ގުދުސްގައި ހުންނަ އދ. ގެ އޮފީސް އަތުލަން އިޒްރޭލުން ނިންމުމުން، ރާއްޖެއިން އެކަން ކުށްވެރިކޮށްފި

އިރުމަތީ ގުދުސްގައި ފަލަސްތީނުގެ ރައްޔިތުންނަށް އެހީތެރިވުމަށް ގާއިމްކޮށްފައިވާ އދ. ގެ ރިލީފް އެންޑް ވޯކްސް އެޖެންސީ ފޯ ޕަލަސްޓައިން ރެފިއުޖީސް (އަންރުވާ)ގެ އޮފީސް އަތުލުމަށް އިޒްރޭލުން ނިންމި ނިންމުން ރާއްޖެއިން ކުށްވެރިކޮށްފި އެވެ.

ރާއްޖޭގެ ފޮރިން މިނިސްޓްރީން ނެރުނު ބަޔާނެއްގައި ބުނީ އދ. ގެ އޭޖެންސީތަކާއި އެހީ ދޭ ޖަމާއަތްތައް ހުއްޓުވައި، އެހީތެރިންނަށް ހުރަސް އަޅައި ހަމަލާ ދިނުމަށް އިޒްރޭލުން ހިނގަމުންދާ އަމަލުތަކަކީ ބައިނަލްއަގްވާމީ ގާނޫނާއި އިންސާނިއްޔަތުކަމުގެ ގާނޫނުތަކާ ހިލާފަށް ކުރަމުންދާ އަމަލުތަކެއް ކަމަށެވެ.

މިފަދަ އަމަލުތަކުގެ ސަބަބުން ފަލަސްތީނު ރައްޔިތުންނަށް އަސާސީ ހިދުމަތްތައް ފޯރުކޮށް ދިނުމަށާއި އަސާސީ ހައްގުތައް ލިބިދިނުމަށް ހުރަސް އެޅޭ ކަމަށް އެ ބަޔާނުގައިވެ އެވެ.

މި އުނދަގޫ ހާލަތުގައި ވެސް ފަލަސްތީނު ރައްޔިތުންގެ ފުރާނަ ސަލާމަތް ކުރުމުގެ މަސައްކަތް ކުރުމަށް އަންރުއާ އިން ކުރަމުންދާ މަސައްކަތް ރާއްޖެއިން ބަަލައިގަންނަ ކަމަށް ވެސް ބުނެފައިވެ އެވެ.

އެ ބަޔާނުގައި އިތުރަށް ބުނީ ދިވެހި ރައްޔިތުންނާއި ސަރުކާރު އަބަދުވެސް އޮންނާނީ ފަލަސްތީނުގެ ރައްޔިތުންނާ އެކުގައި ކަމަށެވެ. އަދި ފަލަސްތީނުގެ މައްސަލައަށް ދާއިމީ ހައްލެއް ހޯދަން މަސައްކަތް ކުރަން ބައިނަލްއަގުވާމީ މުޖުތަމައުއަށް ރާއްޖެއިން ގޮވާލާ ގޮވާލުން ވެސް އެ ބަޔާނުގައި ވަނީ ތަކުރާރުކޮށްފަ އެވެ.