޓަރީ ކޮށްފައިވާ ކަމަށެވެ. މި އަހަރުގެ ކޮންފަރެންސަށް 60 ރިސާޗް ކަރުދާހާއި ހަތަރު ކޭސް ސްޓަޑީ ހުށަހަޅާފައިވާއިރު، ދެ ކީނޯޓް އަދި ދެ ޕެނަލް ޑިސްކަޝަން ބާއްވާނެ ކަމަށް މިނިސްޓްރީން ބުންޏެވެ.

އެ ކޮންފަރެންސްގެ މަގުސަދަކީ:

1. ތައުލީމީ ދާއިރާގައި މަސައްކަތްކުރާ މީހުންނަށް ދިމާވާ ގޮންޖެހުންތަކާއި އެ ގޮންޖެހުންތައް ހައްލުކުރެވިދާނެ ގޮތްތައް ދެނެގަތުން

2. ކިޔަވައިދިނުން އިތުރަށް ހަރުދަނާ ކުރުމަށްޓަކައި ހިޔާލު ބަދަލުކޮށް މަޝްވަރާކުރުން

3. ބޭރު ގައުމުތަކުގެ ތައުލީމީ ދާއިރާގައި މަސައްކަތްކުރާ މީހުންނަށް ރާއްޖެ ތައާރަފު ކޮށްދިނުމާ އެކު، ރާއްޖޭގައި "އެކަޑެމިކް ޓުއަރިޒަމް" ކުރިއެރުވުން

ޓީޗާސް ކޮންފަރެންސަކީ ކިޔަވައިދިނުމުގެ ފެންވަރު މަތިކޮށް، ދިމާވާ މައްސަލަތައް ދެނެގަނެ އެ ކަންކަމާ މެދު ފުޅާދާއިރާއެއްގައި މަޝްވަރާ ކުރުމަށް 2012 ގައި ފެށި ޕްރޮގްރާމެކެވެ. ޓީޗަރުންގެ ކޮންފަރެންސް އެންމެ ފަހުން ބޭއްވީ 2022 ގައި ހދ. ކުޅުދުއްފުށީގަ އެވެ.