ކަރޯކޭ ސިސްޓަމް ހިފައިގެން މި ދަނީ ކާކު؟

ހުޅުމާލޭގައި ގެއަކުން ކަރޯކޭ ސިސްޓަމަކާއި އިތުރު އެއްޗެހި ވަގަށް ނެގި ދެ މީހަކު ހޯދަން ފުލުހުން މިއަދު ވީޑިއޯއެއް އާންމުކޮށްފި އެވެ.

ފުލުހުން ބުނީ އެ ވީޑިއޯއިން ފެންނަ ދެ މީހުން ވައްކަންކުރީ ހުޅުމާލެ 2 ގައި ހުންނަ އެމްޕީއެލްގެ ޓަވަރުގެ އެޕާޓްމަންޓަކުން ކަމަށެވެ.

އެ ދެ މީހުންނަކީ ހުޅުމާލެ 2 ގެ ޕޮލިސް ސްޓޭޝަނުން ތަހުގީގުކުރަމުން އަންނަ މި މައްސަލައާ ގުޅިގެން ހޯދަން ބޭނުންވެ، ކާކުކަން ދެނެގަނެވިފައި ނުވާތީ ހޯދިފައި ނުވާ ބައެއް ކަމަށް ފުލުހުން ބުންޏެވެ.

ފުލުހުން "މިހާރު" އަށް ބުނި ގޮތުގައި، އެ ގެއިން ވަގަށް ގެންދިޔައީ ކަރޯކޭ ސިސްޓަމަކާއި ފޯނަކާއި ގަހަނާތަކެކެވެ.

ފުލުހުން ބުނީ އެ ވީޑިއޯއިން ފެންނަ މީހުންނާ ބެހޭ އެއްވެސް މައުލޫމާތެއް އެނގޭ ނަމަ، ހުޅުމާލެ 2 ގެ ޕޮލިސްގެ ނަންބަރު 9393351 އަށް ގުޅައި ހިއްސާކުރުމަށް އެދޭ ކަމަށެވެ.

މިފަދަ މީހުން ހޯދުމުގައި އާންމުންގެ ފަރާތުން ފުލުހުންނަށް ލިބޭ އެއްބާރުލުން ފާހަގަކޮށް، ޝުކުރު އަދާކުރާ ކަމަށް ވެސް ފުލުހުން ބުންޏެވެ.

އެ ވީޑިއޯއިން ފެންނަ ގޮތުގައި، ބޮލުގައި ތޮތްޕެއް އަޅައިގެން ހުރި މީހަކާއި ބޮލުގައި ހެލްމެޓެއް އަޅައިގެން ހުރި މީހަކު އެޕާޓްމަންޓަށް ވަދެ އެވެ. އަދި އެތަނުން އެކަކު އެ އެޕާޓްމަންޓުގެ ތެރެއިން ކަރޯކޭ ސެޓެއް ހިފައިގެން ނުކުމެ، ދެ މީހުން އެކުގައި ފިލަން ދުވާތަން ފެނެ އެވެ. ދެން ހުރި މީހާ ދުއްވައިގަންނަނީ އޭނާގެ ފައިވާން އަތަށް ނަގައިގެންނެވެ.