އިލާންގެ ދެ ގޯލާއެކު ރާއްޖޭން ފަހަތުން އަރައި ބޫޓާނާ އެއްވަރުކޮށްފި

އަންނަ އަހަރު ސައުދީ އަރަބިއްޔާގައި ބާއްވާ 17 އަހަރުން ދަށުގެ އޭއެފްސީ އޭޝިއަން ކަޕް ކޮލިފައިންގައި ރާއްޖޭން ކުޅުނު ފުރަތަމަ މެޗުގައި ފަހަތުން އަރައި 2-2 އިން ބޫޓާނާ އެއްވަރު ކޮށްފި އެވެ.

ޗައިނާގެ ޑަލިއަން ޔޫތު ޓްރޭނިން ބޭސްގައި މިއަދު ކުޅުނު މެޗުގެ ފުރަތަމަ ހާފު ނިމުނީ ލަނޑެއް ނުޖެހި އެވެ. ނަމަވެސް ދެވަނަ ހާފު ފެށިގެން ފަސްވަނަ މިނިޓުގައި ސަޔޫން ލާމާ އަދި 12 މިނިޓު ފަހުން ތިންލޭ ޔެޒާ ޖަހައިދިން ގޯލުތަކުން ބޫޓާނުން ދެ ގޯލުގެ ލީޑެއް ނެގި އެވެ.

ރާއްޖޭން ފަރަގު ކުޑަ ކުރީ 70 ވަނަ މިނިޓުގައި، މުހައްމަދު އިލާން އިމްރާން ޖަހައިދިން ގޯލުންނެވެ. އަދި 81 ވަނަ މިނިޓުގައި އެއްވަރު ކުރި ގޯލު އޭނާ ޖެހީ ޕެނަލްޓީއަކުންނެވެ.

ހެޑްކޯޗް މުހައްމަދު އާދަމްގެ އިރުޝާދުގެ ދަށުން ކުޅޭ 17 އަހަރުން ދަށުގެ ޓީމް، މިދިޔަ މަހު އޮތް ސާފް ޗެމްޕިއަންޝިޕްގައި، ދެ ފަހަރު ޗެމްޕިއަންކަން ހޯދި ބަންގްލަދޭޝްއާ 1-1 އިން އެއްވަރު ކުރި މެޗުގައި ވެސް ގޯލު ޖެހީ އިލާން އެވެ. ރާއްޖެއަށް އެ މުބާރާތް ނިމުނީ ދެވަނަ މެޗުގައި، ހަ ވަނަ ފަހަރަށް ތަށި ހޯދި އިންޑިއާ އަތުން 3-0 އިން ބަލިވެގެންނެވެ.

ބޫޓާނުން އަމިއްލަ ގައުމުގައި ކުޅުނު ފުރަތަމަ މެޗުން ސްރީ ލަންކާ ބަލިކުރި ނަމަވެސް ޕާކިސްތާނާ އެއްވަރުވެ، ފަހު މެޗުގައި ނޭޕާލް އަތުން ބަލިވުމުން ސެމީ ފައިނަލަކަށް ނުދެވެ އެވެ.

އޭޝިއަން ކަޕް ކޮލިފައިންގައި ރާއްޖެ އާއި ބޫޓާނާ އެކު ގުރޫޕް ސީ ގައި ހިމެނެނީ ދެ ފަހަރު މުބާރާތް ކާމިޔާބު ކޮށްފައިވާ ޗައިނާ އާއި ދެކުނު ކޮރެއާގެ އިތުރުން، ބަހްރޭނެވެ. މުބާރާތަށް ހޮވޭނީ ގުރޫޕްގެ އެއް ވަނަ ހޯދާ ޓީމުތަކުގެ އިތުރުން، ދެ ވަނައަށް ދާ ޓީމުތަކުގެ ތެރެއިން އެންމެ ރަނގަޅު ފަސް ޓީމެވެ.

ރާއްޖޭގެ ދެ ވަނަ މެޗުގައި، ބަހްރޭނާ ދެކޮޅަށް ނުކުންނާނީ ހޯމަ ދުވަހު އެވެ.