ދެން ސިނގިރޭޓު ބޮވޭނީ ހުއްދަ އޮންނަ ކެފޭތަކުގައި އެކަނި، ލައިސަންސް ފީ އަށް 10،000ރ. ދައްކަންޖެހޭ!

ރާއްޖޭގައި ސިނގިރޭޓު ބޮވޭނީ ހުއްދަ އޮންނަ ކެފޭތަކުގައި އެކަނި ކަމަށް ކަނޑައަޅައި، ދުންފަތް ކޮންޓްރޯލް ކުރުމާ ބެހޭ އާންމު ގަވާއިދަށް ގެނައި އިސްލާހަށް އިއްޔެ އަމަލުކުރަން ފަށައިފި އެވެ.

އެ ގަވާއިދުގައިވާ ގޮތުން، ދުންފަތުގެ އިސްތިއުމާލު ކުރުމަށް ހުއްދަ ދޭ ތަންތަން ފިޔަވައި، ސައި ހޮޓާތަކާއި ކެފޭތަކާއި ރެސްޓޯރަންޓުތަކާއި ކާބޯތަކެތި އުފައްދާ ތަންތަނާއި ވިއްކާ ތަންތަން އަދި އެ ނޫން ވެސް ކެއިންބުއިމުގެ ހިދުމަތް ދިނުމަށް އިމާރާތް ކޮށްފައިވާ ތަންތަނުގައި ދުންފަތުގެ އިސްތިމާލުކުރުން މަނަލެވެ.

ކާބޯތަކެތި އުފައްދަން ބަންދުކޮށްފައި ހުންނަ ތަންތަނާއި ހާމަކޮށް ހުންނަ ތަންތަނާއި އެ ތަންތަނުގެ ދޮރުމަތީގައި ވެސް ދުންފަތުގެ އިސްތިއުމާލުކުރުން މަނާވާނެ ކަމަށް ގަވާއިދުގައިވެ އެވެ.

އެ ގަވާއިދުގައި ބުނީ، ދުންފަތުގެ ދުމުން ރައްކާތެރި ތަންތަނުގައި އާންމުންނާއި އެހެން ފަރާތްތަކަށް ނުރައްކަލެއް ނުވާ ގޮތަށް އަދި ދުންފަތުގެ އިސްތިއުމާލުކުރުން އިސްތިހާރުނުވާ ގޮތެއްގައި ދުންފަތުގެ އިސްތިއުމާލުކުރަން ބޭނުންވާ ފަރާތްތަކަށް ވަކި ގޮތެއްގެ މަތިން ހުއްދަ ދޭނެ ކަމަށެވެ.

ދުންފަތުގެ އިސްތިއުމާލުކުރުމަށް ބަންދުކޮށްފައިވާ ތަނެއް "ސްމޯކިން ރޫމް" ނުވަތަ "ސްމޯކިން އޭރިއާ" އެއްގައި ދުންފަތުގެ އިސްތިއުމާލު ކުރެވޭނީ މިނިސްޓްރީން ނުވަތަ މިނިސްޓްރީގެ ޒިންމާ ހަވާލުކުރާ ފަރާތެއްގެ ހުއްދަ ލިޔުމަކުން ހޯދައިގެން ކަމަށް ގަވާއިދުގައިވެ އެވެ.

އެ ގަވާއިދުގެ ދަށުން ދުންފަތުގެ އިސްތިއުމާލުކުރުން މަނާކޮށްފައިވާ ތަންތަނުގެ ތެރެއިން ސްމޯކިން ރޫމެއް ހެދި ދާނެ ކަމަށް ބަޔާން ކޮށްފައި ވަނީ ވައިގެ ބަނދަރުތަކާއި ކަނޑުގެ ބަނދަރުތަކުގެ ތެރެއިން ޓްރާންސިޓް ދަތުރުގެ އިންތިޒާމު ހުންނަ ބަނދަރުތަކާއި މޯލްތަކާއި ސައިހޮޓާތަކާއި ކެފޭތަކާއި ރެސްޓޯރަންޓުތަކުގަ އެވެ. އަދި ދައުލަތުގެ ބެލުމުގެ ދަށުގައި ބަންދުގައި މީހުން ބައިތިއްބާ ތަންތަނާއި ސިނާއީ މަސައްކަތްކުރާ ތަންތަނާއި މަސައްކަތްކުރާ ތަންތަނުގައި މީހުން ދިރިއުޅެންޖެހޭ ތަންތަނުގަ އެވެެ.

ގަވާއިދުގައި ވަނީ ސްމޯކިން އޭރިއާ ގާއިމުކުރެވިދާނެ 7 ތަނެއް ވެސް ހިމަނައިފަ އެވެ. އެއީ:

- ވައިގެ ބަނދަރުތަކާއި ކަނޑުގެ ބަނދަރުތަކުގައިވާ ހާމަ ތަންތަން.

- ސިނާއީ މަސައްކަތްކުރާ ތަންތަނާއި ސަރަހައްދުތަކުގައިވާ ހާމަ ތަންތަން.

- ސައި ހޮޓާތަކާއި ކެފޭ ރެސްޓޯރަންޓުތައް.

- މުވައްޒަފުން މަސައްކަތްކުރާ ތަންތަނުގެ ތެރެއިން އެ ތަނެއްގައި މުވައްޒަފުން ދިރިއުޅޭ ތަންތަން.

- ދައުލަތުގެ ބެލުމުގެ ދަށުގައި ބަންދުގައި މީހުން ބައިތިއްބާ ތަންތަނުގައި ހުންނަ ހާމަ ބިންތަކުގައި.

- ކާރިސާއެއްގައި ގެއްލުން ލިބުނު މީހުން ވަގުތީ ގޮތުން ތިބޭ ކޭމްޕް ފަދަ ތަންތަނުގައި ހުންނަ ހާމަ ބިންތައް.

- ދައުލަތުގެ އިދާރާތަކާއި ސަރުކާރުގެ ކުންފުނިތަކާއި ސަރުކާރު ހިއްސާވާ ކުންފުނިތަކާއި ސަރުކާރުގެ ރަސްމީ ޒިންމާ އަފާކުރާ އެންމެހާ ތަންތަނުގައި އޮންނަ ހާމަ ބިންތަކުގައި.

ގަވާއިދުގައި ބުނީ ސްމޯކިން ރޫމެއް ނުވަތަ ސްމޯކިން އޭރިއާއެއް ކަނޑައަޅައި ހުއްދަ ދޫކުރާނީ އެ ތަންތަނުން ހުއްދަ ހޯދުމަށް ހުށަހަޅާ ލިޔުންތަކާއި އެ ތަންތަނުގެ މިންގަނޑުތައް ބެލުމަށް ފަހު ލައިސެންސް ފީގެ ގޮތުގައި 10،000ރ. ދެއްކުމުން ކަމަށެވެ. އެއީ ފަސް އަހަރުގެ މުއްދަތަކަށް ދޫކުރާ ލައިސަންސެކެވެ.

އަމިއްލަ ފަރާތްތަކުން މި ގަވާއިދާ ހިލާފުވެއްޖެ ނަމަ، ފުރަތަމަ ފަހަރު 1،000ރ. އިން ދެވަނަ ފަހަރު 2،000ރ. އިން އަދި ތިން ވަނަ ފަހަރު 3،000ރ. އިން ޖޫރިމަނާ ކުރާނެ އެވެ. ވިޔަފާރިތަކުން ގަވާއިދާ ހިލާފުވެއްޖެ ނަމަ ފުރަތަމަ ފަހަރު 10،000ރ. އިން އަދި ދެވަނަ ފަހަރު 50،000ރ. އިން، ތިން ވަނަ ފަހަރު 100،000ރ. އިން ޖޫރިމަނާ ކުރާނެ އެވެ.