ވަފާތެރި ލަޝްކަރެއް އޮތްކަން ދުނިޔެއަށް ދައްކަންވީ ވަގުތު ޖެހިއްޖެ: ޣައްސާން

ގައުމަށް ވަފާތެރި ލަޝްކަރެއް އޮތްކަން ދުނިޔެ އަށް ދައްކަންވީ ވަގުތު ޖެހިއްޖެ ކަމަށް ޑިފެންސް މިނިސްޓަރު ޣައްސާން މައުމޫން ރޭ ވިދާޅުވެއްޖެ އެވެ.

މި އަހަރުގެ ނަސްރުގެ ދުވަސް ފާހަގަކުރަން ބޭއްވި ރަސްމީ ޖަލްސާގައި ޣައްސާން ވިދާޅުވީ މިއީ ހަގީގަތްތަކުގެ މައްޗަށް ފިކުރު ކުރަންވީ ދުވަސް ކަމަށެވެ. އޭގެ ތެރެއިން ރައީސް ޑރ. މުހައްމަދު މުއިއްޒު ގެނެސްދެއްވާ ޒަމާނީ ވަސީލަތްތައް ވިލަރެސްކުރަން ޖެހޭ ކަމަށާއި މިއަދަކީ ގައުމަށް ވަފާތެރި އަމުރަށް ކިޔަމަންތެރި، ދިވެހިންގެ ލަޝްކަރެއް އޮތްކަން ދުނިޔެއަށް ދައްކަންވީ ވަގުތު ކަމަށް އޭނާ ވިދާޅުވި އެވެ.

ޣައްސާން ވިދާޅުވީ ދިވެހި އަސްކަރިއްޔާ ދެމިއޮތްހާ ހިނދަކު ރާއްޖޭގެ މިނިވަންކަމަށް ސިފައިން ގުރުބާން ވާނެ ކަމަށެވެ.

"..ސިޔާދަތާއި އިސްތިގުލާލް ސިފައިންގެ ހުވާގައިވާ ގޮތުގެ މަތިން ލެއާ ފުރާނައިން ގުރުބާން ވެގެން ހިމާޔަތް ކުރާނެކަން." އޭނާ ވިދާޅުވި އެވެ.

ރާއްޖޭގެ ގާނޫނީ ވެރިކަން ވައްޓާލަން ހ. ހާޖަރާގެ އަބްދުﷲ ލުތުފީ އާއި ސ. ހިތަދޫ ޕެރިސްހޮލިޑޭ އަހުމަދު ނާސިރު އަޑީގައި ތިބެގެން ސްރީ ލަންކާގެ ޓެރަރިސްޓުންގެ ބަޔަކު ގޮވައިގެން ނޮވެމްބަރު 3، 1988 ގައި މާލެ އަރައި ދިން ހަމަލަތަކުގައި 19 ދިވެހިން ޝަހީދުވި އެވެ. އެއީ ސިފައިންގެ 8 މީހުންނާއި އާންމުންގެ 11 މީހެކެވެ.

ޣައްސާން ވިދާޅުވީ ރާއްޖެ ތަރައްގީގެ މަގުން ކުރިއަރައިގެން ދަނިކޮށް ދިން އެ ހަމަލާއަކީ އަސްކަރިއްޔާގެ ގާބިލްކަން ވަރުގަދަކުރަންވީ ކަމުގެ ރަނގަބީލަށް ކަމަށެވެ. އެ މަސައްކަތް އޭރު ފަށައި، 20 އަހަރު ހުއްޓިފައި އޮތުމަށް ފަހު، އާ ބާރަކާއި ރޫހަކާ އާ ޖޯޝަކާ އެކު އަލުން ފެށީ އޭގެ 15 އަހަރު ފަހުން މިދިޔަ އަހަރުގެ ނޮވެމްބަރު 17 މިހާރުގެ ރައީސް ޑރ. މުހައްމަދު މުއިއްޒު ވެރިކަމާ ހަވާލުވެވަޑައިގެންނެވި ހިސާބުން ކަމަށް ޣައްސާން ވިދާޅުވި އެވެ.

އޭނާ ވިދާޅުވީ ޝަހީދު ހުސެއިން އާދަމް އަމިއްލަ ފުރާނަ އަށް ބެލުމެއް ނެތި ދެމުންދިޔަ ހަމަލާތަކުގައި ދުޝްމަނުން ވީ ފުއްލާ އައިނެއްގެ ތެރެއަށް ކުއްލިއަކަށް ބޮޑު ސިންގާއެއް ފުންމާލީމަ ލިބޭ ސިހުން ކަމަށެވެ.

އަސްކަރީ ގާބިލްކަން އިތުރުކުރަން ސިފައިންގެ ވެރިޔާ، ރައީސް މުއިއްޒު ކުރައްވާ މަސައްކަތްޕުޅުތަކަށް ޣައްސާން ވަނީ ޝުކުރު އަދާކުރައްވައިފަ އެވެ.