އެކުވެރިންނާ އެކު އިޒްރޭލާ ދެކޮޅަށް ކުރާ ހަނގުރާމާގައި ފަހަތަކަށް ނުޖެހޭނަން: ޚާމަނާއީ

މެދުއެރުމަތީގައި ތިބި އެކުވެރިންނާ އެކު، އިޒްރޭލާ ދެކޮޅަށް އިރާނުން ކުރަމުންދާ ހަނގުރާމާގައި ފަހަތަކަށް ނުޖެހޭނެ ކަމުގެ ޔަގީންކަން އިރާނުގެ ރޫހާނީ ލީޑަރު އާޔަތުﷲ ޚާމަނާއީ ދެއްވައިފި އެވެ.

މިދިޔަ އަންގާރަ ދުވަހުގެ ރޭ އިރާނުން ސީދާ އިޒްރޭލަށް ވަރުގަދަ މިސައިލް ހަމަލާތަކެއް ދީފައިވާއިރު، އިއްޔެ ވެރިރަށް ތެހެރާނުގައި ހުކުރު ހުތުބާ ދެއްވަމުން، ޚާމަނާއީ ވަނީ ފަލަސްތީނުގެ މިނިވަންކަމަށް މަސައްކަތްކުރާ ހަމާސް ޖަމާއަތަށް ވަރަށް ބޮޑަށް ތައުރީފު ކުރައްވައިފަ އެވެ.

"ކިތަންމެ ބަޔަކު ޝަހީދު ކޮށްލިޔަސް، އިޒްރޭލާ ދެކޮޅަށް މި ސަރަހައްދުގައި ކުރާ ހަނގުރާމާގައި ފަހަތަށް ޖެހުމެއް ނޯންނާނެ، އަދި ކާމިޔާބު ވެސް ކުރާނަން،" ޚާމަނާއީ ވިދާޅުވި އެވެ.

ހުތުބާގައި ޚާމަނާއީ ވަނީ އިޒްރޭލުގެ "ރަހުމްކުޑަ ނުބައި ކަން ދެން މާ ގިނަ ދުވަހު ދެމިނޯންނާނެ" ކަމަށް ވެސް ވިދާޅުވެފަ އެވެ.

މިދިޔަ އަންގާރަ ދުވަހު އިޒްރޭލަށް ދިން މިސައިލް ހަމަލާއަކީ، އީރާންގެ މަދަދު ލިބޭ، ލުބްނާންގެ ހިޒްބުﷲ ޖަމާއަތުގެ ލީޑަރު ހަސަން ނަސްރުﷲ އާއި ހަމާސް ޖަމާއަތުގެ ވެރިޔާ އިސްމާއިލް ހަނިއްޔާ އަވަހާރަކޮށްލުމުގެ ބަދަލުގައި ދިން ހަމަލާއެއް ކަމަށް އިރާނުގެ އަސްކަރިއްޔާއިން ވަނީ ބުނެފަ އެވެ.

އީރާނުން ވަނީ މިދިޔަ އޭޕްރީލް މަހުގެ ތެރޭގައި ވެސް އިޒްރޭލަށް އެތައް ސަތޭކަ މިސައިލަކާއި ޑްރޯނުން ހަމަލާތަކެއް ފޮނުވާލައިފަ އެވެ. އެކަމަކު އިޒްރޭލުން ބުނެފައިވާ ގޮތުގައި ހަމަލާތަކުގެ 99 ޕަސެންޓް އިންޓަސެޕްޓްކޮށް އެ ހަމަލާތައް ނާކާމިޔާބުކޮށްލެވުނެވެ.

ހިޒްބުﷲ ބަލިކަށިކޮށްލުމުގެ ނަމުގައި އިޒްރޭލުން މިވަގުތު ވެސް ދަނީ ވައިގެ ހަމަލަތަކާ އެކު އެއްގަމު މަގުން ލުބްނާނަށް ވަދެގަނެ ހަމަލާތައް ދެމުންނެވެ.

އިރާނަށް ހަމަލާދިނުމަށް އިޒްރޭލުން ރާވަމުންދާކަމުގެ ރިޕޯޓުތައް ވެސް ދަނީ ލިބެމުންނެވެ. އެކަމަކު އިރާނުގެ ތެޔޮ ކާރުހަނާތަކަށް ހަމަލާ ނުދިނުމަށް އެމެރިކާ އިން އިޒްރޭލަށް ވަނީ އިލްތިމާސްކޮށްފަ އެވެ.

އިރާނުން ދިން ވައިގެ ހަމަލާތަކުގެ ރައްދު ދޭނެ ގޮތަކާ މެދު އިޒްރޭލާ އެކު މަޝްވަރާކުރަމުންދާ ކަމަށް އެމެރިކާގެ ރައީސް ޖޯ ބައިޑެން ވަނީ ހާމަކުރައްވައިފަ އެވެ.