އޮޅުހިޔާ ހުޅުވިތާ ތިން މަސް ފަހުން ބުޅާ ގެންދަން ފަށައިފި

ހުޅުމާލޭގައި ހަދާފައިވާ އޮޅުހިޔާ ހުޅުވިތާ ތިން މަސް ފަހުން އެ ތަން މިދިޔަ ހަފުތާގެ ބުދަ ދުވަހު އެނިމަލް ވެލްފެއާ މިނިސްޓްރީއާ މާލެ ސިޓީ ކައުންސިލުން ހަވާލު ކުރުމާ އެކު، ބުޅާތައް ގެންދަން ފަށައިފި އެވެ.

މާލެ ސަރަހައްދުގެ މަގުތަކުގައި އުޅޭ ބުޅާތައް ބަލަހައްޓަން ވަކި ސެންޓަރެއް ހެދީ ސިޓީ ކައުންސިލުންނެވެ. އެކަމަކު، އެ ތަނަށް ބުޅާތައް ބަދަލުކުރަން ތައްޔާރުވެފައި ވަނިކޮށް އެނިމަލް ވެލްފެއާ މިނިސްޓްރީގެ ދަށަށް ބަދަލުކުރަން ކެބިނެޓުން ނިންމުމުން އޮޅު ހިޔާ ބޭނުން ނުކުރެވި ދިގުލައިގެން ދިޔަ އެވެ.

މަގުތަކުގައި އުޅޭ ބުޅާތައް އޮޅުހިޔާ އަށް ބަދަލުކުރަން ސިޓީ ކައުންސިލުން ފެށުމުން ދިރޭތަކެއްޗާ ބެހޭ މިނިސްޓްރީން އޭރު ވަނީ އެ ފެސިލިޓީގައި ހުންނަން ޖެހޭ ހުރިހާ ހިދުމަތެއް ފުރިހަމަ ނުވާ ކަމަށް ބުނެ، އެ މަސައްކަތް ވަގުތުން ހުއްޓާލަން ވެސް އަންގައިފަ އެވެ.

ނަމަވެސް، އެ ހިޔާގައި ހުރި ތަކެއްޗާ އެކު، އެނިމަލް ވެލްފެއާ މިނިސްޓްރީގެ ދަށަށް ބަދަލުކުރަން މިދިޔަ ބުދަ ދުވަހު ވަނީ ސޮއިކޮށްފަ އެވެ.

އެނިމަލް ވެލްފެއާ މިނިސްޓްރީން މިއަދު ބުނީ އޮޅު ހިޔާ ފެސިލިޓީއާ ރަސްމީކޮށް ހަވާލުވިތާ 16 ގަޑިއިރުގެ ތެރޭގައި، އާ ކަރަންޓީނު ސަރަހައްދަށް ބޭނުންވާ ވަސީލަތްތައް ހޯދައި، ހުރިހާ ކަމެއް ފުރިހަމަކޮށްފައިވާ ކަމަށެވެ. އަދި މިހާތަނަށް 15 ބުޅާ ގެންގޮސްފައިވާ ކަމަށް ބުންޏެވެ.

އެ މިނިސްޓްރީގެ އޮފިޝަލަކު ވިދާޅުވީ މި ވަގުތު ބުޅާ ގެންދަނީ ވަކި ސަރަހައްދުތަކުން ކަމަށެވެ. މީހުންގެ އަތުން ބުޅާ ގެންދަން ފަހުން ފަށާނެ ކަމަށް އޮފިޝަލް ވިދާޅުވި އެވެ.

އެ ހިޔާގައި މި ވަގުތު ހަތަރު މީހުން މަސައްކަތްކުރެ އެވެ. އެއީ ޖަނަވާރުގެ ޑޮކްޓަރަކާއި އިދާރީ ތިން މުވައްޒަފުންނެވެ. ނަރުހުންނާއި އެހީތެރިކަން ދިނުމަށް ދެން އުޅޭނީ ހިލޭ ސާބަހަށް މަސައްކަތްކުރާ ބައެކެވެ.

ސިޓީ ކައުންސިލުން ކުރިން ނިންމާފައި އޮތީ މާލޭގައި އުޅޭ 2،000-3،000 ބުޅާ، ފެސިލިޓީއަށް ގެންގޮސް ބަލަހައްޓާށެވެ.