ފުލުހުންނާއި ސިފައިންނަށް ކުރިއެކޭ އެއްގޮތަށް އާސަންދަ ލިބޭނެ

ޕްރައިވެޓް އިންޝުއަރެންސް އޮންނަ މީހުންނަށް އާސަންދަ ދިނުމުގައި ބަދަލުތަކެއް ގެންނަމުން އަޔަސް، ފުލުހުންނާއި ސިފައިން ނުހިމެނޭނެ ކަމަށާއި ކުރިއެކޭ އެއްގޮތަށް އާސަންދަ ސްކީމުގެ ތެރެއިން މިހާރު ވެސް ދެމުން އަންނަ ހިދުމަތްތައް ލިބޭނެ އެ ކުންފުނިން ބުނެފި އެވެ.

އާސަންދަ އިން ބުނީ ނޭޝަނަލް ސޯޝަލް ޕްރޮޓެކްޝަން އެޖެންސީ (އެންސްޕާ)އިން އިރުޝާދު ދީފައިވާ ގޮތަށް، އާސަންދަ ސްކީމް އިސްލާހު ކުރުމުގެ މަސައްކަތް ފަށައި އިއްޔެ ފެށިގެން ބަދަލުތަކެއް ގެނައުމަށް ނިންމާފައިވާ ކަމަށެވެ.

އެ ބަދަލުގެ ދަށުން، އާސަންދަ އިން ހިލޭ ބޭސްފަރުވާ ކޮށްދޭނީ އިތުރު އިންޝުއަރެންސް ސްކީމެއްގައި އެ މީހަކު ބައިވެރިވެފައިވާ ނަމަ އެ އިންޝުއަރެންސަށް ކެނޑުމަށް ފަހު އެވެ. މީގެ ކުރިން ޕްރައިވެޓް އިންޝުއަރެންސް އޮންނަ މީހުންނަށް ވެސް ސަރުކާރުގެ ހިލޭ ބޭސް ފަރުވާ ސްކީމް، އާސަންދަ ދެ އެވެ.

އެ ކުންފުނިން ބުނީ އަމިއްލަ އިންޝުއަރެންސެއްގައި ބައިވެރިވެފައިވީ ނަމަވެސް، ޕޮލިހުންނާއި ސިފައިންނަށް އާސަންދަ ކުރިއެކޭ އެއްގޮތަށް ލިބޭނެ ކަމަށެވެ.

"ޕްރައިވެޓް އިންޝުއަރެންސްގެ ތެރޭގައި މޯލްޑިވްސް ޕޮލިސް ސާވިސް އާއި މޯލްޑިވްސް ޑިފެންސް ފޯސް އިން ހިންގާ ސްކީމްތައް ނުހިމެނޭނެ.." އާސަންދަ ބަޔާނުގައި ބުންޏެވެ.

އާސަންދަ އިން ބުނި ގޮތުގައި އެނދުމަތިކޮށްގެން ދެވޭ ފަރުވާ (އިންޕޭޝަންޓް)ގެ ބިލްތަކަށް މިހާރު ވެސް އަމަލުކުރަމުން އަންނަ އުސޫލުން އާސަންދަ ސްކީމުން ފުލުހުންނާއި ސިފައިންނަށް ހިދުމަތް ދިނުމަށް ވެސްއެ ކުންފުނިން ވާނީ ހިދުމަތް ދޭ ފަރާތްތަކަށް އަންގައިފަ އެވެ.

ޕްރައިވެޓް އިންޝުއަރެންސް ސްކީމުތައް ބޭނުންކުރާ މީހުންނަށް އާސަންދަ ދިނުމުގައި ވަކި އުސޫލެއް އެކުލަވައިލާއިރު، އަމިއްލަ އިންޝުއަރެންސްގެ ކަވަރޭޖް ލިމިޓް ހަމަވެފައިވާ ނަމަ އަދި އާސަންދައިން އެ ހިދުމަތެއް ލިބޭ ނަމަ، އެ ހިދުމަތެއް އާސަންދައިގެ ދަށުން ފޯރުކޮށްދޭން ވަނީ ނިންމައިފަ އެވެ.

އަދި އަމިއްލަ އިންޝުއަރެންސެއް އޮންނަ މީހަކު ހޯދާ ހިދުމަތާ ގުޅޭ ކަވަރޭޖް ލިމިޓް ހުސްނުވާ ނަމަ، ހިދުމަތް ފޯރުކޮށްދިނުމުގައި އާސަންދަ ޕޯޓަލް ބޭނުންކުރުމާއި ބޭސް ސިޓީ ލިޔުމަށް ވިނަވި ޕޯޓަލް ވެސް ދެން ބޭނުމެއް ނުކުރާނެ އެވެ.

ފިނޭންސް މިނިސްޓްރީގެ އެންމެ ފަހުގެ ތަފާސްހިސާބުތައް ދައްކާ ގޮތުން މި އަހަރުގެ ޖެނުއަރީ އިން ޖޫން މަހުގެ ނިޔަލަށް އާސަންދަ ސްކީމަށް ވަނީ 918 މިލިއަން ރުފިޔާ ހޭދަކޮށްފަ އެވެ. މިއީ އަހަރަށް ކަނޑައަޅާފައިވާ ބަޖެޓުގެ ގާތްގަނޑަކަށް 50 ޕަސެންޓެވެ. އާސަންދައަށް ހޭދަކުރަން 1.9 ބިލިއަން ރުފިޔާ ބަޖެޓުގައި ހިމަނާފައިވެ އެވެ.