ލުއިކުރި ޓެކްސްގައި ތާށިވެފައި، ވަރުގަދަ ފިޔަވަޅުތަކެއް އަޅަނީ

ކޮވިޑްގެ ބަލިމަޑުކަމުގެ ތެރޭ ޓެކްސް ޕޭޔަރުންނަށް ދިން ލުއިތައް އޭރުގެ ހާލަތަށް މުހިންމެވެ. އެކަމަކު ދެ އަހަރެއްހާ ދުވަސް ފަހުން، ހާލަތު ބަދަލުވި އިރު ތިބީ އެ ލުއިކަމަށް ހޭނިފަ އެވެ. ކުރީގެ އުސޫލުތަކަށް ޓެކްސް ދައްކަން ނުފަށައި އެ ލުއިކަމުގައި ދެމިތިބީ އެވެ.

އޭގެ ފަހުން ޓެކްސް ދެއްކުމަށް ދޭ ސަމާލުކަން ވެސް ކުޑަވެ ޓެކްސް އިދާރާ މީރާއަށް މިހާރު އެއީ މިވަގުތު އޮތް އެންމެ ބޮޑު އެއް ގޮންޖެހުމެވެ. އެކަން ހައްލުކުރުމަށް، މިދިޔަ ތިން މަހުގެ ނިޔަލަށް މީރާ އިން ވަނީ ޓެކްސް ނުދައްކާ ފަރާތްކަށް 67،000 އަށް ވުރެ ގިނަ "ރިމައިންޑާ" އަދި ނޯޓިސް ފޮނުވައިފަ އެވެ.

އާ ކޮމިޝަނާ ޖެނެރަލް އޮފް ޓެކްސޭޝަން ހަސަން ޒަރީރު މަގާމާ ހަވާލުވެ ވަޑައިގަތްއިރު، ޓެކްސްތައް ނުދައްކާ އަދަދުތައް އިތުރުވެ، އެކަން އޮތީ ބޮއްސުންލައިފަ އެވެ. އެހެންވެ، އެންމެ ބޮޑު އިސްކަމެއް އޭނާ މިވަގުތު ދެއްވަނީ، އެކަމަށް އަވަސް ހައްލުތަކެއް ހޯދައި، ދައުލަތަށް ނުލިބި ހުރި ފައިސާ ފަސޭހައިން ހޯދޭނެ ގޮތެއް ފަހިކުރުމަށެވެ.

"މިހާރު" އަށް ދެއްވި ހާއްސަ އިންޓަވިއުގައި ޒަރީރު ވިދާޅުވީ، ޓެކްސް ނުދައްކާ އެންމެ ބޮޑެތި 80 ކުންފުންޏާ އޭނާ މިހާރު ބައްދަލުކުރައްވައި، ނުދެއްކޭ ސަބަބުތައް އޮޅުން ފިލުވާފައިވާ ކަމަށެވެ.

"އެބޭފުޅުންގެ [ޓެކްސް ނުދައްކާ ބޮޑެތި ކުންފުނިތައް] އިސްފަރާތްތަކާ ބައްދަލުކުރީމާ އެކަން އެބަ އެޕްރިޝިއޭޓު ކުރައްވާ. މީރާ އިން އިސްނަގައިގެން ބައްދަލުކުރީމާ އެ ބޭފުޅުން އެބަ ކޮމިޓްމެންޓް ދެއްވާ، އެ ފައިސާ ދައްކަވާނެ ކަމަށް،" އޭނާ ވިދާޅުވި އެވެ.

ޓެކްސް ނުދެއްކުން އިތުރުވީ ވޭތުވެދިޔަ ދެ އަހަރު ތެރޭ

މީރާގެ ހިސާބުތަކުން އެންމެ ބޮޑަށް ސާފުވާ އެއް ކަމަކީ، ވޭތުވެދިޔަ ދެ އަހަރު ތެރޭ ކުރިއަށް ވުރެ އިތުރަށް ވެސް ކުންފުނިތަކުން ޓެކްސްއަށް ފަރުވާކުޑަކޮށްފައި އޮތް ކަމެވެ.

ޒަރީރު ވިދާޅުވީ، މީގެ ފަސް އަހަރު ކުރީގެ ހުރި ޓެކްސް ނުދައްކާ އަދަދުތައް ވަރަށް މަދު ކަމަށާއި، ބޮޑަށް އުޅެނީ މިދިޔަ ދެ އަހަރު އިތުރުވި އަދަދުތައް ކަމަށެވެ. އޭނާ ވިދާޅުވީ، ފަސް އަހަރު ކުރީގެ އަދަދު ބިލިއަނަކަށް ވެސް ނާރާނެ ކަމަށެވެ.

"ތިން އަހަރާއި ފަސް އަހަރުގައި ވެސް ޓެކްސްގެ ފައިސާއިން ނުލިބި އުޅެނީ އެއް ބިލިއަނެއްހާ ރުފިޔާ. ޓެކްސް ފައިސާ އަޅުގަނޑުމެން ބެލީ ހަތް ބިލިއަން ވަރު ނުލިބި ހުރި ކަމަށް. ބޮޑު ބައެއް މިއުޅެނީ، ހަތަރު ބިލިއަން ވަރު މިއުޅެނީ ދެ އަހަރުގެ ތެރޭގައި،" އޭނާ ވިދާޅުވި އެވެ.

ޓެކްސް ނުދައްކާ ވިޔަފާރިތައް ދެ އަހަރުގެ ތެރޭގައި އެހާ ބޮޑަށް އިތުރުވީ، ކޮވިޑާ ހެދި ލިބުނު ލުއިތަކާ ހެދި ޓެކްސް ދެއްކުމުގެ މުހިއްމުކަން ކެނޑުމުން ކަމަށް ޒަރީރު ވިދާޅުވި އެވެ.

"ގަވައިދަށް ދައްކަން ޖެހޭ އޮބްލިގޭޝަން [ޒިންމާ] އަށް ދޭން ޖެހޭ މުހިއްމުކަން ގެއްލުނީ. އެހެންވީމަ އަޅުގަނޑުމެން އައިސް މީހުންނަށް މިކަން ހަނދާންކޮށްދިނުމުގެ ބައި އިތުރު ކުރިން،" އޭނާ ވިދާޅުވި އެވެ.

މީރާ އިން މިހާރު ޓެކްސް ދައްކަން ޖެހޭ ސުންގަޑީގެ ތިން ދުވަސް ކުރިން ޓެކްސް ދައްކަން ޖެހޭ ފަރާތްތަކަށް އެކަން އަންގަ އެވެ. އަދި ޓެކްސް ދައްކަން ޖެހޭ ދުވަހު ވެސް އެކަމުގެ ނޯޓިސް ފޮނުވަ އެވެ. އަދި ސުންގަޑި ހަމަވުމުން އަނެއްކާ ވެސް އިތުރު 30 ދުވަހުގެ ނޯޓިސްއެއް ޓެކްސް ނުދައްކާ ފަރާތްތަކަށް ފޮނުވަ އެވެ.

"ފަންސާސް ދެ ހާސް އެސްއެމްއެސް ރިމައިޑާގެ ގޮތުގައި ފޮނުވިފައިވާނެ. ނުވަ ސަތޭކަ މީހުންނަށް ގުޅައިގެން، ޓެކްސް ދައްކަން އެންގިފައިވާނެ. އެންމެ ފުރަތަމަ އަޅުގަނޑުމެން މި މަސައްކަތް ކުރަނީ މީހުންނަށް ހަނދާން ކޮށްދީ، ޓެކްސްގެ ޒިންމާތައް ހުރިކަން އަންގައިދިނުން. ޓެކްސްއަށް ކޮމްޕްލައި ކުރަން ޖެހޭކަން. ކޮމްޕްލައި ނުކޮށްފިއްޔާ ފިޔަވަޅުތައް އަޅާނެ ކަން،" އޭނާ ވިދާޅުވި އެވެ.

މީރާއިން އާންމުކޮށް ދެ ފަހަރު ނޯޓިސް ދިނުމަށް ފަހު ފިޔަވަޅުތައް އަޅަ އެވެ. ނަން ހާމަކުރުމާއި އެކައުންޓުތައް ފްރީޒް ކުރުމުގެ މަސައްކަތްތައް ވެސް ކުރި އެވެ.

ޓެކްސް ބަޔާން ހުށަހަޅަން އިސްކަމެއް ނުދޭ

މީރާއަށް ޓެކްސް ބަޔާން ހުށަނޭޅުމުގެ އެއް އުޒުރެއްގެ ގޮތުގައި ކުންފުނިތަކުން ދައްކަނީ ކުންފުނީގެ އޮޑިޓްގެ މަސައްކަތް ލަސްވުމެވެ. ނަމަވެސް، މިދިޔަ އަހަރު އިންކަމް ޓެކްސް ދެއްކުމަށް މި އަހަރުގެ ފުރަތަމަ ހަ މަހާ ހަމައަށް މުއްދަތެއް ކުންފުނިތަކަށް ލިބެ އެވެ.

"އާންމުކޮށް ތިން މަސް ތެރޭގައި އޮޑިޓެއް ވެސް ކުރެވެން ޖެހޭނެ. ޑެޑްލައިން [ޖޫން] ގެ ފަހުން ފެއްޓި ނަމަވެސް މިހާރު ނިމިފައި ހުންނަން ޖެހޭނީ. އެވަރުން ވެސް އޮޑިޓުތައް ނުނިންމީމާ އަޅުގަނޑުމެން ނަން އާންމުކުރަން ޖެހުނީ،" ޒަރީރު ވިދާޅުވި އެވެ.

މިދިޔަ ހަފްތާގައި މީރާ އިން ވަނީ އިންކަމް ޓެކްސް ބަޔާން ހުށަނާޅާ 42 ކުންފުންޏެއްގެ ނަން އާންމުކޮށްފަ އެވެ. އެ ކުންފުނިތަކުގެ ތެރޭގައި ރާއްޖޭގެ ރިސޯޓު ހިންގާ ކުންފުނިތަކާއި ރީޓެއިލް ވިޔަފާރިކުރާ ކުންފުނިތަކާއި ސައިކަލް ވިއްކާ ކުންފުނިތަކުގެ އިތުރުން ކޮންސްޓްރަކްޝަން ދާއިރާގެ ނަން މަޝްހޫރު ކުންފުނިތައް ހިމެނެ އެވެ.

ޓެކްސް ބަޔާން ހުށަނޭޅުމުން، ކުންފުނިތަކުން އަސްލު ދައްކަން ޖެހޭ ޓެކްސްގެ އަދަދުތަކެއް ވެސް ސާފެއް ނުވާނެ އެވެ. އެހެންވެ، މީރާއިން އަންނަނީ އެފަދަ ކުންފުނިތައް އޮޑިޓް ކުރުމުގެ މަސައްކަތް ވެސް ކުރަމުންނެވެ. މިއަހަރުގެ ދެ ވަނަ ކުއާޓަރުގައި ވެސް މީރާ އިން ވަނީ އެކި ޓެކްސްތަކުގެ ބަޔާން ހުށަނާޅާތީ 83 ކުންފުންޏެއްގެ އޮޑިޓް ކޮށްފަ އެވެ. އޭގެ ތެރޭގައި އިންކަމް ޓެކްސް ބަޔާން ހުށަނޭޅި 37 ކުންފުންޏަކާއި ޓީޖީއެސްޓީ ބަޔާން ހުށަނޭޅި 17 ކުންފުންޏެއް ވެސް ހިމެނެ އެވެ.

ޒަރީރު ވިދާޅުވީ، އެހާ ގިނަ ކުންފުނިތަކުން ބަޔާން ހުށަނާޅާ ހުންނާތީ، އެ ހުރިހާ ކުންފުނިތަކެއް އެއްފަހަރާ އޮޑިޓް ކުރުމުގެ ގާބިލުކަން މީރާގައި ނެތް ކަމަށެވެ. އެކަމަކު މަޑުމަޑުން އޮޑިޓް ކޮށް، ކުންފުނީގެ ކެޕޭސިޓީ އިތުރު ކުރުމަށް ވެސް އިސްކަން ދެއްވާ ކަމަށް އޭނާ ވިދާޅުވި އެވެ.

އޭނާ ވިދާޅުވީ، ނަން ހާމަކޮށްގެން ވެސް ޓެކްސް ފައިލް ނުކުރާ ނަމަ، ކުންފުނިތަކުގެ އެކައުންޓުތައް ވެސް ފްރީޒް ކުރާނެ ކަމަށެވެ.

"މިހާރު އަޅުގަނޑުމެން ހަމަ އެބޭފުޅުން ކޮމްޕްލައި ވަންދެން ސްޓެޕް ބައި ސްޓެޕް ހުރިހާ އެކްޝަންތަކެއް ނަގަމުންދާނީ،" އޭނާ ވިދާޅުވި އެވެ.

މީރާ އިން މިވަގުތު ވެސް ކުންފުނިތައް އޮޑިޓް ކުރަނީ ކުންފުނިތައް ހަތަރު ކެޓަގަރީއަކަށް ބަހާލައިގެންނެވެ. އެކަމަށް ހާއްސަ ހަތަރު ޓީމެއް ވެސް މީރާގައި އޮވެ އެވެ. އެއީ އެންމެ ބޮޑެތި ކުންފުނިތައް، މެދުފަންތީގެ ކުންފުނިތައް އަދި އެންމެ ކުދި ކުންފުނިތަކަށް ހާއްސަކޮށެވެ.

ޓެކްސް ނުދައްކާ ނަމަ އެހެން ހިދުމަތްތައް ނުލިބޭ ގޮތް އަލުން ހަދަނީ

ޓެކްސް ނުދައްކާ ފަރާތްތަކަށް ވަރަށް ހަރުކަށި ފިޔަވަޅުތައް އެޅުމުގެ ބާރު ޓެކްސް ގާނޫނު ވުޖޫދުވުމާ އެކު މީރާއަށް ލިބިފައިވެ އެވެ. ވަކި ވަރަކަށް ޓެކްސް ނުދައްކާ ނަމަ، އިމްޕޯޓު ކުރާ މުދާ ކްލިއާކޮށް ނުދިނުމާއި އެ ތަނެއް ހިންގުމުގެ ހުއްދަތައް ހިފެހެއްޓުމާއި އެނޫން ކަންކަން ވެސް ހުރެ އެވެ.

އެކަމަކު އެ އުސޫލު ލުއިކުރީ 2019 ވަނަ އަހަރު ހިސާބުން ފެށިގެންނެވެ. ޒަރީރު ވިދާޅުވީ، އެފަދަ ފިޔަވަޅުތައް ވަރަށް އަވަހަށް ފަށާނެ ކަމަށެވެ.

"އަޅުގަނޑުމެން އެ ވާހަކަ އެބަ ދައްކަން ފިނޭންސް މިނިސްޓްރީއާ އެކު ވެސް. އަދި އެހެން އިދާރާތަކާ އެކު ވެސް. އެކަން އަލުން ފައްޓަން،" އޭނާ ވިދާޅުވި އެވެ.

ކޮވިޑާ ގުޅިގެން މީރާ އިން ދެ އަހަރު ފިޔަވަޅެއް ނާޅައި ދިޔަ އެވެ. އެކަމަކު ފަހުން ފިޔަވަޅުތައް އެޅި އިރު ވެސް އެހެން އިދާރާތަކުން އޭރު ޓެކްސް ކްލިއަރެންސަށް އެހާ ބޮޑަކަށް ނުބަލަ އެވެ. އެހެންވެ، ޓެކްސް ނުދައްކާ ފަރާތްތަކަށް ވެސް އެކަމުން ރެކެން ފަސޭހަވީ އެވެ.

ޒަރީރު ފާހަގަކުރެއްވި އެއް ކަމަކީ، ޓެކްސް ނުދައްކާ ފަރާތްތަކަށް ތަކުރާރުކޮށް ނޯޓިސް ފޮނުވާތީ އެ ފަރާތްތަކުން ކަންބޮޑުވާކަން ވެސް ފާހަގަކުރެވޭ ކަމަށެވެ. މިދިޔަ މަހު ތެރޭގައި ވެސް ޓެކްސް އިންސްޓޯލްމެންޓަށް ބަހާލައިގެން ދައްކަން 400 އަށް ވުރެ ފަރާތުން ހުށަހަޅާފައިވާ ކަމަށް އޭނާ ވިދާޅުވި އެވެ.

މިވަގުތު ވެސް ޓެކްސް ނުދައްކާ އަދަދު 10 ބިލިއަންނަށް ވުރެ ބޮޑެވެ. އެކަން ކުރުމަށް ފެށި މަސައްކަތުން ވޭތުވެދިޔަ ތިން މަހު ވެސް 600 މިލިއަނެއްހާ ރުފިޔާ ހޯދިފައިވެ އެވެ.

އާ ޓެކްސް ކޮމިޝަނަރު، ޒަރީރު މަސައްކަތްކުރަނީ ޓެކްސް ދެއްކުމަށް ރަޖިސްޓާ ވެފައިވާ 72،000 އަށް ވުރެ ގިނަ ފަރާތްތަކުން ޓެކްސް ނުދައްކާ ހުރި ސަބަބުތައް އޮޅުން ފިލުވައި، އެ ވިޔަފާރިތަކަށް ޓެކްސް ނުދައްކާ ފަސޭހަކޮށްލުމުގެ ސަގާފަތުން ދުރުކުރެވޭނެ ގޮތްތަކެއް ހޯދުމަށެވެ. އޭނާ ދެއްވި ޔަގީން ކަމަކީ ޓެކްސް ފިޔަވަޅުތައް އަޅާނީ އުސޫލުގެ ތެރެއިން، ވަކި ކުންފުންޏަކަށް ބެލުމެއް ނެތި ކަމަށެވެ. ކުރިއަށް އޮތްތަނުގައި ވެސް، ހޯދަންޖެހޭ ފައިސާ ވީ އެންމެ އަވަހަކަށް ހޯދޭނެ ގޮތްތަކެއް ފަހިކުރުމަށް އެ އިދާރާއިން އުސޫލުތައް ބަދަލުކުރަން ވަނީ ފަށައިފަ އެވެ.