އެއްވެސް މީހަކަށް އަޅުގަނޑަށް ނުފޫޒެއް ނުފޯރުވޭނެ، ބިރެއް ނުދެއްކޭނެ: އައްބާސް

ވަޒީފާއާ ގުޅޭ މަސައްކަތްތައް ވަކި ގޮތަކަށް ކުރިއަށް ގެންދަން އެއްވެސް މީހަކަށް އޭނާގެ މައްޗަށް ނުފޫޒު ފޯރުވައި، ބިރު ނުދެއްކޭނެ ކަމަށް އާ ޕްރޮސެކިއުޓާ ޖެނެރަލް އައްބާސް ޝަރީފް އިއްޔެ ވިދާޅުވެއްޖެ އެވެ.

ޕީޖީގެ މަގާމާ މިދިޔަ މަހުގެ 18 ގައި ހަވާލުވެވަޑައިގެންނެވި ފަހުން ބޭއްވެވި ފުރަތަމަ މީޑިއާ ބްރީފިންގައި އައްބާސް ވިދާޅުވީ، މީގެ ކުރިން އޭނާ ހައި ކޯޓުގައި ފަސް އަހަރު މަސައްކަތް ކުރެއްވިއިރު ވެސް ނުފޫޒު ފޯރުވުން ފަދަ ކަމެއްގެ ތުހުމަތު އެއްވެސް ބަޔަކު އޭނާގެ މައްޗަށް ނުކުރާ ކަމަށެވެ.

ޕީޖީގެ މަގާމާ ހަވާލުވެވަޑައިގަތުމުގެ ކުރިން އެންމެ ފަހުން ވަޒީފާ އަދާކުރެއްވީ ރައީސް އޮފީހުގެ ލީގަލް ސެކްޝަންގައި ކަމަށް ވިޔަސް މިވަގުތު މަސައްކަތް ކުރައްވާނީ ޕީޖީގެ މަގާމުގެ މަސްއޫލިއްޔަތުތައް އަދާކުރެއްވުމުގައި ކަމަށް އައްބާސް ވިދާޅުވި އެވެ.

"އަޅުގަނޑު އަދި މަސައްކަތްކުރީ ރައީސް އޮފީހުގައި ކަމުގައި ވިޔަސް އަދި ރައީސްގެ ލީގަލް ކަންކަމުގައި އިސްކޮށް އުޅުނު ކަމުގައި ވިޔަސް އަޅުގަނޑު މިހާރު މި ހުރީ އެ މަގާމަކު ނޫނޭ. މިހާރު މިހުރީ ޕްރޮސެކިއުޓާ ޖެނަރަލްގެ މަގާމުގައި. އެހެންވީމާ އަޅުގަނޑު މަސައްކަތް ކުރި މީހުންނަށް އަޅުގަނޑުގެ މައްޗަށް ނުފޫޒު ފޯރުވޭ ކަމުގައިވާ ނަމަ ވަރަށް ގިނަ ވާނެ ރާއްޖޭގައި އަޅުގަނޑުގެ މައްޗަށް ނުފޫޒު ފޯރުވޭނެ މީހުން،" އައްބާސް ވިދާޅުވި އެވެ.

އެހެންވެ، އޭނާ ދެއްވި ޔަގީން ކަމަކީ ޕީޖީގެ މަގާމުގައި ހުންނަވައިގެން ވެސް އެއްވެސް ނުފޫޒެއް ނެތި މަސައްކަތް ކުރެވޭނެ ކަމެވެ.

"އެހެންވީމާ 100 ޕަސެންޓް ޔަގީންކަމާ އެކު އަޅުގަނޑު މި ދަންނަވަނީ އެއްވެސް ބޭފުޅަކަށް އަޅުގަނޑުގެ މައްޗަށް ނުފޫޒެއް ނުފޯރުވޭނެ. އެއްވެސް ބޭފުޅަކަށް ބިރެއް ވެސް ނުދެއްކޭނެ،" ހައި ކޯޓުގެ ފަނޑިޔާރު އައްބާސް ވިދާޅުވި އެވެ.

އައްބާސް ވިދާޅުވީ އެއްވެސް މީހަކު ނުވަތަ މުއައްސަސާއަކުން، އޭނާ ނިންމަވާ ނިންމެވުމެއް ބަދަލުކުރަން މަޖުބޫރުކުރާ ހިސާބުން ޕީޖީގެ މަގާމުން އިސްތިއުފާ ދެއްވާނެ ކަމަށެވެ. ގާނޫނުގައި އޮތް ގޮތަށް މިނިވަންކަމާ އެކު މަސައްކަތް ކުރުމަށް ޖާގަ އޮތްހާ ހިނދަކު އެ މަގާމުގައި ދެމި ހުންނަވާނެ ކަމަށް ވެސް އައްބާސް ވިދާޅުވި އެވެ.

"އެއްވެސް ބޭފުޅަކު ނުވަތަ އެއްވެސް މުވައްސަސާއަކުން އަޅުގަނޑަށް ނުފޫޒު ފޯރުވައިގެން އަޅުގަނޑު ލައްވައި އަޅުގަނޑަށް ޑިސިޝަން ބަދަލުކުރަން މަޖުބޫރުކުރާ ހިސާބަކީ އަޅުގަނޑު މިގޮނޑިން ތެދުވާނެ ދުވަސް. މާދަމާ ވެސް އިސްތިއުފާ ދީފައި ނުކުންނަން ޖެހިއްޖެއްޔާ ނިކުންނާނަން،" އޭނާ ވިދާޅުވި އެވެ.

އައްބާސް ވިދާޅުވިގޮތުގައި، މައްސަލަތައް ކުރިއަށް ގެންދިއުމުގައި ނިންމުންތައް ނިންމަވާނީ އެކަންކަން ބެލުމަށް ފަހު، އަމިއްލަ އަށް ގަބޫލު ކުރައްވާ ގޮތަކަށެވެ.

ޕީޖީގެ މަގާމުގައި ކުރިން ހުންނެވި ހުސައިން ޝަމީމް އެ މަގާމުން ވަކިކޮށްފައި ވަނީ ބައެއް މައްސަލަތައް އޭނާ ގޯސްކޮށް ނިންމެވި ކަމަށް ތުހުމަތުކޮށެވެ.

ޕީޖީ އޮފީހުން މިއަދު ވަނީ ޖިނާއީ މައްސަލަތަކުގައި ދައުލަތުން ކޮށްފައި ހުރި ދައުވާތަކާއި ބަންދުގައި ތިބި މީހުންގެ މައްސަލަތައް ރިވިއުކުރަން އެދުމުގެ ފުރުސަތު މިމަހުގެ 20 ގެ ނިޔަލަށް ހުޅުވާލައިފަ އެވެ.