ދުނިޔޭގެ އެންމެ ބޮޑު ޝިޕިން ކުންފުނީގެ ބޯޓެއް ފުރަތަމަ ފަހަރަށް ރާއްޖެއަށް

ދުނިޔޭގެ އެންމެ ބޮޑު ޝިޕިން ކުންފުނި ކަމަށްވާ މެޑިޓެރޭނިއަން ޝިޕިން ކޮމްޕެނީ (އެމްއެސްސީ) ގެ ބޯޓެއް ފުރަތަމަ ފަހަރަށް ރާއްޖެ އަތުވެއްޖެ އެވެ.

އެމްޕީއެލްގެ ސީއީއޯ މުހައްމަދު ވަޖީހު އިބްރާހިމް ވިދާޅުވީ ރާއްޖެއަށް އައި އެމްއެސްސީގެ ބޯޓުން 800 ކޮންޓެއިނާ ގެނައި ކަމަށެވެ. އެބޯޓުން ގެނައީ ޖެނެރަލް ކާގޯ އެވެ. އެ ބޯޓާ އެކު ރާއްޖެއަށް މުދާ ގެންނަ މިންވަރު ވަރަށް ބޮޑަށް އިތުރުވެ، ކޮންޓެއިނާ ބޯޓުތަކުގެ ހިދުމަތް ފުޅާ ކުރެވޭނެ ކަމަށް އޭނާ ވިދާޅުވި އެވެ.

އެ ބޯޓު މިއަދު ވަނީ މާލޭގައި ބަނދަރު ކޮށްފަ އެވެ. މިއީ އެމްއެސްސީގެ ބޯޓެއް ރާއްޖެ އައި ފުރަތަމަ ފަހަރެވެ.

އެމްއެސްސީގެ އެ ބޯޓު އައުމާ ގުޅިގެން މަރުހަބާ ކިޔުމަށް ހާއްސަ ރަސްމިއްޔާތެއް މާދަމާ ބޭއްވުމަށް އެމްޕީއެލް އިން ވަނީ ނިންމައިފަ އެވެ.

އިޓަލީގެ ރައްޔިތެއް ކަމުގައިވާ ޖިއަންލުއިޖީ އެޕަންޓޭގެ އެމްއެސްސީ ޝިޕިން ލައިން އުފެއްދީ 1970 ވަނަ އަހަރު އެވެ. އެކުންފުނީގެ ހެޑްކުއާޓާ ހުންނަނީ ސްވިޒަލެންޑުގަ އެވެ. އެއީ ދުނިޔޭގެ އެންމެ ބޮޑު ޝިޕިން ފްލީޓު އޮތް ކުންފުންޏެވެ. ދުނިޔޭގައި ބޭނުންކުރާ ޝިޕިންލައިން ބޯޓުތަކުގެ ކޮންޓެއިނާ ކެޕޭސިޓީގެ 20 ޕަސެންޓު ނިސްބަތް ވަނީ އެ ކުންފުންޏަށެވެ.