އައިލެންޑް އޭވިއޭޝަންގެ ލޯނުތަކާ ގުޅޭ ކޮމެޓީ ބައްދަލުވުން ސިއްރުކޮށްފި

އައިލެންޑް އޭވިއޭޝަންގެ މާލީ ހާލަތު ރަނގަޅު ކުރުމަށް ރާވާފައިވާ ކަންތައްތަކާއި އެ ކުންފުނީގެ ލޯނުތަކުގެ މައުލޫމާތު ހިއްސާކުރަން ބޭއްވި ރައްޔިތުންގެ މަޖިލީހުގެ އެސްއޯއީ ކޮމެޓީގެ ސަބް ކޮމިޓީގެ ބައްދަލުވުން ސިއްރުކޮށްފި އެވެ.

އެސްއޯއީ ކޮމެޓީގެ ސަބް ކޮމިޓީގައި ތިއްބަވަނީ ދުވާފަރު ދާއިރާގެ މެންބަރު މުހައްމަދު އަލީ އާއި ފޭދޫ ދެކުނު ދާއިރާގެ އިބްރާހިމް ދީދީ އާއި ކިނބިދޫ ދާއިރާގެ މެންބަރު އަލީ އަޝްރަގާއި މާވަށު ދާއިރާގެ މެންބަރު އަހުމަދު ޝާކިރެވެ.

އެއީ ކުންފުނިތަކުގެ ތެރެއިން ބަނދަރާއި އެއާޕޯޓާއި އެއާލައިންތަކާ ގުޅޭ ކުންފުނިތަކާ ގުޅޭ ކޮމިޓީ އެވެ. މިއަދުގެ ކޮމިޓީގައި އައިލެންޑް އޭވިއޭޝާންގެ މާލީ މައުލޫމާތުތައް ހާމަކޮށް، ލޯނާ ގުޅޭ މައުލޫމާތުތައް ހާމަކުރުމަށް ވެސް އެޖެންޑާ ކޮށްފައިވެ އެވެ.

އެ ބައްދަލުވުން ސިއްރު ކުރަން ހުށަހެޅުއްވީ ފޭދޫ ދެކުނު ދާއިރާގެ މެންބަރު އިބްރާހިމް ދީދީ އެވެ. ކޮމިޓީ ސިއްރުކުރަން ނިންމީ މިއަދު ކުރިއަށް ދިޔައީ ސަބް ކޮމިޓީގެ ބައްދަލުވުމަކަށް ކަމަށް ވާތީ އާއި މައި ކޮމިޓީއަށް އެކަމާ ގުޅޭ ރިޕޯޓް ހުށަހަޅާނެތީ ކަމަށް ކޮމިޓީގެ މުގައްރިރު މެންބަރު އަޝްރަގު ވިދާޅުވި އެވެ.

ގައުމީ އެއާލައިން މޯލްޑިވިއަން ހިންގާ، އައިލެންޑް އޭވިއޭޝަނަށް މިދިޔަ އަހަރު ވަނީ 71 މިލިއަން ރުފިޔާގެ ގެއްލުންވެފަ އެވެ. މިދިޔަ އަހަރު ނިމުނުއިރު އެކުންފުނީގެ ދަރަނި ހުރީ 515 މިލިއަން ރުފިޔާގަ އެވެ. އެ ކުންފުނިން އަންނަނީ ރާއްޖޭގެ 16 އެއާޕޯޓަށް އަދި ބޭރުގެ ތިން މަންޒިލަކަށް ދަތުރުތައް ކުރަމުންނެވެ.