ޑިއުޓީ ބޮޑުކުރިއަސް ސިނގިރޭޓް އެތެރެކުރުން އަހަރުން އަހަރަށް އިތުރުވަނީ

ދުންފަތުގެ ބާވަތްތަކުން ޑިއުޓީ ބޮޑުކުރިއަސް، އެ ތަކެތި ރާއްޖެ އެތެރެކުރާ މިންވަރު އެއް އަހަރުން އަނެއް އަހަރަށް އިތުރުވަމުންދާ ކަމަށް ކަސްޓަމްސްގެ ތަފާސްހިސާބުތަކުން ދައްކައިފި އެވެ.

އެ އިދާރާ އިން "މިހާރު"އާ ހިއްސާކުރި މައުލޫމާތުތަކަށް ބަލާއިރު މިދިޔަ ޖެނުއަރީ މަހުން ފެށިގެން މިދިޔަ މަހުގެ ނިޔަލަށް ރާއްޖެ އަށް 234 މިލިއަން ރުފިޔާގެ ދުންފަތުގެ ބާވަތްތައް ވަނީ އެތެރެކޮށްފަ އެވެ.

އޭގެ ތެރޭގައި ސިނގިރޭޓާއި އީ-ސިނގިރޭޓު އަދި ދުންފަތުގެ އެހެނިހެން ބާވަތްތައް ހިމެނެ އެވެ.

އެ މައުލޫމާތުތަކުގައިވާ ގޮތުން 2018 އިން ފެށިގެން މިދިޔަ މަހުގެ ނިޔަލަށް ރާއްޖެ އަށް 1.9 ބިލިއަން ރުފިޔާގެ ސިނގިރޭޓާއި ދުންފަތުގެ ބާވަތްތައް ވަނީ އެތެރެކޮށްފަ އެވެ.

ނޮވެމްބަރު 2018 އިން ފެށިގެން މިދިޔަ އަހަރުގެ ނޮވެމްބަރު މަހުގެ ނިޔަލަށް އެތެރެކޮށްފައިވަނީ އޭގެ ތެރެއިން 1.7 ބިލިއަން ރުފިޔާގެ ސިނގިރޭޓާއި ދުންފަތުގެ އެހެނިހެން ބާވަތްތަކެވެ.

ސިނގިރޭޓުން ނަގާ ޑިއުޓީ އެންމެ ފަހުން ބޮޑުކުރީ ނޮވެމްބަރު 2019 ގަ އެވެ. އެ ބަދަލަށް ޖެހިގެން އައި އަހަރު އަމަލުކުރަން ފެށުމާއެކު ސިނގިރޭޓެއްގެ އަގު ވަނީ ތިން ރުފިޔާ އަށް ބޮޑުވެފަ އެވެ.

ކަސްޓަމްސްގެ ހިސާބުތައް ދައްކާގޮތުން 2019 ވަނަ އަހަރު 292 މިލިއަން ރުފިޔާގެ ސިނގިރޭޓާއި ދުންފަތުގެ ބާވަތްތައް ރާއްޖެ އަށް އެތެރެކުރި އެވެ.

ޖެހިގެން އައި 2020 ގައި 268 މިލިއަން ރުފިޔާގެ ސިނގިރޭޓާއި ދުންފަތުގެ ބާވަތްތައް އެތެރެކުރި އެވެ. މި ފަސް އަހަރުގެ ތެރޭގައި ދުންފަތުގެ ޑިއުޓީގެ ގޮތުގައި އާމްދަނީ އެންމެ މަދުން ލިބުނީ ވެސް އެ އަހަރެވެ. ބެލެވޭ ގޮތުގައި ސިނގިރޭޓްގެ އިމްޕޯޓު ދަށްވީ ކޮވިޑާ ގުޅިގެން ގިނަ ގައުމުތަކެއްގައި ފިޔަވަޅުތައް އަޅާފައި ހުރުމުން މުދާ ލިބުމުގައި ދަތިތައް ދިމާވުމުންނެވެ.

ނަމަވެސް، އެ މުއްދަތުން ފެށިގެން ދުންފަތުގެ ބާވަތްތައް އެތެރެކުރާ އަދަދު ދިޔައީ އެއް އަހަރުން އަނެއް އަހަރަށް އިތުރުވަމުންނެވެ.

އޭގެ ތެރެއިން 2021 ވަނަ އަހަރު 292 މިލިއަން ރުފިޔާގެ ސިނގިރޭޓާއި ދުންފަތުގެ ބާވަތްތައް، 2022 ވަނަ އަހަރު 303 މިލިއަން ރުފިޔާގެ ތަކެތި އަދި މިދިޔަ އަހަރު 317 މިލިއަން ރުފިޔާގެ ސިނގިރޭޓާއި ދުންފަތުގެ ބާވަތްތައް އެތެރެކުރި އެވެ.

ދުންފަތް ބޭނުންކުރާ ވަރު މަދުކުރުމަށް ސަރުކާރުން ވަނީ އަންނަ މަހުން ފެށިގެން ސިނގިރޭޓުން ނަގާ ޑިއުޓީ 8ރ. އަށް ބޮޑުކުރަން ނިންމައިފަ އެވެ.

ކަސްޓަމްސްގެ މައުލޫމާތުތަކަށް ބަލާއިރު މި ސަރަހައްދުގެ އެކި ގައުމުތަކާއި ޔޫރަޕް އަދި އެމެރިކާ ފަދަ ގައުމުތަކުން ވެސް ރާއްޖެ އަށް ދުންފަތުގެ ބާވަތްތައް އެތެރެކުރެ އެވެ.