ތަރައްގީގައި ޕްރައިވެޓް ސެކްޓާގެ ބައިވެރިވުން އިތުރުކުރަން ޖެހޭ: ނައިބު ރައީސް

ތަރައްގީގެ މަސައްކަތްތަކުގައި ޕްރައިވެޓް ސެކްޓާ ނުވަތަ އަމިއްލަ ފަރާތްތަކުގެ ބައިވެރިވުން އިތުރު ކުރުމަށް މަސައްކަތްކޮށްދިނުމަށް އެ ފަރާތްތަކަށް ނައިބު ރައީސް ހުސެއިން މުހައްމަދު ލަތީފް މިއަދު ގޮވާލައްވައިފި އެވެ.

ކޮމަންވެލްތުގެ 27 ވަނަ ބައްދަލުވުމުގައި ބައިވެރިވެވަޑައިގަތުމަށް މި ވަގުތު ސަމޯއާގައި ހުންނެވި ނައިބު ރައީސް އެގޮތަށް ގޮވާލެއްވީ އެ ބައްދަލުވުމުގެ ކުރިން ބޭއްވި "ބިޒްނަސް ފޯރަމް: އައިލެންޑް ލީޑާސް ރައުންޑޭބަލް"ގަ އެވެ.

ރައީސް އޮފީހުން ބުނި ގޮތުގައި، ނައިބު ރައީސްގެ ވާހަކަފުޅުގައި ވަނީ ޕްރައިވެޓް ސެކްޓާއިން ސިޑްސްގެ ގައުމުތަކަށް ދިގު މުއްދަތަކަށް އެހީތެރިކަން ފޯރުކޮށްދިނުމަށް އެޅިދާނެ ފިޔަވަޅުތަކާއި ސިޑްސްގެ ހުރިހާ ގައުމަކަށް ތަނަވަސްކަން ހޯދައިދިނުމަށް މަސައްކަތް ކުރެވިދާނެ ގޮތްތަކެއް ވެސް ހުށަހަޅުއްވައިފަ އެވެ.

ނައިބު ރައީސް ހުށަހެޅުއްވި ކަންކަމަކީ؛

• ޕްރައިވެޓް ސެކްޓާ ނުވަތަ އަމިއްލަ ފަރާތްތައް ޝައުގުވެރި ކުރުވުމަށް ފަހި މާހައުލެއް ގާއިމުކޮށްދިނުން.

• ދެމެހެއްޓެނިވި ގޮތެއްގައި ގުޅުން ބަދަހިކުރުން.

• ވިޔަފާރި އާއި ވިޔަފާރިގެ މުއާމަލާތްތައް އިތުރަށް ހަރުދަނާ ކުރުމަށް ޕްރައިވެޓް ސެކްޓާ ބައިވެރިވުން ވަރުގަދަކުރުން.

ނައިބު ރައީސް ވިދާޅުވީ މޫސުމަށް އަންނަ ބަދަލުތަކުން އަރައިގަތުމަށް މާލީ އެހީ ހޯދުމުގައި ރާއްޖެއަށާއި ކުދި އެހެން ގައުމުތަކަށް ވެސް ބޮޑެތި ގޮންޖެހުންތަކެއް ކުރިމަތިވެފައިވާ ކަމަށެވެ.

ރާއްޖެއަކީ 2040 ވަނަ އަހަރު ނިމޭއިރު ތަރައްގީވެފައިވާ ގައުމަކަށް ބަދަލުކުރެއްވުމަށް ރައީސް ޑރ. މުހައްމަދު މުއިއްޒު ގެންގުޅުއްވާ ތަސައްވުރު ވެސް، އެ ބައްދަލުވުމުގެ ބައިވެރިންނާ ނައިބު ރައީސް ހިއްސާ ކުރެއްވި ކަމަށް ރައީސް އޮފީހުން ބުންޏެވެ.

އައިސީޓީ އާއި ފައިނޭންސް އަދި އިއާދަކުރަނިވި ހަކަތަ ފަދަ ދާއިރާތައް ހިމެނޭ ގޮތަށް އިގުތިސާދު ޑައިވާސިފައި ކުރުމަށް ރައީސް މުއިއްޒު ކުރައްވާ މަސައްކަތްޕުޅު ވެސް، ނައިބު ރައީސް އެ ބައްދަލުވުމުގެ ބައިވެރިންނަށް ހިއްސާ ކުރެއްވި އެވެ.

ނައިބު ރައީސް ވަނީ ކޮމަންވެލްތުގެ ގައުމުތަކުގެ ވިޔަފާރިވެރިން ރާއްޖެއަށް އެއްބާރުލުން ދިނުމުގެ މުހިންމު ކަމުގެ މައްޗަށް ވެސް އަލިއަޅުއްވާ ލައްވައިފަ އެވެ.