މޭރީގެ މަރު: ލަމްހާ ބަންދުން ދޫކޮށްލަން އަނެއްކާވެސް އެދިއްޖެ

އައިޖީއެމްއެޗްގައި މަސައްކަތްކުރި ފިލިޕީންސްގެ ނަރުހެއް ކަމަށްވާ މޭރީ ގްރޭސްގެ މަރުގެ ދައުވާ ލިބޭ ހަލީމަތު ލަމްހާ ޖަލު ބަންދުން ދޫކުރަން އޭނާގެ ފަރާތުން އަނެއްކާވެސް ކްރިމިނަލް ކޯޓުގައި މިއަދު އެދިއްޖެ އެވެ.

އޮކްޓޫބަރު، 2021 ގައި މޭރީ މަރާލި މައްސަލާގައި އޭނާގެ ފިރިމީހާ މާވިންގެ މައްޗަށް ދައުވާ ކުރާއިރު ލަމްހާގެ މައްޗަށް ކުރަނީ އެކަމުގައި ބައިވެރިވުމުގެ ދައުވާ އެވެ. އެ މައްސަލާގައި ގިނަ ދުވަސްތަކެއް ވަންދެން ލަމްހާ ބަންދުގައި ބެހެއްޓުމަށްފަހު މިދިޔަ އަހަރުގެ ފަހުކޮޅު ކްރިމިނަލް ކޯޓުން ޝަރުތުތަކާ އެކު އޭނާ ދޫކުރި އެވެ.

އެ މައްސަލަ ދައުލަތުން ހައި ކޯޓުގައި އިސްތިއުނާފު ކުރުމުން، ލަމްހާ ބަންދުން ދޫކޮށްލީ ގޯސްކޮށް ކަމަށް ކަނޑައަޅައި، އޭނާ އަލުން ބަންދު ކުރަން ހައި ކޯޓުން އެންގި އެވެ. ޝަރީއަތް ނިމެންދެން ބަންދުކޮށްފައި ހުރި ލަމްހާގެ ބަންދު ރިވިއު ކުރަން މިދިޔަ މަހު ކްރިމިނަލް ކޯޓަށް ހުށަހަޅާފައިވެ އެވެ.

ކްރިމިނަލް ކޯޓުގައި މިއަދު ބޭއްވި އަޑުއެހުމުގައި އޭނާގެ ވަކީލް އަހުމަދު ޔާމީން ވިދާޅުވީ ލަމްހާ ބަންދުގައި ބަހައްޓަން ޖެހޭ ސަބަބެއް އޮތް ކަމަށް ގަބޫލު ނުކުރެވޭ ކަމަށާއި އަދި ބަންދު ދިގުލައިގެން ދިޔުމުގެ ސަބަބުން އޭނާގެ ހައްގުތައް ގެއްލެމުންދާ ކަމަށެވެ.

ޝަރީއަތް ނިމެންދެން ބަންދު ކުރަން ހައި ކޯޓުން ކުރިން އަމުރުކުރީ ޝަރީއަތުގައި ހެކިބަސް ނަގަމުންދާތީ، ދެން އިތުރަށް އަޑުއެހުންތައް ދިގުލައިގެން ނުދާނެ ކަމަށް ގަބޫލުކުރާތީ ކަމަށް ޔާމީން ވިދާޅުވި އެވެ. އެކަމަކު ދަށު ކޯޓުގައި ޝަރީއަތުގެ އަޑުއެހުންތައް އެންމެ އެކަށީގެންވާ ގޮތުގައި ކުރިއަށް ނުދާ ކަމަށާއި ހެކިބަސް ނެގުމުން ވެސް ލަސްވެފައިވާ ކަން އޭނާ ފާހަގަ ކުރެއްވި އެވެ.

އޭގެ ސަބަބުން ލަމްހާގެ ހައްގުތައް ގެއްލޭތީ، ވަކީލް އެދިވަޑައިގަތީ އޭނާގެ ބަންދަށް ލުޔެއް ދިނުމަށެވެ.

ނަމަވެސް، ދައުލަތުން ވަނީ ލަމްހާގެ ބަންދަށް ލުއި ދިނުމާ މެދު ދެކޮޅު ކަމަށް ބުނެފަ އެވެ. ދައުލަތުގެ ވަކީލް ވިދާޅުވީ ލަމްހާ ބަންދުކޮށްފައި ހުރީ މުޖުތަމައުއަށް ނުރައްކާވާ ފަދަ ހާލަތްތަކެއް އޮތުމުން ކަމަށާއި އެ ހާލަތްތައް މިހާރު ވެސް ދެމި އެބަ އޮތް ކަމަށެވެ. އަދި އޭނާއަކީ ޖިނާއީ ބޮޑު ކުށެއްގެ ތުހުމަތުވާ އަދި ޖައާމަތް ހަދައިގެން ކުށް ކުރުމުގެ ތުހުމަތު އޮތް މީހެއް ކަން ދައުލަތުގެ ވަކީލް ފާހަގަ ކުރެއްވި އެވެ.

ދައުލަތުން ވަނީ ލަމްހާ ގޭ ބަންދަށް ބަދަލު ކުރުމަށް ވެސް އިންކާރުކުރާ ކަމަށް ބުނެފަ އެވެ.

ދެ ފަރާތުން ދެއްކި ވާހަކަތައް އަޑުއެއްސެވުމަށް ފަހު، އެ މައްސަލަ ބައްލަވާ ގާޒީ ހުސެއިން ފާއިޒް ރަޝާދު ވަނީ ލަމްހާގެ ބަންދާ މެދު މާދަމާ ގޮތެއް ނިންމަވާނެ ކަމަށެވެ.