އެމްޓީސީސީން ހުޅުމާލެ ފޭސް 2ގެ ބީޗު ސާފުކޮށްފި

އެމްޓީސީސީން "ސުޒުކީ ބީޗް ކްލީން"ގެ ނަމުގައި ސޭވް ދަ ބީޗް އާއި ހުޅުމާލެ މަސްވެރިންގެ ޖައްމިއްޔާއާ ގުޅިގެން ހުޅުމާލެ ފޭސް 2ގެ ބީޗުން ކުނި ނެގުމަށް ހާއްސަ ހަރަކާތެއް ބާއްވައިފި އެވެ.

އެމްޓީސީސީގެ 100އަށް ވުރެ ގިނަ މުވައްޒަފުން ބައިވެރިވި މި ހަރަކާތުގައި އެ ކުންފުނީގެ މެނޭޖިން ޑިރެކްޓަރު އަހުމަދު ސައުދީ އާއި ޑެޕިއުޓީ މެނޭޖިން ޑިރެކްޓަރު ހަސަން މުގުނީ ބައިވެރިވެވަޑައިގަތެވެ.

"ސުޒުކީ ބީޗް ކްލީން" ހަރަކާތުގައި ފޭސް 2ގެ ބީޗުން 426 ކިލޯގެ ކުނި ވަނީ ނަގައިފަ އެވެ. މި ހަރަކާތަކީ އެ ކުންފުނިން ތިމާވެށި ސާފުކޮށް ބެލެހެއްޓުމަށް ކުރަމުން އަންނަ ސީއެސްއާރު ޕްރޮގްރާމުތަކުގެ ތެރެއިން ހިންގި ހަރަކާތެކެވެ.

މި ހަރަކާތަށް ކުންފުނީގެ ގިނަ އަދަދެއްގެ މުވައްޒަފުންގެ ތަރުހީބު ލިބުނު ކަމަށާއި މި ހަރަކާތް ކާމިޔާބުކަމާ އެކު ނިންމާލެވުނު ކަމަށް އެ ކުންފުނިން ބުންޏެވެ.

އެމްޓީސީސީން މީގެކުރިން ވެސް މިފަދަ ހަރަކާތްތައް ވަނީ ބާއްވައިފަ އެވެ. ތިމާވެށި ރައްކާތެރިކުރުމާއި ސާފުކޮށް ބެލެެހެއްޓުމަށް އެމްޓީސީސީގެ ސީއެސްއާރު ޕްރޮޖެކްޓުތަކުގައި އިސްކަންދެ އެވެ.