ކުޑަކުއްޖަކަށް 12 އަހަރު ވަންދެން ޖިންސީ ގޯނާކުރި މީހަކު 15 އަހަރަށް ޖަލަށް

ކުޑަކުއްޖަކަށް 12 އަހަރު ވަންދެން އެކި ފަހަރު މަތިން ޖިންސީ ގޯނާކުރި މީހަކު 15 އަހަރަށް ޖަލަށްލާން ހައި ކޯޓުން މިއަދު ހުކުމްކޮށްފި އެވެ.

ލ. އަތޮޅު ރަށެއްގެ މީހެއްގެ މައްޗަށް އެ ހުކުމް އައީ 2009 ވަނަ އަހަރުން ފެށިގެން އޮކްޓޫބަރު، 2021 ގެ ނިޔަލަށް އެކިފަހަރު މަތިން އޭނާގެ އެއްބަނޑު އެއްބަފާ މީހެއްގެ ދަރިއަކަށް ޖިންސީ ގޯނާކުރި މައްސަލައިގަ އެވެ. އެ މައްސަލާގައި އޭނާގެ މައްޗަށް ކުރި އިތުބާރު ކުރެވޭ މަގާމެއްގައި ހުރެ ކުޑަކުއްޖަކާ މެދު ޖިންސީ އަމަލެއް ހިންގުމުގެ ދައުވާ ސާބިތުނުވާ ކަމަށް އެ ރަށު މެޖިސްޓްރޭޓް ކޯޓުން ކުރިން އޮތީ ހުކުމްކޮށްފަ އެވެ.

އެހެންވެ، އެ މައްސަލަ ހައި ކޯޓުގައި އިސްތިއުނާފްކުރީ ދައުލަތުންނެވެ.

ހައި ކޯޓުން މިއަދު ކުރި ހުކުމުގައިވަނީ އެ ކުއްޖާ ނިދާފައި އޮއްވައި އެ ކުއްޖާގެ ގައިގައި އަތްލުމުގެ އިތުރުން އެ ކުއްޖާއަށް ބަރަހަނާ މަންޒަރު ހިމެނޭ ވީޑިއޯ އެ މީހާ ދެއްކި ކަމަށް އެ ކުއްޖާ ބުނި ކަމަށް އެ ކުއްޖާގެ ބޭބެއަށް ކިޔައިދީފައިވާ ކަމަށެވެ. އަދި އެ ކުއްޖާއަށް އެންމެ ފުރަތަމަ 2009 ވަނަ އަހަރު ޖިންސީ ގޯނާކުރި ވާހަކަ އެ ކުއްޖާ ކިޔައިދިނީ އޭގެ އެތައް އަހަރެއް ފަހުން ކަމަށް ވިޔަސް، އޮކްޓޫބަރު 2021 ގައި އެ ކުއްޖާއަށް ޖިންސީގޯނާކުރި ވާހަކަ އެއްވެސް ފުށު އެރުމެއް ނެތި އެ ކުއްޖާ ކިޔައިދީފައިވާ ކަމަށް ހުކުމުގައިވެ އެވެ.

ހުކުމުގައިވާ ގޮތުން، އެ މީހާގެ ދިފާއުގައި އޭނާގެ އަނބިމީހާ އާއި އިތުރު ބަޔަކު ހެކިބަސް ދިން ނަމަވެސް، އެ މީހުންގެ ބަހަށް ބާރު ދޭނެ އިތުރު ހެއްކެއް ނެތުމުން އެ މީހުންގެ ހެކިބަސް އެއްފަރާތް ކުރަން ޖެހެ އެވެ. އަދި އެ ކުއްޖާގެ ބަހަށް ބާރު ދޭނެ އިތުރު ހެކިތައް ހުރިއިރު، އެ ކުއްޖާއަށް ލިބުނު ޖިންސީ ގޯނާތަކުގެ ސަބަބުން އެ ކުއްޖާއަށް ނަފްސާނީ ގޮތުން އަސަރު ކޮށްފައިވާ ކަން ހެކިތަކުން އެނގޭ ކަމަށް ވެސް ހުކުމުގައިވެ އެވެ.

އެކަންކަން ފާހަގަކޮށް، އެ މައްސަލަ ބެއްލެވި ތިން ފަނޑިޔާރުންގެ އިއްތިފާގުން ކުރެއްވި ހުކުމުގައިވަނީ އެ މީހާގެ މައްޗަށް ކުށް ސާބިތުނުވާ ކަމަށް ކުރި ހުކުމް ބާތިލް ކުރުމާ އެކު، އޭނާ 15 އަހަރަށް ޖަލަށްލުމަށް ހުކުމް ކުރެއްވީ ކަމަށެވެ.

އެ މީހާ 15 އަހަރަށް ޖަލަށްލި ނަމަވެސް ބަންދުގައި ކުރިން ހޭދަކުރި މުއްދަތު އުނި ކުރުމުން އޭނާ ދެން ތަންފީޒު ކުރަން ޖެހޭނީ 14 އަހަރުގެ ޖަލު ހުކުމެކެވެ.

ހައި ކޯޓުން އެ މައްސަލަ ބެއްލެވީ ފަނޑިޔާރު މުހައްމަދު ފައިސަލާއި ފަނޑިޔާރު ފާތިމަތު ފަރުހީޒާ އަދި ފަނޑިޔާރު މުހައްމަދު ނިޔާޒެވެ. ބެންޗުގެ ރިޔާސަތު ބެލެހެއްޓެވީ ފަނޑިޔާރު ފައިސަލެވެ.