ރޯމާ އިން ގޮވާލުމުން ރަނިއޭރީ އަށް ގެޔަކު ނޯވެވުނު

ފުޓްބޯޅައިން ރިޓަޔާކޮށްފައިވާ އިޓަލީގެ ތަޖުރިބާކާރު ކޯޗު ކްލައުޑިއޭ ރަނިއޭރީ އެ ނިންމުން ބަދަލުކޮށް އިޓާލިއަން ލީގުގެ އޭއެސް ރޯމާގެ ކޯޗުކަމާ ހަވާލުވާން ނިންމައިފި އެވެ.

ރަނިއޭރީ އަކީ ރޯމާއާ މި ސީޒަނުގައި ހަވާލުވާ ތިން ވަނަ ކޯޗެވެ. މިދިޔަ ސީޒަނުގައި ރަނގަޅު ނަތީޖާތަކެއް ހޯދައިދިން އެ ޓީމުގެ ކުރީގެ ކެޕްޓަން ޑެނިއަލީ ޑި ރޮސީ މި ސީޒަނުގެ ކުރީކޮޅު ވަކިކުރީ ނަތީޖާތައް ގޯސްވުމުންނެވެ. ދެން ހަވާލުކުރި އިވާން ޔުރިޗް އަށް ވެސް ހާލަތު ބަދަލުނުކުރެވުމުން މިދިޔަ ހަފުތާގައި މަގާމުން ވަކިކުރީ އެވެ.

ރޯމާ އިން މި ފަހަރު ވަރަށް ގިނަ ކޯޗުންނަށް ގުޅި އެވެ. އޭގެ ތެރޭގައި އިޓަލީ ގައުމީ ޓީމުގެ ކުރީގެ ކޯޗު ރޮބާޓޯ މަންޗިނީ އާއި ނަޕޯލީ އާއި ޔުވެންޓަސްގެ ކުރީގެ ކޯޗު މައުރީޒިއޯ ސާރީ ހިމެނެ އެވެ.

އެކަމަކު އެއްވެސް ކޯޗަކާ އެކު އެއްބަސްވުމަކަށް ނާދެވުމުން އުމުރުން 73 އަހަރުގެ ރަނިއޭރީ އަށް އޮފާކުރީ އެވެ. ކުޅުންތެރިއެއްގެ ގޮތުގައި ރޯމާ އިން 1973 ގައި ކެރިއަރު ފެށި ރަނިއޭރީ ވަނީ މީގެ ކުރިން ދެ ފަހަރެއްގެ މަތިން ރޯމާ އަށް ކޯޗުކޮށްދީފަ އެވެ. އޭނާ އަކީ ރޯމަށް އުފަން، އެ ކްލަބުގެ ސަޕޯޓަރެއް ވެސް މެ އެވެ. އެހެންވެ އެ ކްލަބުން އެދުމުން، ރިޓަޔާމަންޓުގައި ހުރެފައި ވެސް ވަޒީފާ ގަބޫލުކުރީ އެވެ.

ރަނިއޭރީ އެންމެ ފަހުން ރޯމާ އަށް ކޯޗުކޮށްދިނީ 2019 ވަނަ އަހަރު ޔުސޭބިއޯ ޑި ފްރެންސެސްކޯ ވަކިކުރުމުންނެވެ. އެ ފަހަރު އޭނާ ވަނީ ޔުރޮޕާ ލީގަށް އެ ޓީމަށް ކޮލިފައިކޮށްދީފަ އެވެ. އެކަމަކު އެ ކްލަބުގެ ސަޕޯޓަރުން އޭނާ ދެކެ ލޯބިވަނީ 2009/2010 ގެ ސީޒަނުގައި ހޯދައިދިން ނަތީޖާ އިންނެވެ. އެ ފަހަރު އޭނާ ވަނީ ހޯސޭ މޮރީނިއޯގެ އިންޓަ މިލާނާ އެކު ލީގު ޗެމްޕިއަންކަމަށް ފަހު ދުވަހާ ހަމަޔަށް ވާދަކޮށްފަ އެވެ.

ކޯޗިން ކެރިއަރު 1986 ވަނަ އަހަރު ފެށި ރަނިއޭރީ ވަނީ ނަޕޯލީ، ފިއޮރެންޓީނާ، ޔުވެންޓަސް، އިންޓަ މިލާން، އެތުލެޓިކޯ މެޑްރިޑް އަދި ޗެލްސީ އަށް ކޯޗުކޮށްދީފަ އެވެ. އެކަމަކު އޭނާގެ އެންމެ ބޮޑު ކާމިޔާބަކީ އިނގިރޭސި އާދައިގެ ޓީމެއް ކަމަށްވާ ލެސްޓާ ސިޓީ އަށް 2016 ވަނަ އަހަރު ޕްރިމިއާ ލީގު ކާމިޔާބުކޮށްދިނުމުންނެވެ.

އިޓާލިއަން ލީގުގެ 12 ވަނައިގައި އޮތް ރޯމާގެ ކޯޗުކަމުގައި ރަނިއޭރީ މި ފަހަރު ފުރަތަމަ ނުކުންނާނީ މި މަހުގެ 24 ވަނަ ދުވަހުގެރޭ، ލީގު އެއް ވަނައިގައި އޮތް ނަޕޯލީއާ ދެކޮޅަށެވެ.