މުލަކުގައި 500 ޓަނުގެ ކޯލްޑް ސްޓޯރޭޖެއް ހަދަން ސައުދީގެ ކުންފުންޏަކަށް

މ. މުލަކުގައި 500 ޓަނުގެ ކޯލްޑް ސްޓޯރޭޖް ފެސިލިޓީއެއް އެޅުމަށް ސައުދީ އަރަބިއްޔާގެ ކުންފުންޏަކާ މިއަދު ހަވާލުކޮށްފި އެވެ.

ފިޝަރީޒް މިނިސްޓްރީން ބުނީ މުލަކުގައި 500 ޓަނުގެ ކޯލްޑް ސްޓޯރޭޖް ފެސިލިޓީއެއް އެޅުމަށް ސައުދީގެ އާރްއޯއެސް ފޯ ޓްރޭޑިންގް ކޮމްޕެނީއާއާ އެކު އެއްބަސްވުމުގައި ސޮއިކޮށްފައިވާ ކަމަށެވެ.

އެ އެއްބަސްވުމުގައި ސޮއިކުރީ ފިޝަރީޒް މިނިސްޓްރީގައި މިއަދު ބޭއްވި ރަސްމިއްޔާތެއްގަ އެވެ.

މިނިސްޓްރީގެ ފަރާތުން އެ އެއްބަސްވުމުގައި ސޮއިކުރެއްވީ ޑިރެކްޓ ޖެނެރަލް އީނާސް ނަސީރެވެ. އަދި އާރްއޯއެސް ފޯ ޓްރޭޑިންގްގެ ފަރާތުން ސޮއިކުރެއްވީ އެ ކުންފުނީގެ ޑެޕިއުޓީ ޑައިރެކްޓަރު ހަމަދު މުހައްމަދު އަލްމިންހާލީ އެވެ.

މި މަޝްރޫއުގެ ދަށުން މުލަކުގައި އަޅާ 500 ޓަނުގެ ކޯލްޑް ސްޓޯރޭޖްގައި ދުވާލަކު 50 ޓަނު މަސް ބްރައިން ފްރީޒްކުރުމުގެ ގާބިލުކަން ހުންނާނެ ކަމަށް މިނިސްޓްރީން ބުންޏެވެ.

މިނިސްޓްރީން ބުނި ގޮތުގައި ސްޓޯރޭޖްގެ ޑިޒައިނިންގެ މަސައްކަތާ އެކު، އެ ފެސިލިޓީ އަޅައި ނިންމުމަށް ދިނީ 300 ދުވަހެވެ. އަދި މުޅި މަޝްރޫއަށް 5.2 މިލިއަން ޑޮލަރު ދައުލަތުން ހަރަދުކުރާނެ އެވެ.

މި ފެސިލިޓީ އެޅުމުން މ. އަތޮޅުގެ މަސްވެރިންނަށް ބޮޑު ލުޔެއް ލިބި، މަސްވެރިކަމުގެ ސިނާއަތަށް އިތުރު ކުރިއެރުމެއް ލިބޭނެ ކަމަށް ވެސް ފިޝަރީޒް މިނިސްޓްރީން ބުންޏެވެ.