އަައިއޭއެސްއާ ބެހޭ ގޮތުން ރިޕޯޓްކުރި މައްސަލަތައް އެބަ ބަލަން: އޭސީސީ

ރާއްޖޭގެ ގައުމީ އެއާލައިން މޯލްޑިވިއަން އޮޕަރޭޓްކުރާ އައިލެންޑް އޭވިއޭޝަން ސާވިސަސް (އައިއޭއެސް)އާ ބެހޭ ގޮތުން މިޑިއާ އާއި ސޯޝަލް މިޑިއާގައި ފެތުރި މައްސަލަތައް އެންޓިކޮރަޕްޝަން ކޮމިޝަން (އޭސީސީ) އަަށް ހުށަހަޅާފައިވާ ކަމަށާއި އެ މައްސަލަތައް ބަލަމުން އަންނަ ކަމަށް އެކޮމިޝަނުން މިއަދު، ރައްޔިތުންގެ މަޖިލިހުގައި، ބުނެފި އެވެ.

ރައްޔިތުންގެ މަޖިލީހުގެ މިނިވަން މުއައްސަސާތަކާ ބެހޭ ކޮމިޓީގައި މެމްބަރަކު ކުރި ސުވާލަކަށް ޖަވާބު ދެއްވަމުން ކޮމިޝަންގެ މެމްބަރު އިބްރާހީމް ޝަކީލް ވިދާޅުވީ އައިއޭއެސްއާ ގުޅޭ ގޮތުން ކޮމިޝަނަށް ލިބިފައިވާ ބައެއް މައްސަލަތައް އިވެލުއޭޓް ކުރަމުން އަންނަ އިރު އަނެއް ބައި މައްސަލަތަކުގެ ތަހުގީގު މިހާރު ވެސް ފަށާފައިވާ ކަމަށެވެ.

އޭނާ ވިދާޅުވި ގޮތުގައި މީޑިއާ އާއި ސޯޝަލް މީޑިއާގައި އައިއޭއެސްއާ ބެހޭ ގޮތުން ރިޕޯޓްކޮށްފައިވާ ހުރިހާ މައްސަލަތަކެއް ވެސް އާ ކޮމިޝަން އެކުލަވާލި އިރު ވެސް ކޮމިޝަންގެ ސަމާލުކަމަށް އައިސްފައިވާ ކަަމަށެވެ.

"އަޅުގަނޑުމެން މި އާ ކޮމިޝަން އައި އިރުގައި ވެސް އޭގެ ތެރެއިން ހުރިހާ ވާހަކަތަކެއް ކަހަލަ ގޮތަކަށް ހުރި މައްސަލައިގެ ގޮޮތުގައި ރެޖިސްޓާ ކުރެވިފައި. އެއްބައި ކޭސްތައް މިއަދާ ހިސާބަށް އައި އިރުގައި ހުންނާނީ އިވެލުއޭޝަން ސްޓޭޖްގައި، އަނެއް ބައި ކޭސްތައް ތަހުގީގީ މަރުހަލާގައި،" ޝަކީލް ވިދާޅުވި އެވެ.

އައިއޭއެސް އިން އަލަށް ގެންނަން އުޅޭ އޭ330 މަރުކާގެ ދެ ބޯޓު ގެންނަނީ އެ ކުންފުނީގެ ބޯޑުން ފާސްނުކޮށް ކަމަށް މީޑިއާގައި ވަނީ ރިޕޯޓްކޮށްފަ އެވެ. އައިއޭއެސްގެ ބޯޑުގެ ބައެއް ނިންމުންތައް އެނގޭ މީހަކު، ނަން ނުޖަހާ ގޮތަށް، ބުނެފައި ވަނީ އޭ330 މަރުކާގެ ބޯޓުތައް ގެންނަން މިހާރުގެ ބޯޑުން ނިންމާފައި ނުވާ ކަމަށެވެ.

ރާއްޖޭގެ އޭވިއޭޝަން ދާއިރާގެ ބައެއް ތަޖުރިބާކާރުން ބުނާ ގޮތުގައި އައިއޭއެސް މިހާރު އޮތް ފެންވަރުން އޭ330 ދެ ބޯޓާއި އޭ321 އަދި އޭ320 ގެ ބޯޓު، އެއްފަހަރާ، ދުއްވޭ ވަރެއް ނުވާނެ އެވެ. އެގޮތަށް އެކަން ކުރަން އުޅެފި ނަމަ ގައުމީ އެއާލައިނަށް ބޮޑެތި މައްސަލަތަކެއް ދިމާވެ، މުޅި އޮޕަރޭޝަނަށް ވެސް ގޮންޖެހުންތައް އަންނާނެ ކަމަށް އެ މީހުން ބުނެ އެވެ.

އައިއޭއެސް އިން ރާއްޖެއިން ބޭރަށް މިހާރު އޮޕަރޭޓްކުރަނީ އޭ320 ގެ ބޯޓަކާއި އޭ321ގެ ބޯޓެކެވެ. އެކަމަކު އެ ބޯޓުތަކުން މި ފަހުން ޗައިނާއަށް ކުރަމުން އަންނަ ދަތުރުތަކުން ވެސް ބޮޑެތި ގެއްލުންތަކެއް ލިބޭ ކަމަށް، ސޯޝަލް މީޑިއާގައި ފެތުރުނު ހިސާބުތަކުން ދައްކަ އެވެ.

އެއިން އެއްވެސް ވާހަކައަކަށް އައިއޭއެސްގެ މެނޭޖްމަންޓުން ޖަވާބު ދީފައެއް ނުވެ އެވެ.

ދައުލަތުގެ ހުރިހާ އިދާރާތަކަށް ވެސް އެއް އުސޫލެއް އޮންނަން ޖެހޭ

ކޮމިޓީގައި އޭސީސީގެ މެމްބަރު އަލީ އަޝްރަފް ވިދާޅުވީ އޭސީސީއަށް ހުށަހަޅާ މައްސަލަަތަކުގެ ބޮޑު ބަޔަކީ ޕްރޮކިއުމެންޓް (މުދަލާއި ހިދުމަތް ހޯދުމާ ގުޅޭ) މައްސަލަތައް ކަމަށެވެ. އޭނާ ވިދާޅުވި ގޮތުގައި ދައުލަތުގެ އިދާރާތަކާއި ކުންފުުނިތަކާއި ދައުލުގެ ހިއްސާ އޮންނަ ކުންފުނިތަކުން ވެސް ހަރަދުކުރަނީ ރައްޔިތުންގެ ފައިސާ ކަމަށް ވާއިރު އެކި ތަންތަނުން އަމަލުކުރަމުން އަންނަނީ އެކި އުސޫލަށް ކަމަށެވެ.

ފިނޭންސް މިނިސްޓްރީން އެކުލަވާލާފައިވާ މާލިއްޔަތު ގަވައިދަށް އަމަލުކުރަމުން އަންނަނީ ހަމައެކަނި މިނިސްޓްރީތަކާއި ޑިޕާޓްމަންޓްތަކުން ކަމަށާއި އެސްއޯއީތަކާއި ދެން ހުރި ބައިތަކުން ގެންގުޅެނީ އަމިއްލަ އުސޫލުތަކެއް ކަމަށް އޭނާ ވިދާޅުވި އެވެ.

"ކުންފުނިތަކުގައި މި އޮންނަނީ އެ ކުންފުނިތަކުގައި އޮންނަ ޕްރޮކިއުމަންޓް އަމިއްލަ އުސޫލެއް ބޯޑުން ނިންމައިގެން ފާސްކޮށްފައި އޮންނަ. ދެން މި އުސޫލަކީ އޯވަނައިޓް ބަދަލުކުރެވޭ އެއްޗެއް. އެބޭފުޅުން ކަމެއް ކޮށްލަން ބޭނުންވެއްޖެއްޔާ ހަމަ ބޯޑު މީޓިންއެއް ބާއްވާލާފައި އެ ބޯޑް މީޓިންގައި އެންޑޯސްކޮށްލާފައި،" އަޝްރަފް ވިދާޅުވި އެވެ.

އޭނާ ވިދާޅުވީ ފައިސާ ހަރަދުުރުމާ ގުޅޭ ކަންކަން މުޅި ދައުލަތުގައި ވެސް އެއް އުސޫލަކުން ހިންގާ ގޮތަށް ބަދަލުކުރަން ޖެހޭ ކަމަށެވެ.

"ކޮންމެ ބަޔަކު ފައިސާ ގެންގުޅުނަސް، ކޮންމެ ބަޔަކު އެ ހަރަދުކުރަން ހިިފިކަމުގައި ވިޔަސް ހަމަ ދައުލަތުގެ މުދަލެއް ރައްޔިތުންގެ މުދަލެއް. އެހެންވީމާ މި ބޭނުންކުރެވެން ވާނީ އެއް ހަަމަޔަކުން، އެއް އުސޫލަކުން،" އަޝްރަފް ވިދާޅުވި އެވެ.

އޭނާ ވިދާޅުވީ އެގޮތަށް އެއް އުސޫލަކުން އަމަލުކުރާ ގޮތަށް ބަދަލުނުކުރެވޭ ނަމަ މިހާރު ވެސް މި ފެންނަ ފަދަ މައްސަލަތައް ފެންނަމުން ދާނެ ކަމަށެވެ.