ޓްރާންސްފޯމަރުން ވައްކަންކުރަން ވަދެ އިނީ އޭގެ ތެރޭގައި

ހުޅުމާލޭ 2 ގައި ކަރަންޓު ދިނުމަށް ބޭނުންކުރާ ޓްރާންސްފޯމަރެއްގެ ތެރެއަށް ވަދެ އިން މީހަކު ހައްޔަރުކޮށްފި އެވެ.

ފުލުހުން ބުނީ، ހިޔާގެ 13 ވަނަ ޓަވަރު ކައިރީ ހުރި ޓްރާންސްފޯމަރެއް ތެރެއަށް ވަދެ މީހަކު ވައްކަން ކުރަން އުޅުނު މައްސަލައެއް ރިޕޯޓްކުރީ ފަތިހު 5:30 ހާއިރު ކަމަށެވެ.

މި މައްސަލައިގައި 32 އަހަރުގެ ދިވެހި ފިރިހެނަކު ހައްޔަރުކޮށްފައިވާ ކަމަށް ފުލުހުން ބުންޏެވެ.

އާންމުވެފައިވާ ވީޑިއޯއަކުން ފެންނަ ގޮތުގައި، ސްޓެލްކޯގެ މުވައްޒަފުންނާއި ފުލުހުން ޓްރާންސްފޯމަރު ކައިރިއަށް ދިޔައިރު އެ މީހާ އިންނަނީ ޓްރާންސްފޯމަރު ތެރޭ، އެތެރެއިން ދޮރުގައި ހިފަހައްޓައިގެންނެވެ. ސްޓެލްކޯގެ ދެ މުވައްޒަފަކު ދޮރަށް ވަރަށް ބާރަށް ދަމައި ގަދަކަމުން ހުޅުވުމަށް ފަހު އެތެރޭގައި އިން މީހާ ނެރެނީ އެވެ.

ސްޓެލްކޯގެ ސަބްސްޓޭޝަންތަކުގެ ތަޅުތައް ހަލާކުކޮށް، އެ ތަންތަނަށް ވަދެ ޓްރާންސްފޯމަރުތައް ނިއްވާލައި، އޭގެ އެކި ބައިތައް ވަގަށް ނެގުމަކީ ދޭތެރެދޭތެރެއިން ހިނގާ ކަމެކެވެ.

މިދިޔަ މާޗު މަހު ހިޔާގެ 3 ވަނަ ޓަވަރުގެ ކައިރީގައި ހުންނަ ޓްރާންސްފޯމަރު ތެރެއިން ވައްކަން ކުރަން އުޅެނިކޮށް ކަރަންޓުގައި ޖެހިގެން މީހަކު މަރު ވެސް ވެފައިވެ އެވެ.

ގަދައަށް ކަރަންޓު ދީފައި ހުންނަ، އަދި ބިމު އަޑިން އަންނަ ހައި ވޯލްޓޭޖް ކޭބަލްތައް ސީދާ ގުޅާފައި ހުންނަ މި ޓްރާންސްފޯމަރުތަކުގައި 11،000 ވޯލްޓޭޖް ހުރެ އެވެ.