ވަގަށް ރާއްޖެ އެތެރެކުރި ގިނަ އަދަދެއްގެ ސިނގިރޭޓް ކާޓަންތަކެއް އަތުލައިގެންފި

ކަނޑުމަގުން ރާއްޖެ އަށް ވަގަށް އެތެރެކުރި ގިނަ އަދަދެއްގެ ސިނގިރޭޓް ކާޓަންތަކެއް ކަސްޓަމްސް އިން މިދިޔަ ހުކުރު ދުވަހުގެ ރޭ އަތުލައިގެންފި އެވެ.

"މިހާރު" އަށް އެނގިފައިވާ ގޮތުގައި، ކަސްޓަމްސް އިން ގިނަ އަދަދެއްގެ ސިނގިރޭޓް ކާޓަން އަތުލައިގަތީ ތިލަފުށީގައި ބަނދަރު ކޮށްފައި އޮތް ހޯކްސް ކުންފުނީގެ ތެޔޮ ބޯޓަކުންނެވެ.

އެކަމަކު އަތުލައިގަތީ ކިހާ އަދަދެއްގެ ސިނގިރޭޓެއް ކަމެއް އަދި ސާފެއް ނުވެ އެވެ.

ހޯމް މިނިސްޓަރު އަލީ އިހުސާން ވިދާޅުވީ، ބަލައިފާސްކުރުމުގެ ކަންކަން އަދިވެސް ނުނިމޭތީ ސީދާ އަދަދެއް ސާފެއް ނޫން ކަމަށެވެ. ނަމަވެސް އެނގިފައިވާ ގޮތުގައި ސިނގިރޭޓް ކާޓަންގެ އަދަދު 2،000 އަށް އަރަ އެވެ.

ދެހާސް ކާޓަންގައި ހިމެނެނީ 400،000 ސިނގިރޭޓެވެ.

އެ މައްސަލާގައި ބޯޓުގެ ބައެއް ކްރޫއިންގެ ބަޔާން ވެސް މިހާރު ނަގާފައިވާއިރު، އެ މީހުން އޭގެ ޒިންމާ އަޅުވަނީ ބޯޓުގެ ކެޕްޓަންގެ ބޮލުގައި ކަމަށް އެނގިފައި ވެ އެވެ.

ރާއްޖެ އަށް ތެޔޮ އެތެރެކުރުމުގެ ވިޔަފާރި ވަރަށް ފުޅާދާއިރާއްގައި ހިންގާ ހޯކްސް ކުންފުނީގެ އިސް އޮފިޝަލަކު "މިހާރު" އަށް މިރޭ ވިދާޅުވި ގޮތުގައި މިއީ ކުންފުންޏާ އެއްވެސް ގުޅުމެއް އޮތް ކަމެއް ނޫނެވެ.

"އަޅުގަނޑުމެންގެ މެނޭޖްމަންޓުގެ އެއްވެސް އިންވޯލްމަންޓެއް ނެތި ކުންފުނީގެ މުވައްޒަފުންތަކަކާއި ބޭރުގެ ބަޔަކު ގުޅިގެން ހިންގި ކަމެއް ކަމަށް އަޅުގަނޑުމެންނަށް ވެސް މައުލޫމާތު ލިބެނީ. އަޅުގަނޑުމެން ކުންފުނީގެ މެނޭޖުމަންޓަށް މިކަން އެނގުނީ ފުލުހުން ވެސް ކޯޓު އަމުރަކާ އެކު ފާސްކުރަން ދިއުމުން،" އޮފިޝަލް ވިދާޅުވި އެވެ.

އޭނާ ވިދާޅުވި ގޮތުގައި އެ މައްސަލައާ ގުޅިގެން ކުންފުނީގެ އިންޓަނާލް އިންވެސްޓިގޭޝަނެއް ވެސް ކުރަމުން އެބަދެ އެވެ.

"ދައުލަތުގެ ކަމާ ގުޅޭ އިދާރާތަކަށް އަޅުގަނޑުމެންގެ ފުރިހަމަ އެއްބާރުލުން ލިބޭނެ. ފޮރުވާނެ އެއްވެސް ކަމެއް ނޯންނާނެ،" ހޯކްސްގެ އޮފިޝަލް ވިދާޅުވި އެވެ.

ސަރުކާރުން ނިންމާފައި ވަނީ ސިނގިރޭޓާއި ބިޑީގެ އިމްޕޯޓް ޑިއުޓީ އަންނަ މަހުން ފެށިގެން ބޮޑުކުރާ ގޮތަށެވެ. އެގޮތުން ސިނގިރޭޓާއި ބިޑީގެ ވެސް ސްޕެސިފިކް ރޭޓް 3ރ. އިން 8ރ. އަށް ބޮޑުކުރުމަށްޓަކައި މިހާރު ވަނީ ރައްޔިތުންގެ މަޖިލިހަށް ބިލެއް ވެސް ހުށަހަޅައިފަ އެވެ.