އޭވިއޭޝަން ދާއިރާ ތަރައްގީކުރަން ސަރުކާރުން އިސްކަންދޭ: މިނިސްޓަރު އަމީން

ރާއްޖޭގެ އޭވިއޭޝަން ދާއިރާ ތަރައްގީ ކުރުމަށް ރައީސް ޑރ. މުހައްމަދު މުއިއްޒު ހާއްސަ އިސްކަމެއް ދެއްވާ ކަމަށް ޓްރާންސްޕޯޓް އެންޑް ސިވިލް އޭވިއޭޝަން މިނިސްޓަރު މުހައްމަދު އަމީން މިއަދު ވިދާޅުވެއްޖެ އެވެ.

ރާއްޖޭގެ ފުރަތަމަ ޕްރިމިއަމް އެއާލައިން "ބިއޯންޑް"އަށް އެއް އަހަރު ފުރުން ފާހަގަ ކުރުމަށް މިއަދު ބޭއްވި ރަސްމިއްޔާތުގައި ވާހަކަ ދައްކަވަމުން މިނިސްޓަރު އަމީން ވިދާޅުވީ ބިއޯންޑް ފަދަ އެއާލައިންތަކުގެ ހިދުމަތް ފުޅާކުރުމަށް ބޭނުންވާ ހުރިހާ އެއްބާރުލުމެއް ސަރުކާރުން ދޭނެ ކަމަށެވެ.

"ރާއްޖޭގެ އޭވިއޭޝަން ދާއިރާ ތަރައްގީކޮށް, މި ތަނަކީ އޭވިއޭޝަން ހަބަކަށް ހެދުމަށް ކުރަމުންދާ ބިއޯންޑުން ބައިވެރިވެ, އޮޕަރޭޝަންތައް ފުޅާކުރުމަކީ އަޅުގަނޑުގެ ވަރަށް ބޮޑު އުއްމީދެއް. އެއާލައިންގެ ހިދުމަތް ފުޅާކުރުމުގައި ސަރުކާރުގެ އެއްބާރުލުން ލިބޭނެ." މިނިސްޓަރު ވިދާޅުވި އެވެ.

މިނިސްޓަރު ވިދާޅުވީ ރާއްޖެއަކީ ދުނިޔޭގެ އެންމެ ޕްރިމިއަމް އެއް ޓޫރިޒަމް މަންޒިލަށް ވާއިރު, ބިއޯންޑަކީ ރާއްޖޭގެ ބްރޭންޑާއި ގުޅޭ އެއާލައިނެއް ކަމަށެވެ.

"ރާއްޖެ ފަދަ ލަގްޒަރީ ޑެސްޓިނޭޝަނަކާ ގުޅޭ އެއާލައިނެއް އޮތުމަކީ ޓޫރިޒަމް އިތުރަށް ފުޅާކޮށް, ޓޫރިސްޓުންގެ އިތުރު މާކެޓެއް ހޯދުމަށް ލިބޭ ފުރުސަތެއް." މިނިސްޓަރު ވިދާޅުވި އެވެ.

"ބިއޯންޑް" އަށް އެއް އަހަރު ފުރުން ފާހަގަކުރަން ބޭއްވި ރަސްމިއްޔާތުގައި، ބިއޯންޑަކީ ރާއްޖެ ފަދަ ލަގްޒަރީ ޓޫރިސްޓް މަންޒިލަކަށް މުހިންމު އެއާލައިނެއްގެ ގޮތުގައި އިކޮނޮމިކް މިނިސްޓަރު މުހައްމަދު ސައީދު ވެސް ވިދާޅުވި އެވެ. މިނިސްޓަރު ވިދާޅުވީ ރާއްޖެއަށް އަންނަ ޓޫރިސްޓުންގެ އަދަދު އިތުރުކުރަން މި ސަރުކާރުން އަމާޒު ހިފާފައިވާއިރު, ލަގްޒަރީ އެއާލައިނެއްގެ ދައުރު އެކަމުގައި ބޮޑު ކަމަށެވެ.

މިނިސްޓަރު ސައީދު ވަނީ ފޮރިން ޑައިރެކްޓް އިންވެސްޓްމަންޓު ގާނޫނުގެ ދަށުން "ބިއޯންޑް" ފަދަ ކުންފުނިތަކަށް ރައްކާތެރިކަން ކަށަވަރު ކުރެވޭނެ ކަމަށެވެ.

"ބިއޯންޑް" އަކީ ސިމްޑީ ގްރޫޕުން ޔޫއޭއީގެ އަރަބެސްކް ކުންފުންޏާ ގުޅިގެން ތައާރަފްކުރި އެއާލައިނެކެވެ. ލަގްޒަރީ މި އެއާލައިން ފެށީ އޭ 319 މަރުކާގެ ބޯޓަކާއި އެކު އެވެ. މިދިޔަ އަހަރު އޮކްޓޯބަރު މަހު ލޯންޗުކޮށް، ނޮވެމްބަރު މަހު ހިދުމަތް ދޭން ފެށި މި އެއާލައިނުގެ ދެ ވަނަ އެއާކްރާފްޓް މިއަދު ވަނީ ރާއްޖެ ގެނެސް އޮޕަރޭޝަނަށް ނެރެފަ އެވެ. އެ އެއާކްރާފްޓަކީ އޭ321 މަރުކާގެ 68 ސީޓު ހިމެނޭ ބޯޓެކެވެ.

މި އެއާލައިނުން މިވަގުތު ދަތުރު ކުރަނީ 5 މަންޒިލަކަށެވެ.