15 ޕާކިން ބިލްޑިންގްގެ ސްލޮޓްތައް ދޫކުރުމުގެ އެއްބަސްވުމެއްގައި ސޮއިކޮށްފި

ހުޅުމާލޭގައި އެޗްޑީސީން އިމާރާތްކުރާ 15 ޕާކިން ބިލްޑިންގްގައި ޕާކްކުރާ ވެހިކަލްތަކަށް ސްލޮޓްތައް ކަނޑައެޅުމާ ގުޅޭ އެއްބަސްވުމެއްގައި އެ ކުންފުންޏާއި ޓްރާންސްޕޯޓް މިނިސްޓްރީން މިއަދު ސޮއިކޮށްފި އެވެ.

އެ އެއްބަސްވުމުގައި ސޮއިކުރެއްވީ ޓްރާންސްޕޯޓު މިނިސްޓަރު މުހައްމަދު އަމީނާއި އެޗްޑީސީގެ މެނޭޖިން ޑިރެކްޓަރު އިބްރާހިމް ފަޒުލް ރަޝީދެވެ.

އެޗްޑީސީން ބުނީ ޕާކިން ބިލްޑިންގްތައް ކުރިއަށް އޮތް ދެ އަހަރުގެ ތެރޭގައި ނިންމާނެ ކަމަށެވެ.

އުމަރު ޒާހިރު އޮފީސް ބިލްޑިންގްގައި ބޭއްވި ރަސްމިއްޔާތުގައި އަމީން ވިދާޅުވީ އާ ސަރުކާރުން ވެރިކަމާ ހަވާލުވިއިރު، މަގުތައް އޮތީ ބޮއްސުންލައިގެން ގޮސްފައި ކަމަށެވެ. ނަމަވެސް ހަރުދަނާ ބަދަލުތަކާ އެކު ވަރަށް ބޮޑެތި ހައްލުތަކެއް އައިސްފައިވާ ކަމަށާއި އެ ޕާކިން ބިލްޑިންގްތަކާ އެކު ބޮޑު ހައްލެއް އަންނާނެ ކަމަށް އަމީން ވިދާޅުވި އެވެ.

އޭނާ ވިދާޅުވި ގޮތުގައި ގަރާޖު ހުރި ކަމަށް ބަލައި، ރަޖިސްޓްރީކޮށްދީފައި ހުރި ގިނަ އަދަދެއްގެ ވެހިކަލް ޕާކުކޮށްފައި ހުރީ މަގުމަތީގަ އެވެ. ގެދޮރާއި އިމާރާތުގެ ދަތިކަމާ ހުރެ ގަރާޖެއް ނުލިބޭ މީހުންނަށް ވެސް، ގާނޫނުގެ ތެރެއިން ޕާކިން ބިލްޑިންގައި ވެހިކަލް ރަޖިސްޓްރީކުރެވޭނެ ކަމަށް މިނިސްޓަރު ވިދާޅުވި އެވެ.

"މި މައްސަލައަށް ވަރަށް ބޮޑު ހައްލެއް އަޅުގަނޑު ގަބޫލުކުރާ ގޮތުގައި ލިބޭނެ. މި ޕާކިން ބިލްޑިންތަކަކީ ރަޖިސްޓްރީ ކުރެވޭ ގޮތަށް އަދި އެ ބޭނުންކުރައްވާ ބޭފުޅުން ބޭނުންކޮށް ނިމުނީމަ ގެންގޮސް ވައްދާނެ ގަރާޖެއް ގޮތުގައި ވެސް މި ޒަމާނަށް ފެތޭ، އަޅުގަނޑު ގަބޫލުކުރާ ގޮތުގައި މި ބިލްޑިންތައް އަޅާ ނިމޭއިރު ހުންނާނީ އޮޓޮމޭޝަންއާއެކީ އައިސްފައި. އެހެންވީމަ އެ ބޭނުންކުރާ ފަރާތްތަކަށް ޕާކް ކުރުމުގައި އުނދަގުލެއް ނުވާނެ." އަމީން ވިދާޅުވި އެވެ.

ޕާކިން ބިލްޑިންތަކުގައި ޖުމްލަ 3،920 ކާރު ސްލޮޓު އަދި 3،426 ސައިކަލު ޕާކްކުރާނެ ޖާގަ ދޫކުރާނެ އެވެ. އޭގެ ތެރެއިން 90 ޕަސެންޓް ދޫކުރަން ނިންމާފައިވަނީ ބީލަމުގެ އުސޫލުންނެވެ. ބާކީ 10 ޕަސެންޓް ދޫކުރަނީ، ޕާކިން ބިލްޑިންތަކުގެ ގްރައުންޑް އަދި އެންމެ މަތީ ފްލޯގައި ހަދާ ކެފޭ/ ރެސްޓޯރެންޓު އަދި ކުޅިވަރު ހޯލުތަކަށް ދާ މީހުންނަށެވެ.

އެޗްޑީސީގެ މެނޭޖިން ޑިރެކްޓަރު، ފަޒުލް ވިދާޅުވީ އެ ސްލޮޓަށް ދޫކުރާ ލިޔުމުން ކާރު ރަޖިސްޓްރީކޮށްދޭނެ ކަމަށާއި ޕާކިން ސްލޮޓު ގަންނަ މީހުންނަށް މުޅި އުމުރަށް އެ ތަން ލިބޭނެ ކަމަށެވެ.

"...އެޕާޓްމަންޓެއް އޯންކުރާ އުސޫލުންނޭ އަޅުގަނޑުމެން މިކޮޅުން [ޕާކިން ސްލޮޓު] ވިއްކަން ހަމަޖެހިފައިވަނީ. ބޭންކް ސިސްޓަމްގެ ތެރެއިން އަޅުގަނޑުމެންނަށް ފައިސާ ދައްކާ އުސޫލު ވެސް ގަބޫލުކުރާނެ. ޑައިރެކްޓު ޕޭމަންޓު ވެސް އަޅުގަނޑުމެން ގަބޫލުކުރާނެ. މި ލިބޭ ފުރުސަތަކީ އެ ބޭފުޅެއްގެ ކާރު ޕާކްކުރާނެ ޖާގަ ތަނަވަސްވެގެން އައުން." ފަޒުލް ވިދާޅުވި އެވެ.

އެޗްޑީސީން ވަނީ ޕާކިން ބިލްޑިންތައް އަޅައިދޭނެ ބަޔަކު ހޯދަން މިދިޔަ މަހު އިއުލާންކޮށްފަ އެވެ. އެކަމަށް ބޮޑު ތަރުހީބެއް ލިބިފައިވާ ކަމަށާއި މި އަހަރު ނިމުމުގެ ކުރިން، ފުރަތަމަ ފިޔަވަހީގައި ހިމެނޭ 7-8 ޕާކިން ބިލްޑިންގެ މަސައްކަތް ފަށާނެ ކަމަށް ފަޒުލް ވިދާޅުވި އެވެ.

އެޗްޑީސީން އަމާޒު ހިފާފައިވަނީ އެއް އަހަރުގެ ތެރޭގައި ބިލްޑިންގެ މަސައްކަތް ނިންމުމަށެވެ. ޕާކިން ބިލްޑިންގްތައް ހެދުމުގެ ހުރިހާ މަސައްކަތެއް ކުރާނީ އެޗްޑީސީންނެވެ.

"އެއް އަހަރުގެ ތެރޭގައި ހައްލު ފެންނަން ފަށާނެ،" ފަޒުލް ވިދާޅުވި އެވެ.

އަމީން ވިދާޅުވި ގޮތުގައި މާލެއަށް ދިމާވެފައިވާ އެންމެ ބޮޑު މައްސަލައަކީ އުޅަނދު ގިނަވުމެވެ. އެހެން ދިމާވެފައިވަނީ ގަވައިދާ ހިލާފަށް އެހެން ޒޯނުތަކުގައި ރަޖިސްޓްރީކޮށްފައިވާ ވެހިކަލް ދުއްވުމާއި ވިޔަފާރި ބޭނުމާއި އެހެނިހެން ގޮތްގޮތުން މަންފާ ލިބެމުން ގޮސްފައި ހުރުމުން ރަޖިސްޓްރީނުކޮށް ވަރަށް ގިނަ ވެހިކަލް އެތެރެކޮށްފައި ހުރުމުންނެވެ.

އެހެން ޒޯނުތަކަށް ރަޖިސްޓްރީކޮށްދީފައިވާ ވެހިކަލް އަދި ރަޖިސްޓްރީނުކުރާ ވެހިކަލްތައް ރަޖިސްޓްރީކުރަން ހުޅުމާލެ 2 ގައި ވަނީ ބޮޑު ޕާކިންއެއް ހާއްސަކޮށްފަ އެވެ.

އަމީން ވިދާޅުވީ އެ ތަނުގައި ހަތަރު ފުރޮޅުލީ 300-400 ވެހިކަލް މިހާރު ވެސް އެބަހުރި ކަމަށެވެ.