އާސަންދަ ނިޒާމަށް ބޮޑު ބަދަލެއް: އެންމެ މުއްސަނދިންގެ އަތުން ވަކި އަދަދެއް ނަގަނީ

ދައުލަތުގެ ހަރަދުގައި ހިލޭ ބޭސްފަރުވާ ކޮށްދޭ ނިޒާމު އާސަންދަ އަށް ކުރާ ހޭދަ ކުޑަކުރުމަށްޓަކައި އެންމެ މުއްސަނދިން އަންނަ އަހަރުން ފެށިގެން ވަކި އަދަދެއް އެ ނިޒާމަށް ދައްކަންޖެހޭ ޖެހޭ ގޮތަށް ބަދަލު ގެންނަން ސަރުކާރުން ނިންމައިފި އެވެ.

ދައުލަތުން ދޭ ސަބްސިޑީ އާއި އެހީތަކުގެ ތެރެއިން އެންމެ ބޮޑު ހޭދައެއް ކުރަން ޖެހެނީ އާސަންދަ ނިޒާމަށެވެ. އެހެންވެ، އެ ނިޒާމު އެންމެ ދެމެހެއްޓެނިވި ގޮތަކަށް ހިންގުމަށްޓަކައި އަންނަ އަހަރު ބޮޑެތި ބަދަލުތަކެއް ގެންނަން ސަރުކާރުން ވަނީ ކަނޑައަޅައިފަ އެވެ.

އަންނަ އަހަރަށް ލަފާކޮށް ރައްޔިތުންގެ މަޖިލިހަށް ހުށަހަޅާފައިވާ ބަޖެޓުގައިވާ ގޮތުން، އާސަންދައިގެ ހަރަދުތައް ދެމެހެއްޓެނިވި މިންގަނޑެއްގައި ހިފެހެއްޓުމަށްޓަކައި މުހިއްމު ދެ ބަދަލެއް އަންނަ އަހަރުގެ އޭޕްރީލް އިން ފެށިގެން ގެންނާނެ އެވެ. އެ ބަދަލުތަކާ އެކު، އާސަންދަ އިން 600 މިލިއަން ރުފިޔާއާ ގާތް ކުރާ އަދަދެއް އާސަންދައިން ކުޑަ ކުރެވޭނެ ކަމަށް ލަފާކުރެ އެވެ.

އެންމެ ގިނައިން އާމްދަނީ ލިބޭ މީހުންގެ އަތުން ކޮންޓްރިބިއުޝަނެއް ނަގަނީ

އަންނަ އަހަރަށް ލަފާކުރާ ބަޖެޓުގެ ތަފްސީލު ރިޕޯޓުގައިވާ ގޮތުން މަހަކު 60،000ރ. އަށް ވުރެ ބޮޑު އާމްދަނީ ލިބޭ ނުވަތަ އިންކަމް ޓެކްސް ދައްކަން ޖެހޭ މީހުންގެ އަތުން ވަކި އަދަދެއް ނަގަން ވަނީ ކަނޑައަޅައިފަ އެވެ. ފިނޭންސް މިނިސްޓްރީން ބުނީ، އެ ކޮންޓްރިބިއުޝަންގެ ސަބަބުން، މުޅި ނިޒާމު ޕްރޮގްރެސިވް ކުރެވި، އެންމެ ފަގީރު ހާލުގައި އުޅޭ މީހުންނަށް މާލީ ބުރައަކާ ނުލައި ސިއްހީ ހިދުމަތްތައް ލިބޭކަން ކަށަވަރު ކުރެވޭނެ ކަމަށެވެ.

"މިއީ ދެކުނު ކޮރެއާ ފަދަ ތަރައްގީ ވެފައިވާ ގިނަ ގައުމުތަކުގައި ކާމިޔާބު ކަމާ އެކު ތަންފީޒު ކުރަމުންދާ މޮޑެލްއެއް ކަމުގައިވާ އިރު ބައެއް ގައުމުތަކުން އެ ޕްރީ-ޕޭމެންޓް ނަގަމުން ދަނީ އިންކަމް ޓެކުހުގެ ފައިދާ ދައްކާ ވަގުތު ރެވެނިއު އޮތޯރިޓީއަށެވެ،" ބަޖެޓު ފޮތުގައި ވެ އެވެ.

އެންމެ މުއްސަދިންގެ އަތުން ފާމަސީތަކާއި ސަރުކާރުގެ ހޮސްޕިޓަލުތަކުން ހޯދާ ބައެއް ސިއްހީ ހިދުމަތްތަކަށް ވެސް ކޯ-ޕޭ ނިޒާމެއް ތައާރަފް ކުރުމަށް ޕްލޭން ކޮށްފައިވެ އެވެ.

އެންމެ ގިނައިން އާމްދަނީ ލިބޭ މީހުން އައުޓްޕޭޝަން ހިދުމަތްތައް ހޯދާ އިރާއި އެސެންޝަލް ނޫން ބޭސް ގަންނަ އިރު ބިލްގެ ވަކި މިންވަރެއް ކޮންޓްރިބިއުޝަނެއްގެ ގޮތުގައި ދައްކަން ޖެހޭ ގޮތަށް ބަދަލުކޮށް އަމަލު ކުރަން ވަނީ ނިންމައިފަ އެވެ. އެކަން ކުރާނީ އަމިއްލަ ޖީބުން އަހަރެއްގެ މައްޗަށް ގިނަވެގެން ހަރަދުކުރަން ޖެހޭނެ އެންމެ މަތީ މިންވަރުތައް ކަނޑައަޅައި، އެ އަދަދުގެ އިތުރަށް އަތުން ފައިސާ ދައްކަން ނުޖެހި މިހާރެކޭ ވެސް އެއްފަދައިން ހިދުމަތް ހޯދޭނެ އެވެ.

ފިނޭންސް މިނިސްޓްރީން ބުނިގޮތުގައި، ކޮންޓްރިބިއުޝަންގެ ނިސްބަތާއި އަހަރެއްގެ ތެރޭގައި ގިނަވެގެން ހަރަދު ކުރަން ޖެހޭ އަދަދު ކަނޑައަޅާފައިވަނީ އާމްދަނީގެ ގިނަތިއަށް ބަލައިގެންނެވެ. އިންކަމް ޓެކްސް ދައްކާ މީހުންނަށް ބަލައިގެން އެފަދަ ކޮންޓްރިބިއުޝަނެއް ނަގާއިރު އުމުރުން 18 އަހަރުން ދަށުގެ ކުޑަކުދިންނާއި 65 އަހަރުން މަތީގެ މީހުންނާއި ދިގު މުއްދަތަށް ފަރުވާ ހޯދަން ޖެހޭ ބަލިތަކަށް ފަރުވާ ހޯދާ މީހުން އިސްތިސްނާ ވާނެ އެވެ.

ޕްރައިވެޓް ހޮސްޕިޓަލްތަކުން ހޯދާ ހިދުމަތްތައް ޕެކޭޖުތަކެއް

އާސަންދަ ހިދުމަތް ފޯރުކޮށްދޭ އަމިއްލަ ތަންތަނުން ހިދުމަތް ހޯދާއިރު، އާސަންދަ ސްކީމުން ކަވަރު ކުރަނީ ބިލްގެ ވަކި އަދަދެކެވެ. ބާކީ ބައި އަދާކުރަނީ ހިދުމަތް ހޯދާ މީހުންނެވެ. އާސަންދައިން ކަވަރު ކުރާ އަދަދު ޖުމްލަގޮތެއްގައި އެއްގޮތް ނަމަވެސް އަމިއްލަ ޖީބުން ދައްކަން ޖެހޭ ބައި އެކި ހޮސްޕިޓަލުތަކުގަ އާއި ކްލިނިކްތަކުގައި ތަފާތެވެ.

"އެކި ކަހަލަ މެޑިކަލް ޕްރޮސީޖާތަކަށް ކަނޑއަޅާފައިވާ އަގުގެ އިތުރުން އެކި ކަހަލަ ކޮންސިއުމަބަލް އާއި އެޑްމިޓް ކުރަން ޖެހޭ ހާލަތްތަކުގައި އެކަމުގެ ހަރަދުތަކަށް ބިލު ކުރެ އެވެ،" ފިނޭންސް މިނިސްޓްރީގެ ލިޔުމުގައިވެ އެވެ.

ހޮސްޕިޓަލްތަކުން އާސަންދައިން ކަނޑާ އަދަދުތައް އެއްހަމަ ކުރުމުގެ އިތުރުން އެންސްޕާ މެދުވެރިކޮށް ފޯރުކޮށްދޭ މެޑިކަލް ވެލްފެއާ ނިޒާމަށް ވެސް ބަދަލުތަކެއް ގެންނަން ވަނީ ނިންމައިފަ އެވެ.

އެންސްޕާ މެދުވެރިކޮށް އެންމެ މުއްސަދިންނަށް ހިދުމަތް ދޭ ނަމަ އެކަން ކުރާނީ އިންޓްރެސްޓް ފްރީ ލޯނެއްގެ ގޮތުގަ އެވެ.މަދުން އާމްދަނީ ލިބޭ މީހުންނަށް މިހާރެކޭ އެއްގޮތަށް ހިދުމަތްތައް ލިބޭނެ ކަމަށް ވެސް ފިނޭންސް މިނިސްޓްރީން ބުންޏެވެ.

މިދިޔަ އަހަރު އާސަން އަށް ދައުލަތުން 2.6 ބިލިއަން ރުފިޔާ ހަރަދުކޮށްފައިވެ އެވެ. އާސަންދަ އަށް މި އަހަރު ބަޖެޓް ކޮށްފައި ވަނީ 1.9 ބިލިއަން ރުފިޔާ އެވެ. މިދިޔަ އަހަރުތަކުގައި އާސަންދަ އަށް ކުރާ ހޭދަ އިންތިހާއަށް ބޮޑުވެފައިވާތީ، އެ ނިޒާމު ދެމެހެއްޓެނިވި ނިޒާމަކަށް ބަދަލު ކުރަން މާލީ އިދާރާތަކުން އަންނަނީ ލަފާ ދެމުންނެވެ.