20 އަހަރުގެ ގައުމީ ތަރައްގީގެ މާސްޓަ ޕްލޭނަށް އޮސްޓްރޭލިއާގެ ފަންނީ އެހީ ހޯދަނީ

ރައީސް ޑރ. މުހައްމަދު މުއިއްޒުގެ ރިޔާސީ ވައުދުފުޅެއް ކަމަށްވާ 20 އަހަރުގެ ގައުމީ ތަރައްގީގެ މާސްޓަ ޕްލޭން އެކުލަވާލުމުގެ މަސައްކަތަށް އޮސްޓްރޭލިއާގެ ފަންނީ އެހީތެރިކަން ހޯދަން ދިވެހި ސަރުކާރުން އެ ގައުމާ އެކު މިއަދު އެއްބަސްވުމެއްގައި ސޮއިކޮށްފި އެވެ.

ހައުސިން މިނިސްޓްރީގައި މިއަދު މެންދުރު ފަހު ބޭއްވި ރަސްމިއްޔާތެއްގައި ވަނީ 20 އަހަރުގެ ގައުމީ ތަރައްގީގެ މާސްޓަ ޕްލޭނެއް އެކުލަވާލުމާއި އެކަމާ ގުޅޭ ފަންނީ އިރުޝާދާއި އެހީތެރިކަން ފޯރުކޮށްދިނުމާ ގުޅޭ ލެޓާ އޮފް އެކްސްޗޭންޖް އެއްބަސްވުމުގައި އޮސްޓްރޭލިއާގެ ސަރުކާރާ އެކު ދިވެހި ސަރުކާރުން ސޮއިކޮށްފަ އެވެ.

އެ އެއްބަސްވުމުގައި ދިވެހި ސަރުކާރުގެ ފަރާތުން ސޮއިކުރެއްވީ ހައުސިން މިނިސްޓަރު ޑރ. އަލީ ހައިދަރު އަހްމަދެވެ. އަދި އޮސްޓްރޭލިއާ ސަރުކާރުގެ ފަރާތުން އެ އެއްބަސްވުމުގައި ސޮއިކުރެއްވީ އެ ގައުމުން ރާއްޖެއަށް ކަނޑައަޅުއްވާފައި ހުންނަވާ ސަފީރު ޑޭވިޑް ޖެސަޕް އެވެ.

ހައުސިން މިނިސްޓްރީން ބުނީ އޮސްޓްރޭލިއާ ސަރުކާރުން ފަންޑުކުރާ ޔޫއެންޑީޕީގެ އިންޓަގްރޭޓެޑް ގަވަނަންސް ޕްރޮޖެކްޓްގެ ދަށުން މި މަސައްކަތަށް 900،000 އޮސްޓްރޭލިއަން ޑޮލަރު (9.4 މިލިއަން ރުފިޔާ)ގެ އެހީ ރާއްޖެއަށް ދިނުމަށް ހަމަޖެހިފައިވާ ކަމަށެވެ.

ރާއްޖޭގެ 20 އަހަރުގެ ގައުމީ ތަރައްގީގެ މާސްޓަ ޕްލޭން އެކުލަވާލުމުގެ މަސައްކަތް ފަށަން ރައީސްގެ ކެބިނެޓުން ނިންމީ މިދިޔަ މަހު އެވެ.

އެ ނިންމުމާ ގުޅޭ ގޮތުން ރައީސް މުއިއްޒު ވިދާޅުވެފައި ވަނީ ކުރިއަށް އޮތް އަހަރު ތެރޭގައި ރައްޔިތުންގެ ފުރިހަމަ ބައިވެރިވުން ހިމެނޭ ގޮތަށް، ހުރިހާ ސިޔާސީ ޕާޓީތަކާއި ޖަމިއްޔާތަކާއި އެކިއެކި ސްޓޭކް ހޯލްޑަރުން އަދި އެކްސްޕާޓުންގެ ބައިވެރިވުން ހިމެނޭ ގޮތަށް އެ ޕްލޭންގެ މަސައްކަތް ފަށާނެ ކަމަށެވެ.

"މި ޕްލޭންއަކީ އަޅުގަނޑު ވައުދުވީ ގޮތަށް އެ ޕްލޭނަށް ގާނޫނީ ބާރުވެރިކަން ގާނޫނީ ހިމާޔަތްތެރިކަން ލިބިގެންދާ ޕްލޭނަކަށް ހެދުމަށްޓަކައި ގާނޫނުއަސާސީ އާއި ގާނޫނަށް ވަކިން ހާއްސަކޮށް މިކަމަށް ހަދާ ގާނޫނަކާ އެކީ ހެދިގެންދާނެ ޕްލޭނަކަށް ވާނެ،" ރައީސް ވިދާޅުވި އެވެ.

"މީގެ މަގުސަދަކީ ރައްޔިތުންގެ ހިޔާލާއި މަޝްވަރާއާ އެއްކޮށް ރައްޔިތުން ބޭނުންވާ ގޮތަށް ރާއްޖޭގެ ތަސައްވުރު ކުރިއަށް އޮތް 20 އަހަރު ދުވަހަށް ކަނޑައެޅިގެންދާ ދިޔުމަކީ ރައްޔިތުންނަށް އެކަމުގެ ޔަގީންކަން އޮންނަ ކަމަކަށް ހެދުން."

ރައީސް ވިދާޅުވެފައިވާ ގޮތުގައި، ރާއްޖޭގެ ހުރިހާ ރަށެއްގައި މި ޕްލޭނާ ގުޅޭ މަޝްވަރާތައް ހިނގާނެ އެވެ. އަދި މި ޕްލޭން ބައްޓަންވާނީ ހުރިހާ ރައްޔިތުން ބޭނުންވާ ގޮތަށެވެ.