20 އަހަރުގެ މާސްޓަޕްލޭނަށް މަޝްވަރާ ހޯދަން ފަށައިފި

ރާއްޖެ ތަރައްގީ ކުރުމަށްޓަކައި ކުރިއަށް އޮތް 20 އަހަރަށް އެކުލަވައިލާ މާސްޓަ ޕްލޭނަށް މަޝްވަރާ އާއި ހިޔާލު ހޯދުމުގެ މަސައްކަތްތައް މިއަދު ރަސްމީކޮށް ފަށައިފި އެވެ.

ދެމެހެއްޓެނިވި ގޮތެއްގައި ރާއްޖެ ތަރައްގީ ކުރުމަށްޓަކައި 20 އަހަރުގެ މާސްޓަ ޕްލޭނެއް އެކުލަވައިލުމަކީ ރައީސް ޑރ. މުހައްމަދު މުއިއްޒުގެ ރިޔާސީ ވައުދެކެވެ.

އެ މާސްޓަ ޕްލޭނަށް ހިޔާލު ހޯދުމުގެ ކަންކަން ފެށުމަށް ސޯޝަލް ސެންޓަރުގައި މިއަދު ބޭއްވި ރަސްމިއްޔާތުގައި ރައީސް ވިދާޅުވީީ، އެ މަނިކުފާނުގެ އަމާޒަކީ 2040 ވަނަ އަހަރު އަންނަންވާއިރަށް ރާއްޖެ އަށް ތަރައްގީ ވެފައިވާ ގައުމެއްގެ ދަރަޖަ ހޯދައިދިނުން ކަމަށެވެ

ރައީސްގެ އަމާޒަކީ އެ ޕްލޭންގެ މަސައްކަތް އަންނަ އަހަރުގެ ނޮވެމްބަރު މަހަށް ނިންމުމެވެ.

އެ މަނިކުފާނު ވިދާޅުވީ، ތައުލީމާއި ސިއްހީ އަދި އިޖުތިމާއީ ތަރައްގީގެ ކަންކަން ވެސް ރައްޔިތުން ބޭނުންވާ ހިސާބަކަށް ގެންދިއުމަށް ގައުމީ ޕްލޭންގައި އޭގެ ފުރިހަމަ މިސްރާބުތައް ކިޔައިދޭނެ ކަމަށެވެ. އަދި 2040 އަންނަ އިރު ރާއްޖޭގެ އުފެއްދުންތެރިކަމުގެ ނިސްބަތް އިތުރުކޮށް ރާއްޖެއަކީ "ޑިވެލޮޕްޑް ނޭޝަން" އެއްގެ ސްޓޭޓަސް ހޯދައިދޭން ވަރަށް ބޮޑަށް ބޭނުންފުޅުވާ ކަމަށް ވިދާޅުވި އެވެ.

ރައީސް މުއިއްޒު ވިދާޅުވީ، ތަރައްގީގެ ޕްލޭން އެކުލަވައިލާނީ ދުނިޔެ އަށް އަންނަ ޒަމާނީ ބަދަލުތައް ވެސް ހިމަނައިގެން ކަމަށެވެ

އެ މަނިކުފާނު ވިދާޅުވިގޮތުގައި، ގައުމުގެ ތަރައްގީގެ ޕްލޭންގެ މަސައްކަތް ކުރާއިރު ރާއްޖޭގެ ޑިޖިޓަލް އިކޮނޮމީ މިހާރަށް ވުރެ ފުޅާކޮށް، 2030 ގައި އުފެއްދުންތެރިކަމުގެ ނިސްބަތުން 15 ޕަސެންޓަށް ކުރިއަށް ގެންދިއުމަށް ވަނީ އަމާޒު ހިފައިފަ އެވެ.

ރައީސް ވިދާޅުވީ، ގައުމު ކުރިއަށް ގެންދިއުމުގައި ދުރުރާސްތާ ޕްލޭނެއް ވަރަށް މުހިއްމު ކަމަށެވެ. ވިދާޅުވީ، ސިޔާސީ އޮއިވަރުގައި ޖެހިގެން، އެ އިރެއްގެ އޮންނަ ސަރުކާރަކުން އަބަދު ބަދަލުތައް އަންނަ ގޮތަށް ކަންކަން ކުރިއަށް ގެންދާ ނަމަ ރައްޔިތުންނަށް އެންމެ ހެޔޮ ގޮތް ނުލިބިދާނެ ކަމަށެވެ.

"ރައްޔިތުން ކަނޑައަޅާފައި އޮންނަ މަގަކުން ދާން ބޭނުންވާ މިސްރާބަށް ދެވޭ ގޮތަށް ކަންތައްތައް ބައްޓަން ކުރެވިއްޖިއްޔާ އެންމެ ރަނގަޅަށް ރައްޔިތުންނަށް ފައިދާވާނެ،" ރައީސް ވިދާޅުވި އެވެ.

ރައީސް ވިދާޅުވީ، ތަރައްގީގެ ޕްލޭނާ އެކު، ގައުމީ ތަރައްގީއާ ގުޅޭ ގާނޫނެއް އެކުލަވައިލުމުގެ މަސައްކަތް ވެސް ކުރާނެ ކަމަށެވެ. އެ މަނިކުފާނު ވިދާޅުވީ، މިފަދަ ޕްލޭނެއްގެ ބޭނުމަކީ، ރައްޔިތުން ބޭނުންވާ ގޮތަށް ގައުމީ ތަރައްގީގެ ކަންކަން ރޭވުން ކަމަށެވެ.

ބޭނުންފުޅު ވަނީ ގައުމަށް އިތުރު ތަރައްގީތައް ގެނެސް، ވަޒީފާގެ ފުރުސަތުތައް އިތުރުކޮށް، ރައްޔިތުންގެ ފުދުންތެރިކަން އިތުރު ކުރުން ކަމަށް ރައީސް ވިދާޅުވި އެވެ.

"އެ ގާނޫނަކީ ގާނޫނުއަސާސީގައި ވެސް ރިކޮގްނައިޒް ކުރާ، ކަމަކަށް ހެދުމަށްޓަކައި ގާނޫނުއަސާސީ އަށް ވެސް އިރާދަކުރެއްވިޔާ އިސްލާހެއް ގެންނަން ނިންމާފައި މި އޮތީ،" ރައީސް ވިދާޅުވި އެވެ.

އެ ހިސާބަށް ދެވޭ ވަރަށް ގިނަ ދާއިރާތަކުން ކަންކަން ރަނގަޅު ކުރަން ޖެހޭ ކަމަށް ރައީސް ވިދާޅުވި އެވެ. އެ ޕްލޭނާ ގުޅޭ ގޮތުން ހުރިހާ ރަށެއްގައި ވެސް މަޝްވަރާތައް ކުރައްވާނެ ކަމަށް ވެސް އެ މަނިކުފާނު ވިދާޅުވި އެވެ.

"އަޅުގަނޑު އެދެން ހުރިހާ ސިޔާސީ ޕާޓީތަކުން ވެސް، ސިޔާސީ ވިސްނުން ދޫކޮށްލައްވައި ގައުމީ މަސައްކަތުގައި ބައިވެރިވާން. ކުރިއަށް އޮތް ޖީލުގެ ތަސައްވަރު ކަނޑައަޅަން އަޅުގަނޑުމެން މި އުޅެނީ،" ރައީސް މުއިއްޒު ވިދާޅުވި އެވެ.