ތިނަދޫގައި ގޯތި ލާޖެއްސުމުގެ އުސޫލަށް ހަރުކަށި ބަދަލެއް

ގދ. ތިނަދޫގައި ގޯތި ލާޖެއްސުމުގައި ބޮޑެތި މައްސަލަތައް ކުރިމަތިވާތީ، އެކަމަށް ހައްލެއް ގެނައުމަށްޓަކައި އުސޫލަށް ހަރުކަށި ބަދަލުތަކެއް ގެނެސްފި އެވެ.

ތިނަދޫ ސިޓީ ކައުންސިލުން މިދިޔަ ބުރާސްފަތި ދުވަހު ކުރި އިއުލާނެއްގައި ބުނީ، އެ އުސޫލު މިހާރު އޮތް ގޮތުން ލާޖެއްސުމަށް އެދި ހުށަހަޅާ ހުށަހެޅުމާ އެއްގޮތަށް ލާޖައްސައި ބިމުގެ ރަޖިސްޓްރީއަށް ބަދަލު ގެނައުމަކީ ފަހުން އެކަމުގައި ގޯތީގެ ހައްގުވެރިންގެ މެދުގައި މަސްލަހަތު ގެއްލި އިޔާދަ ނުކުރެވޭ ވަރުގެ ގެއްލުންތަކާ ކުރިމަތިލާން ޖެހިދާނެ ކަމެއް ކަމަށެވެ.

އެ ކަހަލަ ޝަކުވާތައް ގޯތީގެ ހައްގުވެރިންގެ ފަރާތުން ކައުންސިލަށް ހުށަހަޅާތީ، ލާޖެއްސުމުގެ އުސޫލެއް ކަނޑައެޅުމަކީ މުހިންމު ކަމެއް ކަމަށް ކައުންސިލްގެ މެމްބަރުންގެ މެދުގައި އެއްބަސްވެ، "ތިނަދޫ ސިޓީން ދޫކޮށްފައިވާ ބަންޑާރަގޯތި ލާޖެއްސުމަށް އެކުލަވާލެވިފައިވާ އުސޫލު"ގެ ނަމުގައި މިހާރު އުސޫލެއް ހަދާފައިވާ ކަމަށް އެ އިއުލާނުގައި ބުންޏެވެ.

ތިނަދޫ ސިޓީ ކައުންސިލުން މިދިޔަ އޮގަސްޓް މަހުގެ 28 ވަނަ ދުވަހު ބޭއްވި ރަސްމީ ބައްދަލުވުމުގައި ވަނީ އެ އުސޫލު ފާސްކޮށްފަ އެވެ.

އެ އުސޫލުގައި ބުނެފައިވާ ގޮތުން، އެ ރަށުގައި ދެން ލާޖެއްސޭނީ ބަންޑާރަ ގޯއްޗަކާއި ބަންޑާރަ ގޯއްޗެއް ނުވަތަ އަމިއްލަ ގޯއްޗަކާއި އަމިއްލަ ގޯއްޗަކަށް އެކަންޏެވެ. އަދި ބަންޑާރަ ގޯއްޗަކާއި އަމިއްލަ ގޯއްޗެއް ލާނުޖެއްސޭނެ އެވެ.

މީގެ ކުރިން އޮންނަނީ ބަންޑާރަ ގޯއްޗާއި އަމިއްލަ ގޯތި ވެސް ލާޖެއްސޭނެ ގޮތަށެވެ. ބިމުގެ ވަކި ސައިޒަކަށް ވެސް ނުބަލަ އެވެ.

ލާޖެއްސުމުގެ އުސޫލު

• ލާޖެއްސޭނީ ބަންޑާރަ ގޯއްޗަކާއި ބަންޑާރަ ގޯއްޗެއް ނުވަތަ އަމިއްލަ ގޯއްޗަކާއި އަމިއްލަ ގޯއްޗެއް ކަމުގައިވުން.

• ލާޖައްސާ ދެ ގޯއްޗަކީ ސައިޒުގެ ގޮތުން އެއްވަރު ދެ ގޯތި ކަމުގައިވުން.

• އިމާރާތާއި ގޯތީގެ ރަޖިސްޓްރީ ހައްދާފައިވާ ގޯއްޗަކާއި އިމާރާތާއި ގޯތީގެ ރަޖިސްޓްރީ ހައްދާފައިނުވާ ގޯއްޗެއް ލާނުޖެއްސޭނެ.

• ގޯއްޗަކުން ބައެއް ކިތަންމެ ކުޑަ ނުވަތަ ބޮޑު ވިޔަސް، ގޯތި ބައިކޮށް ބައިބަޔަށް ރަޖިސްޓްރީ ހައްދާފައިނުވާ ނަމަ ލާނުޖެއްސޭނެ.

• ލާޖައްސަނީ ދެ ސައިޒްގެ ގޯތި ކަމުގައިވާ ނަމަ، އެ ހާލަތުގައި ސައިޒުން ބޮޑު ގޯތި ސައިޒުން ކުޑަ ގޯތީގެ އަކަފޫޓާ އެއްވަރަށް ހަމަހަމަކުރުމަށްޓަކައި ގޯތި ބައިކޮށް ވަކި ރަޖިސްޓްރީއެއް ހެއްދުން.

• ލާޖައްސަނީ ދެ ސައިޒުގެ ގޯތި ކަމަށް ވާ ނަމަ، އެ ހާލަތުގައި ލާޖައްސާ ދެ ގޯތީގެ ސައިޒު އެއްހަމަކުރުމަށްޓަކައި ސައިޒުން ބޮޑު ގޯތި ބައިކޮށް ވަކި ބައެއްގެ ގޮތުގައި ރަޖިސްޓްރީ ހެއްދުމަށް ފަހުގައި، ލާޖެއްސުން އަދި ބާކީ އޮތްބައި އަމިއްލަ ކުރުމަށް ފަހު ވަކި ރަޖިސްޓަރީއެއް ހަދައި ވިއްކާ ބައެއްގެ ގޮތުގައި ހަމަޖެއްސިދާނެ.

• ލާޖެއްސުމަށް ފަހު، ރަޖިސްޓަރީ ހެއްދުމުގެ ފީގެ ގޮތުގައި 5،000ރ. ދައްކަން ޖެހޭނެ.

އިމާރާތާއި ގޯތީގެ ރަޖިސްޓްރީ ހައްދާފައިވާ ގޯއްޗަކާއި އިމާރާތާއި ގޯތީގެ ރަޖިސްޓްރީ ހައްދާފައި ނުވާ ގޯއްޗެއް ލާނުޖެއްސޭނެ ސަބަބެއް ކަމަށް އެ އުސޫލުގައި ބުނެފައި ވަނީ އިމާރާތެއް ނެތް ބިމަކަށް މީހުންގެ ރަޖިސްޓްރީ ބަދަލު ނުކުރެވޭނެތީ ކަމަށެވެ. މީހުން ރަޖިސްޓްރީ ވެފައި ވާނީ އިމާރާތާއި ގޯތީގެ ރަޖިސްޓްރީ ހެއްދިފައިވާ ގެތަކުގައި ކަމަށް އެ އުސޫލުގައިވެ އެވެ.

ތިނަދޫގެ މޭޔަރު ސައުދު އަލީ މިއަދު "މިހާރު" އަށް ވިދާޅުވީ މި އުސޫލު ހަދަން ޖެހުނީ ލާޖެއްސުމުގައި ގާނޫނީ ގޮތުން ހުންނަ ބައެއް ބާގަނޑުތަކުގެ ނާޖާއިޒު ފައިދާ ބައެއް މީހުން ނެގުމުން އަނެއް ބައި މީހުންގެ ހައްގުތައް ގެއްލިގެން ދާތީ ކަމަށެވެ. އެހެންވެ، ރަނގަޅު އުސޫލުތަކެއް ހެދިފައި ނެތް ނަމަ، ކުރިއަށް އޮތް ތަނުގައި ވަރަށް ބޮޑެތި މައްސަލަތަކެއް ކުރިމަތިވެދާނެ ކަމަށް ސިޓީ ކައުންސިލަށް ގަބޫލުކުރެވުނު ކަމަށް އޭނާ ވިދާޅުވި އެވެ.

"ކައުންސިލުން މިހާރު ޔުނިފޯމިޓީއެއް މި އެކުލަވާލީ. ހެދިފައި ހުރި ގާނޫނުތަކުގެ އެލައިންމަންޓެއް މި ނެރުނީ،" ސައުދު ވިދާޅުވި އެވެ.

"އަޅުގަނޑުމެންގެ މި އުސޫލަށް އިތުރު އިސްލާހުތަކެއް ގެންނަ ކަމަށް ވަންޏާ، އެކަން ވެސް ކުރެވޭނެ ގޮތަށް އުސޫލު ހެދީ."

ސިޓީ ކައުންސިލުން މިހާރު އެކުލަވާލާފައި އޮތް އުސޫލަކީ ވަރަށް ބޮޑަށް ދިރާސާކޮށް، ކައުންސިލްގެ ލީގަލް ޓީމުގެ ލަފަޔާއި އިރުޝާދުގެ ދަށުން ހެދި އުސޫލެއް ކަމަށް ވެސް ސައުދު ވިދާޅުވި އެވެ.

ދެކުނުގައި އާބާދީ އެންމެ ބޮޑު އެއް ރަށް ކަމަށްވާ ތިނަދޫން ދިރިއުޅުމަށްޓަކައި 200 ގޯތި ދޫކުރަން ނިންމައި، މިދިޔަ މަހު ވަނީ ގުރު ވެސް ނަގައިފަ އެވެ.