ފަސް އަހަރު ތެރޭގައި 106 މިލިއަން ރުފިޔާގެ ވޭޕްގެ ބާވަތްތައް އެތެރެކުރި

މިދިޔަ ފަސް އަހަރު ތެރޭ ރާއްޖެއަށް އެތެރެކުރި ވޭޕް އާއި އިލެކްޓްރޯނިކް ސިނގިރޭޓް (އީ-ސިނގިރޭޓް)ގެ ބާވަތްތަކުގެ އަގު 106 މިލިއަން ރުފިޔާއަށް އަރާ ކަމަށް ކަސްޓަމްސްގެ ތަފާސްހިސާބުން ދައްކައިފި އެވެ.

މައުލޫމާތު ހޯދައި ލިބިގަތުމުގެ ހައްގުގެ ގާނޫނުގެ ދަށުން "މިހާރު" އިން ކަސްޓަމްސްގައި ހޯދަން އެދުނީ 2019 ވަނަ އަހަރުން ފެށިގެން މިދިޔަ އަހަރުގެ ނިޔަލަށް ރާއްޖެއަށް އެތެރެކުރި ވޭޕް އާއި އޭގެ ބާވަތްތަކުގެ އަދަދެވެ.

ކަސްޓަމުން އިއްޔެ ހިއްސާކުރި މައުލޫމާތުގައިވާ ގޮތުން މިދިޔަ ފަސް އަހަރު ރާއްޖެއަށް ވޭޕް އާއި އީ ސިނގިރޭޓްގެ ގޮތުގައި ބޭނުންކުރާ ބާވަތްތަކުގެ ނުވަ ވައްތަރެއްގެ އެތެރެ ކޮށްފައިވެ އެވެ. އަދި އެ ތަކެތީގެ އަގު 106.7 މިލިއަން ރުފިޔާއަށް އަރާ ކަމަށް ކަސްޓަމްސުން އެ ހިސާބުތަކުން ދައްކަ އެވެ.

އެ މުއްދަތުގައި 607،829 ވޭޕް ޑިވައިސް ރާއްޖެއަށް އެތެރެ ކޮށްފައިވާ ކަމަށް ކަސްޓަމްސުން ބުންޏެވެ.

ރާއްޖެ އެތެރެކުރި ވޭޕް އާއި އީސިނގިރޭޓްގެ އަދަދުތައް

2019ގައި ރާއްޖެ އެތެރެކުރި ބާވަތްތައް:

- ނިކޮޓިން ކާޓްރިޖް: 48،511

- އީސިނގިރޭޓާއި ވޭޕް ކުރާ ޑިވައިސް: 11،857

2020 ގައި އެތެރެކުރި ބާވަތްތައް:

- ނިކޮޓިން ކާޓްރިޖް: 147،191

- ނިކޮޓިން ކާޓްރިޖާއި އެގޮތަށް ބޭނުންކުރާ ވޭޕާއި އީސިނގިރޭޓް: 1،215،341

- އީސިނގިރޭޓާއި ވޭޕް ކުރާ ޑިވައިސް: 95،737

2021ގައި އެތެރެކުރި ބާވަތްތައް:

- ނިކޮޓިން ކާޓްރިޖާއި އެގޮތަށް ބޭނުންކުރާ ވޭޕާއި އީސިނގިރޭޓް: 67،333.516

- އީސިނގިރޭޓާއި ވޭޕް ކުރާ ޑިވައިސް: 138،709

2022ގައި އެތެރެކުރި ބާވަތްތައް:

- ދުންފަތް އެކުލެވޭ އިލެކްޓްރޯނިކް ވޭޕާއި ސިނގިރޭޓުގެ ބާވަތްތައް: 55،346.301

- ނިކޮޓިން އެކުލެވޭ އިލެކްޓްރޯނިކް ވޭޕާއި ސިނގިރޭޓުގެ ބާވަތްތައް: 3،636.963

- ދުންފަތުގެ އިތުރުން ބޭނުންކުރާ އިލެކްޓްރޯނިކް ބާވަތްތައް: 3،306.103

- ނިކޮޓިން އެކުލެވޭ (މިސާލު: ޝީޝާ، ސުއްޓާފަދަ) އިތުރު ބާވަތްތައް: 21.45

- ނިކޮޓިން ކާޓްރިޖާއި އެގޮތަށް ބޭނުންކުރާ ވޭޕާއި އީސިނގިރޭޓް: 44.3

- އީސިނގިރޭޓާއި ވޭޕް ކުރާ ޑިވައިސް: 220،881

2023ގައި އެތެރެކުރި ބާވަތްތައް:

- ދުންފަތް އެކުލެވޭ އިލެކްޓްރޯނިކް ވޭޕާއި ސިނގިރޭޓުގެ ބާވަތްތައް: 4،760

- ނިކޮޓިން އެކުލެވޭ (މިސާލު: ޝީޝާ، ސުއްޓާފަދަ) އިތުރު ބާވަތްތައް: 1،929

- ނިކޮޓިން އެކުލެވޭ އިލެކްޓްރޯނިކް ވޭޕާއި ސިނގިރޭޓުގެ ބާވަތްތައް: 1،269

- ހަށިގަނޑަށް ނިކޮޓިން އެތެރެކުރަން ބޭނުންކުރާ ބާވަތްތައް: 831

- އީސިނގިރޭޓާއި ވޭޕް ކުރާ ޑިވައިސް: 140،645

ރާއްޖެ އަށް ވޭޕް އެތެރެކުރުން މަނާކޮށްދިނުމަށް އެދި ރާއްޖޭގެ ވަރަށް ގިނަ ޖަމިއްޔާތަކުން ވަނީ ގޮވާލައިފަ އެވެ. އެގޮތުން ޑޮކްޓަރުންނާއި ނަރުހުންގެ ޖަމިއްޔާ އަދި ގައުމީ ކުޅިވަރު ޖަމިއްޔާތަކުންނާއި ބެލެނިވެރިން ވެސް ވަނީ ރައީސަށް ޕެޓިޝަނެއް ހުށަހަޅައިފަ އެވެ.