ސައޫދީގެ ސަފީރު ކަމަށް ސަރީރު އައްޔަން ކުރަނީ

ރާއްޖެ އިން ސައޫދީ އަރަބިއްޔާ އަށް ކަނޑައަޅާ އާ ސަފީރަކަށް ކުރީގެ ފޮރިން ސެކްރެޓަރީ އަހުމަދު ސަރީރު އައްޔަން ކުރުމަށްޓަކައި ރައްޔިތުންގެ މަޖިލިހުގެ ރުހުން ހޯދަން ރައީސް ޑރ. މުހައްމަދު މުއިއްޒު ފޮނުއްވައިފި އެވެ.

މަޖިލިހުގެ މިއަދުގެ ޖަލްސާގައި ވަނީ ސަރީރާ ގުޅޭ ކަންކަން ދިރާސާ ކުރަން ހާރިޖީ ހިދުމަތްތަކާ ބެހޭ ކޮމިޓީ އަށް ފޮނުވައިފަ އެވެ.

ސަރީރު މިހާތަނަށް ހުންނެވީ ފޮރިން މިނިސްޓްރީގެ އެމްބެސެޑާ އެޓް ލާޖުގެ މަގާމުގަ އެވެ.

އޭގެ ކުރިން އޭނާ ހުންނެވީ އޮގަނައިޒޭޝަން އޮފް އިސްލާމިކް ކޯޕަރޭޝަން (އޯއައިސީ)ގެ އޭޝިއާ ޑިރެކްޓަރެއްގެ ގޮތުގައި ސައުދީގަ އެވެ. އެނބުރި ރާއްޖެ ވަޑައިގަތީ އެ މަގާމުގެ ދައުރު ހަމަވުމުންނެވެ.

ސަރީރު ވަނީ ރައީސް އަބްދުﷲ ޔާމީންގެ ވެރިކަމުގައި ފޮރިން ސެކެޓަރީގެ މަގާމު ފުރުއްވައިފަ އެވެ. އޭގެ ކުރިން ހުންނެވީ އދ. ގައި ހުންނަވާ ރާއްޖޭގެ ދާއިމީ މަންދޫބުގެ މަގާމުގަ އެވެ. އެއީ ޑިސެމްބަރު 10، 2012 އިން ފެށިގެންނެވެ.

ރާއްޖެ އިން އެމެރިކާ އަށް ކަނޑައަޅާފައި ހުންނަވާ ސަފީރުގެ މަގާމު ވެސް އޭނާ އެ ދުވަސްކޮޅު ވަނީ ފުރުއްވައިފަ އެވެ.

ސަރީރު ވަނީ 1986 ވަނަ އަހަރުން ފެށިގެން ރާއްޖޭގެ ޚާރިޖީ ދާއިރާގެ އެކި މަގާތަކުގަ އާއި ރާއްޖޭގެ ޑިޕްލޮމެޓިކް މިޝަންތަކުގެ އެކި ފެންވަރުގެ މަގާމުތައް އަދާކުރައްވައިފަ އެވެ.

ބަންގްލަދޭޝްގައި ހުންނަވާ ދިވެހި ސަފީރުގެ މަގާމާއި ސްރީ ލަންކާގައި ހުންނަ ރާއްޖޭގެ ހައި ކޮމިޝަންގެ ތިންވަނަ ސެކްރެޓަރީ ކަމާއި އދ. ގައި ހުންނަ ރާއްޖޭގެ ޕާމަނަންޓް މިޝަންގެ ދެވަނަ ސެކްރެޓަރީ ކަމުގެ މަގާމު އޭނާ ވަނީ އަދާކުރައްވައިފަ އެވެ.

ފޮރިން މިނިސްޓްރީގެ އެސިސްޓެންޓް އަންޑަ ސެކްރެޓަރީ ކަމާއި އެސިސްޓެންޓް ޑިރެކްޓަ، ފޮރިން ރިލޭޝަންސް ކަމާއި ޑެޕިއުޓީ ޑިރެކްޓަރު ކަމާއި ޑިރެކްޓަރު ކަމާއި އެސިސްޓެންޓް ޑިރެކްޓަ ޖެނެރަލް ކަމާއި ޑިރެކްޓަ ޖެނެރަލްގެ މަގާމު ވެސް ސަރީރު ފުރުއްވި އެވެ.

ސައޫދީގައި ހުންނަވާ ރާއްޖޭގެ ސަފީރުގެ މަގާމަށް މީގެ ކުރިން މަޖިލީހުން ވަނީ ނ. ހޮޅުދޫ އުފަންވެލި، ތޯހާ މުހައްމަދުގެ ނަން ވެސް ފާސްކޮށްފަ އެވެ. ނަމަވެސް ފަހުން އޭނާ ވަނީ ޕާކިސްތާނު ސަފީރު ކަމަށް ބަދަލުކޮށްފަ އެވެ.