އެސްޓަން ވިލާއިން ބެޔާން ސިއްސުވާލި އިރު ރެއާލް ވެސް ބަލިވެއްޖެ

އެސްޓަން (އޮކްޓޫބަރު 3) ޔޫއެފާ ޗެމްޕިއަންސް ލީގުގައި އެސްޓަން ވިލާ އިން އަމިއްލަ ދަނޑުގައި ޖަރުމަންގެ ވަރުގަދަ ބެޔާން މިއުނިކާ ވާދަކޮށް 1-0 އިން މޮޅުވެއްޖެ އެވެ.

މެޗު ނިމެން 11 މިނިޓަށް ވެފައި ވަނިކޮށް، ގޯލްކީޕަރު މެނުއެލް ނޯޔާގެ ބޯ މަތިން ގޯލަށް ބޯޅަ ފޮނުވާލައިގެން އެސްޓަން ވިލާ މޮޅުކޮށްދިން ގޯލު ޖަހައިދިނީ ބަދަލު ކުޅުންތެރިއެއް ގޮތުގައި ކުޅެން އެރި ޖޯން ޑުރާން އެވެ.

ފަހުގެ ތާރީހެއްގައި ކާމިޔާބު ނުލިބުނަސް އެސްޓަން ވިލާ އަކީ ވަރުގަދަ ތާރީހެއް އޮތް ޓީމެކެވެ. ވިލާ ވަނީ އިނގިރޭސި އެއްވަނަ ޑިވިޝަން ހަތް ފަހަރު ކާމިޔާބުކޮށް، ހަތް އެފްއޭ ކަޕާއި ފަސް ލީގް ކަޕްގެ އިތުރުން ޗެމްޕިއަންސް ލީގު (ޔޫރަޕިއަން ކަޕް) އާއި ސުޕަ ކަޕް ކާމިޔާބުކޮށްފަ އެވެ.

އެގޮތުން 1982 ވަނަ އަހަރު އެސްޓަން ވިލާ އިން ޗެމްޕިއަންސް ލީގު ކާމިޔާބު ކުރީ ހަމަ މި ނަތީޖާއިން، ބެޔާން މިއުނިކް ބަލިކޮށްފަ އެވެ.

މިއީ ހަ ފަހަރު ޗެމްޕިއަންސް ލީގު ކާމިޔާބު ކޮށްފައިވާ ބެޔާން މިއުނިކް، 2017 އަށް ފަހު މުބާރާތުގެ ލީގު ބުރެއްގެ މެޗަކުން ބަލިވި ފުރަތަމަ ފަހަރެވެ. އެ އަހަރު ޕީއެސްޖީ އަތުން ބަލިވި އިރު މުބާރާތް ކުރިއަށް ގެންދިޔައީ ގުރޫޕްތަކަށް ބަހާލައިގެންނެވެ. ނަމަވެސް މި ސީޒަންގައި ޔޫއެފާ އިން ވަނީ ފުރަތަމަ ބުރުގައި މުޅިން އަލަށް މުބާރާތުގެ ހުރިހާ ޓީމެއް އެކުގައި ރޭންކް ކުރަން ނިންމައިފަ އެވެ.

އެންމެ ފަހުގެ ޗެމްޕިއަން ރެއާލް މެޑްރިޑް ބަލިވީ ރަށުން ބޭރުގައި ފްރާންސްގެ ލިލް އާ ވާދަކޮށް 1-0 އިންނެވެ. ރެކޯޑް 15 ޗެމްޕިއަންސް ލީގު ތަށި އުފުލާލާފައިވާ ރެއާލާ ދެކޮޅަށް ލިލްގެ ހަމައެކަނި ގޯލު ފުރަތަމަ ހާފު ނިމެނިކޮށް ލިބުނު ޕެނަލްޓީއަކުން ޖަހައިދިނީ ޖޮނަތަން ޑޭވިޑެވެ.

ރެއާލްގެ ވާދަވެރި އެތުލެޓިކޯ މެޑްރިޑް ވަނީ ރޭ ޕޯޗުގަލްގެ ބެންފީކާ އަތުން 4-0 އިން ބަލިވެފަ އެވެ. ފުރަތަމަ ހާފުގައި މުހައްމަދު ކަރީމް ބެންފީކާއަށް ލީޑު ނަގައިދިން އިރު ފަހު ތިން ލަނޑު ވެސް ޖެހީ ފަހު ހާފުގަ އެވެ. އެންހެލް ޑިމާރިއާ އާއި އޯކުން ކޮކްޗޫ ވެސް ދެވަނަ ހާފުގައި ލިބުނު ޕެނަލްޓީ ކާމިޔާބުކުރި އިރު އަނެއް ލަނޑު ޖެހީ އަލެކްސެންޑަ ބާ އެވެ.

ލިވަޕޫލާއި ޔުވެންޓަސް ވަނީ ރޭގެ މެޗު ކާމިޔާބު ކޮށްފަ އެވެ. އެލެކްސިސް މެކްއަލިސްޓާ އާއި މުހައްމަދު ސަލާހުގެ ގޯލުތަކުން 2-0 އިން ލިވަޕޫލުން ބޮލޯނިއާ ބަލިކުރި އިރު، ޔުވެންޓަސް މޮޅުވީ އާރުބީ ލައިޕްޒިގާ ވާދަކޮށް އެކަކު މަދުކޮށް ކުޅެގެން 3-2 އިންނެވެ.

ފުރަތަމަ ހާފުގައި ބެންޖަމިން ސެސްކޯ، ލައިޕްޒިގަށް ލީޑު ނަގައިދީފައި ވަނިކޮށް ޔުންވެޓަސް އެއްވަރު ކުރީ ދެވަނަ ހާފުގައި ޑޫސާން ވްލަހޯވިޗް ޖަހައިދިން ގޯލުންނެވެ. ނަތީޖާ އެއްވަރު ވެފައި ވަނިކޮށް ޔުވެންޓަސްގެ ކީޕަރަށް ރަތް ކާޑު ދެއްކުމުން އެޓީމުން މެޗު ފުރިހަމަ ކުރީ 10 ކުޅުންތެރިންނާ އެކު އެވެ.

އިރުކޮޅެއް ފަހުން ލައިޕްޒިގަށް ލިބުނު ޕެނަލްޓީއަކުން ސެސްކޯ ދެވަނަ ފަހަރަށް ލީޑު ނަގައިދިން ނަމަވެސް ވްލަހޯވިޗް ވަނީ ތިން މިނިޓް ތެރޭ ގޯލެއް ޖަހައި ދެވަނަ ފަހަރަށް ނަތީޖާ އެއްވަރު ކޮށްފަ އެވެ. އަދި މެޗު ނިމެން ހަތްވަރަކަށް މިނިޓަށް ވެފައި ވަނިކޮށް ޔުވެންޓަސް މޮޅުވި ގޯލު ޖަހައިދިނީ ފްރެންސިސްކޯ ކޮންސިއެކާއޯ އެވެ.