މީހަކު މަރުވި އެކްސިޑެންޓާ ގުޅިގެން ޑްރައިވަރު ބަންދުކުރި މައްސަލަ ހައި ކޯޓަށް

ހުޅުމާލޭ ސެންޓްރަލް ޕާކް ކައިރީގައި ސްޕޯޓްސް ކާރަކާއި ސައިކަލެއް ޖެހި ހިނގި ނުރައްކާތެރި އެކްސިޑެންޓްގައި މީހަކު މަރުވި މައްސަލާގައި، ކާރު ދުއްވި ޒުވާނާ ބަންދުކުރި މައްސަލަ ހައި ކޯޓުގައި އިސްތިއުނާފްކުރި މައްސަލައިގެ ޝަރީއަތް މިއަދު ފަށައިފި އެވެ.

މިދިޔަ މަހު ކުރީކޮޅު ހުޅުމާލޭ ސެންޓްރަލް ޕާކް ކައިރިން ދުއްވާފައި ދިޔަ ކާރަކާއި ސައިކަލެއް ޖެހި، ހިނގި އެކްސިޑެންޓްގައި، ސައިކަލު ދުއްވަން އިން ހަސަން ސަމާހު މަރުވި މައްސަލާގައި ހައްޔަރުކުރީ ކާރު ދުއްވަން އިން މުހައްމަދު ވިސާމް ސިދުގީ އެވެ.

ޝަރީއަތް ނިމެންދެން އޭނާ ބަންދުކުރަން ހުޅުމާލޭ މެޖިސްޓްރޭޓް ކޯޓުން އަމުރުކުރި މައްސަލަ އިސްތިއުނާފްކުރަން ހުށަހެޅީ އޭނާގެ ފަރާތުންނެވެ.

ހައި ކޯޓުގެ މިއަދުގެ ބޭއްވި އަޑުއެހުމުގައި ވިސާމްގެ ވަކީލް ނޫރުއްސަލާމް އަބޫބަކުރު ވިދާޅުވީ ވިސާމް ކާރު ދުއްވީ ބާރު ސްޕީޑްގައި ނޫން ކަމަށާއި އެ ހާދިސާ ހިނގީ ވަންވޭއާ ދެކޮޅަށް ސައިކަލު ދުއްވާފައި ދަނިކޮށް ކާރުގައި ޖެހުމުން ކަމަށެވެ. އެކަމަށް ފުލުހުން ދަށު ކޯޓުގައި ދެކޮޅު ހެދި ނަމަވެސް ފަހުން އާންމުވި މައުލޫމާތުތަކުން އެކަމަށް ބާރު ލިބިފައިވާ ކަމަށް ވަކީލް ވިދާޅުވި އެވެ. އަދި ވިސާމް ބަންދުކުރީ އޭރު ފުލުހުން ދިން މައުލޫމާތުތަކަށް ބިނާކޮށް ކަމަށް ވެސް ވަކީލް ނޫރު ވިދާޅުވި އެވެ.

މީގެ އިތުރުން ކޯޓުތަކާބެހޭ ގާނޫނުގެ ދަށުން، މަރުގެ މައްސަލަތައް ބެލުމުގެ އިހްތިސާސް މެޖިސްޓްރޭޓް ކޯޓަށް ނޯންނައިރު އެ މައްސަލާގައި ވިސާމްގެ ބަންދާ މެދު ގޮތެއް ނިންމުމުގެ ބާރު ހުޅުމާލޭ މެޖިސްޓްރޭޓް ކޯޓަށް ނުލިބޭނެ ކަމަށް ވެސް ވަކީލް ނޫރު ވިދާޅުވި އެވެ. އެކަންކަން ފާހަގަކޮށް، އޭނާ ހުޅުމާލޭ މެޖިސްޓްރޭޓް ކޯޓުގެ ނިންމުން ބާތިލްކޮށް، ވިސާމް ބަންދުން ދޫކުރަން އަމުރުކޮށް ދިނުމަށެވެ.

ނަމަވެސް ދައުލަތުން ބުނީ ވަންވޭއާ ދެކޮޅަށް ސައިކަލު ދުއްވިކަން ފާހަގަނުވާ ކަމަށާއި އެކްސިޑެންޓް ހިނގީ ބާރު ސްޕީޑްގައި ކާރު ދުއްވުމުގެ ސަބަބުން ކަމަށް ހާދިސާ ރިޕޯޓްގައި ބުނެފައިވާ ކަމަށް ދައުލަތުން ބުންޏެވެ. އަދި ވިސާމަކީ ކުރިން ވެސް ލައިސަންސް ނެތި ވުމުގެ މައްސަލަތަކުގައި އެކިފަހަރު ހުއްޓުވާފައިވާ މީހެއް ކަމަށް ދައުލަތުން ބުންޏެވެ. އެހެންވެ، ފުލުހުން ދަށު ކޯޓުގައި ހަގީގަތާ ހިލާފަށް ވާހަކަ ދެއްކި ކަމަށް ބެލެވޭނެ ސަބަބެއް ނޫން ކަމަށް ދައުލަތުން ބުންޏެވެ.

ދައުލަތުން ބުނީ ގާނޫނު އޮންނަ ގޮތުން ބަންދާ މެދު ގޮތެއް ނިންމަން ހާޒިރުކުރަން ޖެހޭނީ އެ މީހަކު ހައްޔަރުކުރި ރަށެއްގައި ހުރި ކޯޓަކަށް ކަމަށެވެ. އެހެންވެ، ހުޅުމާލޭ ކޯޓަށް އޭނާ ހާޒިރުކޮށް، ބަންދާ މެދު ގޮތެއް ނިންމުމުގައި ގޯހެއް ނެތް ކަމަށް ދައުލަތުން ބުންޏެވެ. އެހެންވެ، ދައުލަތުން އެދުނީ ވިސާމް ޝަރީއަތް ނިމެންދެން ބަންދުކުރަން ހުޅުމާލޭ ކޯޓުން ނިންމި ނިންމުމަށް ބަދަލު ގެންނަންޖެހޭ ސަބަބެއް ނެތް ކަމަށް ނިންމައި ދިނުމަށެވެ.

ދެ ފަރާތަށް ވެސް ގިނަ ސުވާލުތަކެއް އަމާޒު ކުރުމަށްފަހު ފަނޑިޔާރުންގެ ބެންޗުން ވަނީ އެ މައްސަލާގެ އަޑުއެހުންތައް ނިންމާލައިފަ އެވެ. އެހެންވެ، އިތުރު ކަމެއް ސާފުކުރަން ނުޖެހޭނަމަ ދެން އޮންނާނީ ހުކުމް އިއްވުން ކަމަށް ބެންޗުން އިއުލާން ކުރެއްވި އެވެ.

އެ މައްސަލަ ހައި ކޯޓުން ބައްލަވަނީ ފަނޑިޔާރު ހަސަން ޝަފީއު އާއި ފަނޑިޔާރު ފާތިމަތު ފަރުހީޒާ އާއި ފަނޑިޔާރު އަބްދުލްމާނިއު ހުސައިނެވެ. ބެންޗުގެ ރިޔާސަތު ބަލަހައްޓަވަނީ ފަނޑިޔާރު ޝަފީއު އެވެ.