އެމެރިކާގެ ރިޔާސީ އިންތިހާބު: ފުރަތަމަ ލިބުނު ނަތީޖާތަކުން ޓްރަމްޕް ކުރީގައި

އެމެރިކާގެ ރިޔާސީ އިންތިހާބުގެ ވޯޓަށް ފަހު ނަތީޖާތައް ލިބެމުން ދާއިރު މިހާތަނަށް ސާފުކުރި ނަތީޖާއިން ކުރީގެ ރައީސް ޑޮނަލްޑް ޓްރަމްޕަށް ކުރި ލިބިއްޖެ އެވެ. އެކަމަކު ނަތީޖާ ބަދަލުވާ ބޮޑެތި ސްޓޭޓްތަކުގެ ވޯޓަށް ވާނެ ގޮތެއް އަދި ނޭނގޭތީ ނަތީޖާ ކޮންމެ ގޮތަކަށް ވެސް އެނބުރިދާނެ އެވެ.

މިހާތަނަށް ސާފުކުރި ނަތީޖާއިން ގިނަ ސްޓޭޓްތަކުން އަޣުލަބިއްޔަތު ހޯއްދަވާފައި ވަނީ ޓްރަމްޕެވެ. އެމެރިކާގައި ރައީސް އިންތިހާބުކުރަނީ ސްޓޭޓްތަކަށް ކަނޑައަޅާފައިވާ އިލެކްޓޮރަލް ވޯޓުން ކަމަށް ވާއިރު މި ސްޓޭޓްތަކުގެ އިލެކްޓޮރަލް ވޯޓުގެ އަދަދު 227 އަށް އަރަ އެވެ.

ނައިބު ރައީސް ކަމަލާ ހެރިސް އަށް މިހާތަނަށް ކާމިޔާބު ކުރެއްވުނު ސްޓޭޓްތަކުން ލިބިވަޑައިގަންނަވަނީ 153 އިލެކްޓޮރަލް ވޯޓެވެ.

ޕޮޕިއުލާ ވޯޓަށް ބަލާއިރު ވެސް ޓްރަމްޕް އުޅުއްވަނީ ކުރީގަ އެވެ. އެކަމަކު އެމެރިކާގެ ވޯޓު ލުމުގެ ނިޒާމު އޮންނަ ގޮތުން މިއީ އިންތިހާބު ކާމިޔާބުކުރުމަށް މުހިންމު އަދަދެއް ނޫނެވެ.

ޓްރަމްޕް މިހާތަނަށް ވަނީ 20 ސްޓޭޓަކުން ކާމިޔާބުކުރައްވައިފަ އެވެ. އޭގެ ތެރޭގައި ޓެކްސަސް އާއި އޮހާޔޯ ފަދަ ސްޓޭޓްތައް ހިމެނެ އެވެ. ކަމަލާއަށް ނުވަ ސްޓޭޓަކުން ކުރި ލިބިވަޑައިގެންފައިވެ އެވެ. އެއީ ކޮލަރާޑޯ، ޑެލަވެއާ، އިލިނޯއި، މެރީލޭންޑް، މެސެޝޫސެޓްސް، ނިއު ޔޯކް، ރޯޑް އައިލެންޑް، ވާމަންޓް، އެރިޒޯނާ އަދި ކެޕިޓަލް ސިޓީ ވޮޝިންޓަން ހިމެނެ އެވެ.

އިންތިހާބު ކާމިޔާބުވާނީ 538 އިލެކްޓޮރަލް ވޯޓުގެ ތެރެއިން 270 ލިބިގެންނެވެ.

މިފަހަރު އިންތިހާބުގައި ނަތީޖާ ކަށަވަރުވާނީ ވާދަވެރިކަން އެންމެ ބޮޑު ދެތިން ސްޓޭޓެއްގެ ނަތީޖާއާ ހިސާބުން ކަމަށް ތަޖުރިބާކާރުން ގަބޫލުކުރައްވަ އެވެ.

އިލެކްޓޮރަލް ވޯޓު ގިނަ މުހިންމު ސްޓޭޓްތަކުގެ ނަތީޖާ ލިބުން މިފަހަރު ލަސްވެދާނެ ކަމަށާއި ވާދަވެރިކަން ބޮޑުކަމުން، ވޯޓު ގުނުމާއި އެކަމާ ގުޅޭ އެހެން ޝަކުވާތައް ގިނަވެ މުޅި ޕްރޮސެސް ލަސްވުން އެކަށީގެންވާ ކަމަށް ވަނީ ބެލެވިފަ އެވެ.

އެމެރިކާގައި ވޯޓުލުމުގެ ނިޒާމު އޮންނަ ގޮތުން ވޯޓު ލަނީ ސީދާ ކެންޑިޑޭޓަކަށް ނޫނެވެ. އިންތިހާބުގައި ހޮވަނީ 538 މެންބަރުންގެ މައްޗަށް އެކުލެވޭ އިލެކްޓޮރަލް ކޮލެޖެވެ.

އިލެކްޓޯރަލް ވޯޓުގެ އަދަދު ސްޓޭޓަށް ކަނޑައަޅާފައި އޮންނަނީ އެ ސްޓޭޓެއްގެ ސެނެޓަރުންގެ އަދަދާއި ރެޕްރެޒެންޓެޓިވްސްގެ އަދަދު - އާބާދީއަށް ބިނާކޮށެވެ. އެއީ އެ ހުރިހާ އަދަދެއްގެ ޖުމްލަ އެވެ.

އެންމެ ވޯޓެއްގެ ފަރަގުން ސްޓޭޓްގެ އަޣުލަބިއްޔަތު ލިބޭ ކެންޑިޑޭޓަށް މުޅި ސްޓޭޓްގެ ހުރިހާ އިލެކްޓޮރަލް ވޯޓެއް ލިބޭނެ އެވެ.

އެމެރިކާގައި ވޯޓުލުމުގެ ހައްގު ލިބިފައިވާ 230 މިލިއަނަށްވުރެ ގިނަ މީހުން އެބަތިބި ކަމަށް އަންދާޒާ ކުރެވެ އެވެ. އެކަމަކު ވޯޓުލާން ރަޖިސްޓްރީކޮށްފައިވަނީ އޭގެ ތެރެއިން ގާތްގަނޑަކަށް 160 މިލިއަން މީހުންނެވެ. އަދި ރަޖިސްޓްރީކޮށްފައިވާ އެންމެންނަކީ ވެސް ވޯޓުލާނެ މީހުންނެއް ނޫނެވެ. އެންމެ ފަހުން 2020 ވަނަ އަހަރުގެ އިންތިހާބުގައި 66 ޕަސެންޓް މީހުން ވޯޓުލާފައި ވާއިރު އެއީ މިދިޔަ ބައި ގަރުނު ތެރޭ އެމެރިކާގައި އެންމެ ގިނަ މީހުން ވޯޓުލީ ފަހަރެވެ.