ވިޔަފާރީގެ ބޭނުމަށް ބުޅާ އެތެރެކުރުން ވަގުތީ ގޮތުން މަނާކުރަނީ

ވިޔަފާރީގެ އުސޫލުން ވިއްކަން ރާއްޖެ އެތެރެކުރާ ބުޅާތައް، ވަގުތީ ގޮތުން މަނާކުރަން ނިންމާފައިވާ ކަމަށް އެނިމަލް ވެލްފެއާ މިނިސްޓަރު ޑރ. އައިޝަތު ރަމީލާ ވިދާޅުވެއްޖެ އެވެ.

ދައުލަތުގެ މީޑިއާގެ ޕްރޮގްރާމެއްގައި މިނިސްޓަރު ރަމީލާ ވިދާޅުވީ ޖަނަވާރުންގެ ރައްކާތެރިކަމާ ބެހޭ ބިލް މިހާރު ޑްރާފްޓް ކޮށްފައި ވާއިރު، ޕެޓްގެ ގޮތުގައި ގެންނަ ދިރޭތަކެތި ރާއްޖެ އެތެރެކުރުން ކޮންޓްރޯލް ކުރެވޭނެ ގޮތްތަކެއް އެ ބިލްގައި ހިމަނާފައި ކަމަށެވެ. އަދި މަގުތަކުގައި އުޅޭ ހުރިހާ ބުޅާތަކެއް ބުޅާ ފެސިލިޓީއަށް ބަދަލު ކުރުމުން، ވިޔަފާރީގެ އުސޫލުން ރާއްޖެއަށް ބުޅާ އެތެރެކުރުން ވަކި މުއްދަތަކަށް މަނާކުރާނެ ކަމަށް ރަމީލާ ވިދާޅުވި އެވެ.

މިނިސްޓަރު ވިދާޅުވީ ހުޅުމާލޭގައި ގާއިމުކޮށްފައިވާ "އޮޅު ހިޔާ" ގެ މަސައްކަތް ރަނގަޅަށް ފެށުމުން އާންމުންނަށް އެތަނުން ބުޅާ އެޑޮޕްޓްކުރަން ވެސް ކުރެވޭނެ ކަމަށެވެ. އަދި ބުޅާ އެތެރެ ކުރުމުގެ ފުރުސަތު އޮއްވާ އެޑޮޕްޝަނަށް ހުޅުވާލުމުން ބުޅާ ރާއްޖެ އެތެރެކުރާ މިންވަރު އިތުރުވާނެ ކަމަށާއި އޭގެ ސަބަބުން ގެންނަން ބޭނުންވާ ނަތީޖާ ނުނެރެވޭނެ ކަމަށް ވިދާޅުވި އެވެ.

"އެ ބިލްގައި [ޖަނަވާރުންގެ ރައްކާތެރިކަމާ ބެހޭ ބިލު] ވާނީ ޕެޓްގެ ގޮތުގައި ރާއްޖެއަށް އެތެރެކުރެވޭ އެއްޗެއްސަށް ކޮންޓްރޯލް މެކޭނިޒަމެއް ލާނެ ގޮތް ވެސް އެބަ އޮވޭ. އެހެންވީމަ މިހާރުގެ ޕްލޭންގައި އެބަ އޮތް ހުރިހާ ބުޅާތައް ޕެޓްކެއާ ފެސިލިޓީއަށް ނެގީމަ، ކޮންމެވެސް މުއްދަތަކަށް ވިޔަފާރީގެ އުސޫލުން ވިއްކުމަށްޓަކައި ބުޅާ އެތެރެކުރުން ހޯލްޑްކުރާނީއޭ،" ރަމީލާ ވިދާޅުވި އެވެ.

"އޭރުން ބުނާ ޕެޓްގެ ގޮތުގައި ނަގާނީ ފެސިލިޓީން. އެކަމަކު އަމިއްލަ ފަރާތަކުން ޕެޓްގެ ގޮތުގައި ގެނައުން މައްސަލައެއް ނޫން. އެކަމަކު ވިއްކުމަށް ބުޅާ އެތެރެކުރުން ކޮންމެވެސް ވަރަކަށް ހޯލްޑް ކުރާނަން."

މިދިޔަ ހޮނިހިރު ދުވަހު ހުޅުމާލޭ 2 ގައި ހުޅުވި ބުޅާ ފެސިލިޓީއަކީ ވަގުތީ ތަނެކެވެ.

ބުޅާތަކަށް ހަތަރު ފްލޯގެ ދާއިމީ އިމާރާތެއް އެޅުމުގެ މަސައްކަތް ފަށާނީ އަންނަ އަހަރު އެވެ. މިނިސްޓަރު ވިދާޅުވި ގޮތުގައި އެކަމަށް ފިނޭންސް މިނިސްޓްރީގެ ހުއްދަ ވެސް ވަނީ ލިބިފަ އެވެ. އަދި ގޭގައި ބުޅާ ގެންގުޅޭ މީހުން، ދަތުރެއް ދާން ޖެހިއްޖެ ނަމަ، އެނބުރި އަންނަންދެން އެތަނުން ބުޅާ ބަލަހައްޓައިދޭނެ ކަމަށް އޭނާ ވިދާޅުވި އެވެ.

މިހާރު ގާއިމުކޮށްފައިވާ ބުޅާ ފެސިލިޓީއަށް ގެންދާ ފުރަތަމަ ބެޗުގެ ބުޅާތައް މި ހަފްތާގެ ތެރޭގައި މާލެ ތެރެއިން ނަގަން ފަށާނެ އެެވެ.

މިނިސްޓަރު ވިދާޅުވި ގޮތުގައި މާލޭ ސަރަހައްދުގައި 4000 އަށް ވުރެ ގިނަ ބުޅާ އުޅޭއިރު އޭގެ ތެރޭގައި ހުރީ އެކި ހާލަތްތަކުގައި ހުރި ބުޅާތަކެވެ. އެހެންވެ، އެއް ފަހަރާ ހުރިހާ ބުޅާތަކެއް ނެގުމަކީ އެހާ ފަސޭހަ އަދި ރައްކާތެރި ކަމެއް ނޫން ކަމަށް މިނިސްޓަރު ވިދާޅުވި އެވެ.

މިނިސްޓަރު ވިދާޅުވި ގޮތުގައި މި ބުޅާތައް ފެސިލިޓީއަށް ގެންދިއުމަށް ހާއްސަ ޕްލޭނެއް ވަނީ ހަދައިފަ އެވެ. އެ ޕްލޭނުގެ ދަށުން، އެކި ބެޗުތަކަށް ބަހާލައިގެން ބުޅާތައް ނަގަން ނިންމާފައިވާއިރު އެ ބުޅާތަކުގެ ސިއްހީ މައްސަލަތައް ދެނެގަނެ ފަރުވާ ދެވޭނެ ކަމަށް ވިދާޅުވި އެވެ.

މި ބުޅާތައް ފެސިލިޓީއަށް ގެންދިއުމަށްފަހު ރަޖިސްޓްރީ ކުރާނެ އެވެ. އަދި ބުޅަލުގެ އާބާދީ ދަށް ކުރުމަށް ނުވިހާ އޮޕަރޭޝަން ކުރާނެ ކަމަށް ވެސް ރަމީލާ ވިދާޅުވި އެވެ.

އެ ފެސިލިޓީގައި ގާއިމް ކޮށްފައިވާ ކްލިނިކުން އެހެން ޖަނަވާރުންނަށް ވެސް ފަރުވާ ދެވޭނެ ކަމަށް މިނިސްޓަރު ވިދާޅުވި އެވެ.