ޗައިނާގެ އިގްތިސާދު މަޑުޖެހިފައި، ޔޫރަޕްގެ ގައުމުތައް ކުރިއަށް

ޗައިނާގެ އިގްތިސާދު މަޑުޖެހި، ޔޫރަޕްގެ ގައުމުތަކުގެ އިގްތިސާދު ލަފާކުރި ވަރަށް ވުރެ ކުރިއަށް ޖެހިފައިވާ ކަމަށް ވޯލްޑް ބޭންކުން ބުނެފި އެވެ.

ވޯލްޑް ބޭންކުން ބުނީ، ޗައިނާގެ އިގްތިސާދު މަޑުޖެހުމާ އެކު އެތެރޭގެ ހަރަދުތައް ކުޑަވުމުގެ ފުރުސަތު އެބަ އޮތް ކަމަށެވެ. އެ ގައުމުގެ މަރުކަޒީ ބޭންކުން ވަނީ އެ ގައުމުގެ ރައްޔިތުން ހޭދަކުރާވަރު އިތުރުކުރަން ހިތްވަރު ދިނުމުގެ ގޮތުން މިދިޔަ ޖުލައި މަހު އިންޓްރެސްޓް ރޭޓުތައް ކުޑަކޮށްފަ އެވެ. އެއާ އެކު އަނެއްކާ ވެސް އެގައުމުގެ ރައްޔިތުން ކުރާ ހޭދަ އިތުުރުވުމުގެ ފުރުސަތު އެބަ އޮތެވެ. ވޯލްޑް ބޭންކުން ބުނީ، ޗައިނާގެ އިގްތިސާދަށް ކުރިމަތިވެފައިވާ މަޑު ޖެހުމާ އެކު އެކަމުގެ އަސަރު ރާއްޖޭގެ ޓޫރިޒަމް ދާއިރާއަށް ކުރުމުގެ ފުރުސަތު އެބަ އޮތް ކަމަށެވެ.

ޗައިނާ އަކީ މިވަގުތު ރާއްޖެއަށް އެންމެ ގިނަ ޓޫރިސްޓުން އަންނަ ގައުމެވެ. އެ ގައުމުން މި އަހަރުގެ މިހާތަނަށް ވަނީ 230،000 އަށް ވުރެ ގިނަ ޓޫރިސްޓުން އައިސްފަ އެވެ. އެއީ މިހާތަނަށް ރާއްޖެއަށް އައިސްފައިވާ ޓޫރިސްޓުންގެ 15 ޕަސެންޓެވެ.

ވޯލްޑް ބޭންކުން ބުނީ ޗައިނާގެ އިގްތިސާދު މި އަހަރު ކުރިއަރާނީ 4.8 ޕަސެންޓުގައި ކަމަށެވެ. ނަމަވެސް އަންނަ އަހަރު އެގައުމުގެ އިގްތިސާދު ކުރިއަރާގެ ކަމަށް އެ އިދާރާއިން ލަފާކުރަނީ 4.3 ޕަސެންޓުގަ އެވެ.

ޔޫރަޕްގެ އިގްތިސާދުތައް ވެސް ވަރަށް ބޮޑަށް ރިކަވާ ވަމުން އަންނަ ކަމަށް ފާހަގަކުރެވިފައިވާ ކަމަށް ވޯލްޑް ބޭންކުން ބުންޏެވެ. ޔޫރަޕް ސަރަހައްދުގެ އިގްތިސާދު މި އަހަރު ކުރިއަރާނެ ކަމަށް ލަފާކޮށްފައިވަނީ 0.7 ޕަސެންޓުގަ އެވެ. އަދި އަންނަ އަހަރު އެ އަދަދު 1.4 ޕަސެންޓަށް އަރާނެ ކަމަށް ވޯލްޑް ބޭންކުން ލަފާކުރެ އެވެ.

ވޯލްޑް ބޭންކުން ބުނީ ޔޫރަޕްގެ ގައުމުތަކުގެ އިތުރުން އެމެރިކާގެ އިގްތިސާދު ކުރިން ލަފާކުރި މިންވަރަށް ވުރެ މިއަހަރު ކުރިއަރާކަން ފާހަގަކުރެވޭ ކަމަށެވެ. އެ ގައުމުގެ އިގްތިސާދު ކުރިއަރާނެ ކަމަށް ލަފާކޮށްފައިވަނީ 2.5 ޕަސެންޓުގަ އެވެ. ތަކެތީގެ އަގުތައް އުފުލޭ މިންވަރު ކުޑަވެ، ވަޒީފާތައް އިތުރުވުމާ އެކު އެމެރިކާގެ ފެޑެރަލް ރިޒާވް އިން ކަނޑައަޅާ މޮނިޓަރީ ޕޮލިސީ ރޭޓުތައް ކުޑަކުރުމުގެ ފުރުސަތު އެބަ އޮތް ކަމަށް ވެސް ވޯލްޑް ބޭންކުން ބުންޏެވެ.

އެމެރިކާ އާއި ޔޫރަޕްގެ އިގްތިސާދު ކުރިއަރާނެ ކަމުގެ މަންޒަރުތައް ފެނުމާ އެކު މިއީ ޓޫރިޒަމް ދާއިރާ ފުޅާކުރުމަށް ރާއްޖެއަށް ލިބުނު އިތުރު ފުރުސަތެއް ކަމަށް ވޯލްޑް ބޭންކުން ބުނެފައިވެ އެވެ.

ޔޫރަޕަކީ ރާއްޖެއަށް އެންމެ ގިނަ ޓޫރިސްޓުން އަންނަ ސަރަހައްދެ އެވެ. މިއަހަރުގެ މިހާތަނަށް ރާއްޖެއަށް 1.5 މިލިއަން ޓޫރިސްޓުން އައި އިރު އޭގެ ގާތްގަނޑަކަށް 60 ޕަސެންޓު ހިއްސާވަނީ ޔޫރަޕްގެ ގައުމުތަކެވެ. އޭގެ ތެރޭގައި ރަޝިޔާ، އިނގިރޭސިވިލާތް، އިޓަލީ، ޖަރުމަނު، ސްޕެއިން އަދި ސްވިޒަލެންޑް ފަދަ ގައުމުތައް ހިމެނެ އެވެ.

އެމެރިކާ އޮތީ ރާއްޖެއަށް އެންމެ ގިނަ އިން ޓޫރިސްޓުން އަންނަ ލިސްޓުގެ ހަތް ވަނައިގަ އެވެ. މިއަހަރުގެ މިހާތަނަށް އެގައުމުން 53،000 ޓޫރިސްޓުން ވަނީ އައިސްފަ އެވެ.

ވޯލްޑް ބޭންކުން ބުނީ ޓޫރިޒަމް ފަދަ ހިދުމަތްތަކުގެ އެކްސްޕޯޓު ކުރިއަރާކަން ފާހަގަކުރެވޭ ކަމަށާއި މިއީ ރާއްޖޭގެ ޓޫރިޒަމަށް އޮތް ހެޔޮ ފާލެއް ކަމަށެވެ. ދުނިޔޭގެ އިގްތިސާދު މިއަހަރުގެ ފުރަތަމަ ހަ މަހު ކުރިއަރާކަން ފާހަގަކުރެވޭ ކަމަށް ވޯލްޑް ބޭންކުން ބުންޏެވެ. މިއަހަރު ދުނިޔޭގެ އިގްތިސާދު ކުރިއަރާނެ ކަމަށް ލަފާކޮށްފައިވަނީ 2.6 ޕަސެންޓުގަ އެވެ.