ކުއްލި ނުރައްކަލަށް ދިވެހިން ތިބެން ޖެހޭނީ ހޭލާ: މައުމޫން

ދުނިޔޭގެ ސިޔާސީ އޮއިވަރުތަކަށް އަންނަ ބަދަލުތަކާ ގުޅިގެން ރާއްޖެ އަށް ކުއްލި ނުރައްކަލެއް ކުރިމަތިވުމަކީ އަބަދުވެސް ވެދާނެ ކަމެއް ކަމަށާއި ދިވެހިން ތިބެން ޖެހޭނީ އެކަމަށް ހޭލާ ކަމަށް ކުރީގެ ރައީސް މައުމޫން އަބްދުލްގައްޔޫމް މިރޭ ވިދާޅުވެއްޖެ އެވެ.

އެ މަނިކުފާނު އެހެން ވިދާޅުވީ، މީގެ 36 އަހަރު ކުރިން ނޮވެމްބަރު 3، 1988 ގައި ހ. ހާޖަރާގޭ އަބްދުﷲ ލުތުފީ އާއި ސ. ހިތަދޫ ޕެރިސްހޮލިޑޭ އަހުމަދު ނާސިރާއި ސްރީ ލަންކާގެ ތަމަޅައިގެން 80 ވަރަކަށް މީހުން މާލެ އަރައި ވެރިކަން ބަދަލުކޮށް، ރާއްޖެ ހިފަން ދިން ހަމަލައިން ދިވެހިންނަށް ލިބުނު ކާމިޔާބީއަށްޓަކައި މިއަދު ފާހަގަކުރާ ނަސްރުގެ ދުވަހުގެ ރަސްމީ ޖަލްސާގަ އެވެ.

މިއީ ނަސްރު ދުވަހުގެ ކާމިޔާބީއަށްޓަކައި މުޅި ދިވެހި ގައުމު ފަހުރުވެރިވާ ކުރީގެ ރައީސް މައުމޫން މި ދުވަހުގެ ހަރަކާތެއްގައި މި ފަހުން ބައިވެރިވެވަޑައިގެންނެވި ފުރަތަމަ ފަހަރެވެ.

ދަރުބާރުގޭގައި މިރޭ ބޭއްވި ޖަލްސާގައި މައުމޫންގެ ވާހަކަފުޅު ބޮޑަށް ބިނާކުރެއްވީ ނޮވެމްބަރު 3 ގެ ޓެރަރިސްޓް ހަމަލައިން އިބުރަތް ހާސިލްކޮށް، ނަސޭހަތުގެ މެސެޖުތައް ދެއްވުމަށެވެ.

މައުމޫން ވިދާޅުވީ، ރާއްޖެ އަށް ނަސްރު ލިބުނީ މާތް ﷲ ގެ ހަޟްރަތުން ކަމަށާއި އެއީ ގަބޫލުކުރަން ޖެހޭ ހަގީގަތެއް ކަމަށެވެ. އެހެންވެ، އަމިއްލަ ސަލާމަތަށްޓަކައި ވެސް އަޅުގަނޑުމެންގެ އީމާންތެރިކަން ވަރުގަދަ ކުރަންޖެހޭ ކަމަށް އެ މަނިކުފާނު ވިދާޅުވި އެވެ.

"އަޅުގަނޑުމެންގެ ހިތްތަކުގައި ﷲ ސުބުހާނަހޫ ވަތައާލާގެ ހަޟްރަތަށް އޮންނަ އީމާންކަމާއި ލޯބި އިތުރުކުރަން ޖެހޭ،" މައުމޫން ވިދާޅުވި އެވެ.

އެ މަނިކުފާނު ވިދާޅުވީ، ނޮވެމްބަރު 3 ވަނަ ދުވަހު ލިބޭ އެއް ފިލާވަޅަކީ ދިވެހިންގެ އެއްބައިވަންތަކަން ނުގުޑާ އަޒުމެއްގެ މަތީގައި ދެމެހެއްޓުމުގެ މުހިންމުކަން ކަމަށެވެ.

"ދުނިޔޭގެ ކަންތައް ބަދަލުވާ ގޮތުން ރާއްޖޭގެ ގައުމީ މަސްރަހަށް ބަދަލުތަކެއް އައި ނަމަވެސް އަދި ޒަމާނާ އެކަށީގެންވާ ގޮތަކަށް ރާއްޖޭގެ ގާނޫނުތަކާއި ގަވާއިދުތައް ބަދަލުވަމުން ދިޔަ ނަމަވެސް ރާއްޖޭގައި ސިޔާސީ ޕާޓީތަކެއް އުފެދިގެން ހިނގަމުން ދިޔަ ނަމަވެސް މިއިން އެއްވެސް ކަމެއްގެ ސަބަބުން އަޅުގަނޑުމެންގެ ގައުމީ ވަހުދަތަށް އެއްވެސް އުނިކަމެއް އައިސްގެން ނުވާނެ،" މައުމޫން ވިދާޅުވި އެވެ.

އެ މަނިކުފާނު ވިދާޅުވީ، ސިޔާސީ ކަންކަމަށް ވުރެ ބޮޑަށް ގައުމީ އުސޫލުތަކަށް އަބަދުވެސް އިސްކަންދޭން ޖެހޭނެ ކަމަށެވެ. ނޮވެމްބަރު 3 ގެ އުދުވާނީ ހަމަލާގެ ދުވަސްވަރު ވެސް ފެނުނީ ދިވެހިންގެ ވަރުގަދަ އެއްބައިވަންތަކަން ކަމަށާއި ސަރުކާރާ މެދު ހިތްހަމަ ނުޖެހުނު މަދު މީހުން ވެސް އެ ދުވަހު ތިބީ ސަރުކާރާ އެކު ކަމަށް މައުމޫން ވިދާޅުވި އެވެ.

"ރާއްޖެ އަށް ހަމަލަދިން ދުޝްމަނުންނަށް އެއްވެސް ދިވެއްސެއްގެ ފަރާތުން ކުޑަވެސް އެހީތެރިކަމެއް އެ ދުވަހަކު ނުލިބުނު. އެންމެ ކުޑަވެގެން ހޫނު ދުވަހެއްގައި ބޯލާނެ ފެންތައްޓެއްހާ ހިސާބު ވެސް ނުލިބުނު،" އެ މަނިކުފާނު ވިދާޅުވި އެވެ.

މައުމޫން ވިދާޅުވީ، ނޮވެމްބަރު 3 ވަނަ ދުވަހު ދެން ފެނުނީ ދިވެހިންގެ ހިތްވަރު ކަމަށެވެ. ގައުމަށްޓަކައި ފުރާނަ އާއި ޖާނުން ގުރުބާން ވުމަކީ އަޅުގަނޑުމެންގެ ތެރޭގައި "ވަރަށް ފުނަށް ބިންވަޅު ނެގިފައިވާ" ހަގީގަތެއްކަން އެ ދުވަހު ސާބިތުވި ކަމަށް އެ މަނިކުފާނު ވިދާޅުވި އެވެ.

މައުމޫން ވިދާޅުވީ، ރާއްޖެއަކީ ހަނގުރާމަ އަށް ތައްޔާރުވެފައި ނުވާ ގައުމަކަށް ވިޔަސް އަދި މާ ބާރުގަދަ ހަތިޔާރުތަކެއް ނޮވެމްބަރު 3 ވަނަ ދުވަހު ނެތަސް ދިވެހި ސިފައިން ހަނގުރާމަ ކުރަމުން އައީ ވަރަށް ގަދަ ހިތްވަރަކާ އެކު ކަމަށެވެ.

މައުމޫން މިރޭ އެދިވަޑައިގެންނެވި އެއްކަމަކީ ރާއްޖެ އަށް އެހީތެރިކަން ފޯރުކޮށްދޭ ބައިނަލްއަގްވާމީ ފަރާތްތަކާ އެކު އޮންނަ ގުޅުން ދެމެހެއްޓުމަށެވެ. ނޮވެމްބަރު 3 ވަނަ ދުވަހު ރާއްޖެ އަށް އެންމެ ފުރަތަމަ އެހީތެރިކަން ފޯރުކޮށްދިން އިންޑިއާގެ ސިފައިންނަށް ދިވެހިންގެ ޝުކުރު އަބަދުވެސް އޮންނާނެ ކަމަށް މައުމޫން ވިދާޅުވި އެވެ.

މައުމޫން ވިދާޅުވީ، ދިވެހިން އިސްލާމްދީން ގަބޫލުކުރިތާ 898 އަހަރު ވެއްޖެ ކަމަށާއި އިސްލާމީ ފަލަސްތީނުގެ ރައްޔިތުން ހާއްސަކޮށް ޣައްޒާގެ ރައްޔިތުން ތަހައްމަލުކުރާ ކަންކަަމާ މެދު ހިތާމަކޮށް، ނަސްލު ނައްތާލަން އިޒްރޭލުން ހިންގާ ލާއިންސާނީ އަމަލުތައް ކުށްވެރި ކުރަންޖެހޭނެ ކަމަށެވެ.