ރާއްޖޭގެ އެންމެ މޮޅު އެތުލީޓުންގެ އެވޯޑް ޓީޓީގެ ދީމާ އާއި ޝައްފާނަށް

މޯލްޑިވްސް ސްޕޯޓްސް އެވޯޑްސްގެ ގާލާ ނައިޓްގައި މިދިޔަ އަހަރުގެ އެންމެ މޮޅު އެތުލީޓުންގެ މަގާމު، ޓޭބަލް ޓެނިސް ކުޅުންތެރިން ކަމަށްވާ ފާތިމަތު ދީމާ އާއި މުހައްމަދު ޝައްފާން އިސްމާއިލް ހޯދައިފި އެވެ.

މިއީ ދީމާ މި އެވޯޑް ހޯދި ދެވަނަ ފަހަރެވެ. މިދިޔަ އަހަރު ވެސް އެންމެ މޮޅު އަންހެން އެތުލީޓުގެ އެވޯޑް ހޯދީ އޭނާ އެވެ.

އެންމެ މޮޅު އަންހެން ޓީޓީ ކުޅުންތެރިޔާގެ އެވޯޑް ވެސް ހޯދި ދިމާ ވަނީ އެންމެ މޮޅު ޒުވާން އަންހެން އެތުލީޓްގެ އެވޯޑް ވެސް ހޯދައިފަ އެވެ. މިއީ އެންމެ މޮޅު ޒުވާން އެތުލީޓްގެ އެވޯޑް އޭނާ ވިދިވިދިގެން ހޯދި ތިންވަނަ ފަހަރެވެ.

ޝައްފާން ވަނީ އަހަރުގެ އެންމެ މޮޅު ފިރިހެން ޓީޓީ ކުޅުންތެރިޔާގެ އެވޯޑް ވެސް ހޯދައިފަ އެވެ. އަދި އަހަރުގެ އެންމެ އުންމީދީ ފިރިހެން އެތުލީޓަކަށް ހޮވުނީ ޓީޓީ ކުޅުންތެރިޔާ އަޚްޔާރު އަހުމަދު ހާލިދެވެ.

ޓީޓީ އާއި ބޮޑީބޯޑިން އެސޯސިއޭޝަނާ ވާދަކޮށް، އެންމެ މޮޅު ކުޅިވަރު އެސޯސިއޭޝަންގެ އެވޯޑް ހޯދީ ހޭންޑްބޯޅަ އެސޯސިއޭޝަނެވެ.

ދީމާ އާއި ޝައްފާން ވަނީ، މިދިޔަ އަހަރު ބޭއްވި އިންޑިއަން އޯޝަން އައިލެންޑް ގޭމްސްގައި ރާއްޖެ އަށް ކާމިޔާބު ހޯދައި ދިނުމުގައި މުހިންމު ދައުރެއް އަދާކޮށްފަ އެވެ.

ޝައްފާން ވަނީ އެ ގޭމްސްގައި ތިން ކެޓަގަރީއަކުން ރާއްޖެ އަށް ރިހި މެޑަލް ހޯދައި ދީފަ އެވެ. އެއީ ފިރިހެން ސިންގަލްސް، މޫސާ މުންސިފް އަހްމަދާ އެކު ހިއްސާވެ ޑަބަލްސް އަދި ޓީމު އިވެންޓުންނެވެ. އަދި ދީމާ އާ އެކު ހިއްސާވެ މިކްސްޑް ޑަބަލްސް ކެޓަގަރީން ލޯ މެޑަލް ހޯދި އެވެ.

އިންޑިއަން އޯޝަން އައިލެންޑް ގޭމްސްގައި ދީމާ ވަނީ ތިން ރަން މެޑަލް ރާއްޖެ އަށް ހޯދައި ދިނުމުގައި ހިއްސާ ވެފަ އެވެ. އެއީ ސިންގަލްސް އަދި ރަފާ ނާޒިމާ އެކު ހިއްސާވެ ޑަބަލްސް އަދި ޓީމު އިވެންޓުންނެވެ.