މޫސުމީ އިންޒާރުގެ މެސެޖް ފޯނަށް ލިބޭނެ ގޮތް ހަދަނީ

މޫސުމީ އަދި ކާރިސާތަކުގެ އިންޒާރު މޮބައިލް ފޯނުތަކަށް ދުރާލާ ލިބޭނެ ގޮތަށް ކެޕޭސިޓީ ފުޅާ ކުރުމަކީ ސަރުކާރުގެ އަމާޒެއް ކަމަށް ރައީސް ޑރ. މުހައްމަދު މުއިއްޒު މިއަދު ވިދާޅުވެއްޖެ އެވެ.

އަޒަރުބައިޖާންގައި މިހާރު ކުރިއަށްދާ ކޮޕް ސަމިޓުގެ މަތީ ފަންތީގެ ބައްދަލުވުމުގައި ވާހަކަފުޅު ދައްކަވަމުން ރައީސް ވިދާޅުވީ ފޯކާސްޓިން ކެޕޭސިޓީ ފުޅާކޮށް، މުޅި ރާއްޖެއަށް ދުރާލާ އިންޒާރުގެ މެސެޖް ލިބޭނެ ގޮތަށް ސިސްޓަމް ފުޅާކުރުމުގެ ވިސްނުން ސަރުކާރުން ގެންގުޅޭ ކަމަށެވެ.

އެ މަނިކުފާނު ވިދާޅުވި ގޮތުގައި ކައުންސިލްތަކާއި ޖަމިއްޔާތަކާ ގުޅިގެން އެ މަސައްކަތް އަންނަނީ ކުރަމުންނެވެ. އެގޮތުން އާންމު އިންޒާރު ދޭ އުސޫލު ހަރުދަނާ ކުރުމާއި، އިމްޕެކްޓް ބޭސްޑް ފޯކާސްޓިން ސިސްޓަމްތައް ހަރުދަނާ ކުރުމަކީ ސަރުކާރުގެ ވަރަށް ބޮޑު އަމާޒެއް ކަމަށް އެމަނިކުފާނު ވިދާޅުވި އެވެ.

މޫސުމީ ދުރާލާ އިންޒާރު ދޭ ނިޒާމުތަކަކީ ކުރެވޭ އިންވެސްޓްމަންޓެއް ކަމަށާއި އެއީ އިގްތިސޯދީ ނަޒަރުން ވެސް މުހިއްމު ކަމެއް ކަމަށެވެ.

މީގެ 20 އަހަރު ކުރިން، އޭޝިޔާ ސަރަހައްދަށް އެރި ސުނާމީގައި ރާއްޖެއިން ވެސް އެތައް ބަޔަކު މަރުވެ، އެތައް ބިލިއަން ރުފިޔާގެ ގެއްލުން ލިބުނު ކަމަށް ރައީސް ވިދާޅުވި އެވެ. އަދި ދުރާލާ އިންޒާރު ލިބޭ ނަމަ އެތައް ފުރާނައެއް ސަލާމަތް ކުރެވޭނެކަން އެ މަނިކުފާނު ފާހަގަ ކުރެއްވި އެވެ.

ސަރުކާރުން އަންނަނީ ރާއްޖޭގެ 20 އަހަރުގެ ތަރައްގީގެ މާސްޓަ ޕްލޭނެއް ހެދުމުގެ މަސައްކަތް ކުރަމުންނެވެ.

ރައީސް ވިދާޅުވީ ކުރިއަށް އޮތް އެއް އަހަރުގެ ތެރޭގައި ނިންމަން ކަނޑައަޅާފައިވާ އެ ޕްލޭންގައި މޫސުމަށް އަންނަ ބަދަލުތަކާއި ކާރިސާތަކަށް ތައްޔާރުވުމުގެ އިތުރުން ދުރާލާ އިންޒާރު ދިނުމާ ގުޅޭ ކަންކަމަށް ހާއްސަ ސަމާލު ކަމެއް ދޭނެ ކަމަށެވެ. އަދި މޫސުމީ ބަދަލުތަކާއި ދުރާލާ އިންޒާރު ދޭ ނިޒާމު ގާއިމް ކުރުމުގައި ރާއްޖެއިން މިހާތަނަށް ކާމިޔާބީތަކެއް ހޯދާފައިވާ ކަމަށް ވެސް ރައީސް ވިދާޅުވި އެވެ.

އޭގެ ތެރޭގައި ކާރިސާތަކުން ލިބޭ ގެއްލުން ރެކޯޑް ކުރާނެ ޑޭޓާ ބޭހެއް ގާއިމް ކުރުމާއި އަވަސް އިޖާބައަށް މަގުފަހި ކުރުމަށްޓަކައި މައުލޫމާތު އެއްކުރުމުގެ ނިޒާމު ޑިޖިޓަލައިޒް ކުރުން ފަދަ ކުރިއެރުންތަކެއް ހިމެނޭ ކަމަށް ވެސް އެމަނިކުފާނު ވިދާޅުވި އެވެ.