"ބޫލް ބުލައްޔާ 3"ގެ ލަވަ ދިލްޖީތާއި ޕިޓްބުލްގެ އަޑުން

ބޮލީވުޑްގެ ހޮރޯ ކޮމެޑީ ފިލްމް ސީރީޒް "ބޫލް ބުލައްޔާ"ގެ ތިންވަނަ ފިލްމުގެ ޓައިޓަލް ލަވަ އިންޑިއާގެ މަޝްހޫރު ލަވަކިޔުންތެރިޔާ ދިލްޖީތު ދޯސާނީ އަދި އެމެރިކާގެ ރެޕް ލަވަކިޔުންތެރިޔާ ޕިޓްބުލްގެ އަޑުން ގެނެސްދީފި އެވެ.

އެ ލަވަ އާއި އެ ލަވައިގެ ވީޑިއޯ ވެސް ވަނީ އިއްޔެ އާންމުކޮށްފަ އެވެ. އެ ލަވައިގެ ބައެއް ކަޑިތައް އިންޑިއާގެ ލަވަކިޔުންތެރިޔާ ނީރަޖް ސްރީދާރު ވެސް ވަނީ ކިޔައިފަ އެވެ. ނީރަޖް އަކީ "ބޫލް ބުލައްޔާ"ގެ ފުރަތަމަ ފިލްމަށް މި ލަވައިގެ އޮރިޖިނަލް ކިޔައިދިން ފަންނާނެ އެވެ.

ޔޫޓިއުބްގައި އާންމުކުރި އެ ލަވައިގެ ވީޑިއޯ އަށް އެންމެ 10 ގަޑިއިރުގެ ތެރޭގައި ވަނީ 15 މިލިއަނަށް ވުރެ ގިނަ ވިއުސް ލިބިފަ އެވެ. އެ ވީޑިއޯ ލަވައިގައި ފެންނަނީ ފިލްމުގެ ލީޑު އެކްޓަރު ކާތިކް އަރްޔަންގެ ނެށުމެވެ.

ޕިޓްބުލް މީގެ ކުރިން ވެސް އިންޑިއާގެ ފަންނާނުންނާ އެކު ލަވައިގެ މަސައްކަތްތައް ކޮށްފައިވެ އެވެ. އޭގެ ތެރޭގައި މަޝްހޫރު އެކްޓްރެސް ޕްރިޔަންކާ ޗޯޕްރާ އާއި ލަވަކިޔުންތެރިޔާ ގުރޫ ރަންދަވާ އަދި އެކްޓަރު ފަރްހާން އަކްތަރު ހިމެނެ އެވެ.

"ބޫލް ބުލައްޔާ"ގެ ތިންވަނަ ފިލްމުގެ މަސައްކަތް މި ފިލްމުގެ އުފެއްދުންތެރިން ކަމަށްވާ އަނީސް ބަޒްމީ އާއި ބުޝަން ކުމާރް ފެށީ ފުރަތަމަ ދެ ފިލްމަށް ލިބުނު ތަރުހީބު ބޮޑުވުމާ އެކުގަ އެވެ.

ދެވަނަ ފިލްމުގައި ލީޑު އެކްޓަރުގެ ރޯލު ކުޅުނު ކާތިކް އަރްޔަން މި ފިލްމުގައި ވެސް އުޅޭއިރު، ހާއްސަ ރޯލަކުން ވިދްޔާ ބާލަން އާއި މަދޫރީ ދިކްޝިތު ވެސް ފެންނާނެ އެވެ. އަދި މުހިންމު ރޯލަކުން ތުރިޕްތީ ދިމްރީ ވެސް ފެންނާނެ އެވެ.

މި ފިލްމު ސިނަމާތަކަށް ގެންނަނީ އަންނަ މަހު އެކެއްގަ އެވެ.