ޔޫކޭއިން ނަތަންޔާހޫ ހައްޔަރުކުރާނެ ކަމަށް ސާފު ޖަވާބެއް ނުދިން

އިންޓަނޭޝަނަލް ކްރިމިނަލް ކޯޓް (އައިސީސީ) ގެ އަމުރުތަކަށް އިނގިރޭސި ވިލާތުން ތަބާވާނެ ކަމަށް ބުނި ނަމަވެސް އިޒްރޭލުގެ ބޮޑުވަޒީރު ބެންޖަމިން ނަތަންޔާހޫ ހައްޔަރުކުރާނެތޯ ކުރި ސުވާލަށް ސީދާ ޖަވާބެއް ދޭން އިނގިރޭސި ވިލާތުން އިންކާރުކޮށްފި އެވެ.

ފަލަސްތީނުގެ ޣައްޒާގައި ހިންގާފައިވާ އަދި ހިންގަމުން ގެންދާ ޖަރީމާތަކުގެ މައްސަލައިގައި ނަތަންޔާހޫ ހައްޔަރުކުރުމަށް އައިސީސީން ބުރާސްފަތި ދުވަހު އަމުރު ނެރުމާ އެކު އެކި ގައުމުތަކުން ވަނީ ނަތަންޔާހޫ އެ ގައުމަކަށް ހިނގައްޖެ ނަމަ އަމުރު ތަންފީޒުކުރާނެ ކަމަށް ބުނެފަ އެވެ. ނަތަންޔާހޫގެ އިތުރުން އޭނާގެ ކުރީގެ ޑިފެންސް މިނިސްޓަރު ޔޯވް ގަލަންޓް އާއި ހަމާސްގެ އަސްކަރީ ގޮފީގެ ވެރިޔާ މުހައްމަދު ޟައީފް ހައްޔަރުކުރުމަށް ވެސް ވަނީ އަމުރު ނެރެފަ އެވެ.

އިނގިރޭސި ވިލާތަށް ނަތަންޔާހޫ ހިނގައްޖެ ނަމަ އިފުލުހުން އޭނާ ހައްޔަރުކުރާނެތޯ ސުވާލުކުރުމުން ބޮޑުވަޒީރު ކިއާ ސްޓާމާގެ ތަރުޖަމާނު ވިދާޅުވީ ވަކިވަކި މައްސަލަތަކާ މެދު ކުރިމަގުގައި ވެދާނެ ގޮތަކާ މެދު ވާހަކަ ދައްކައި އެ ކަންކަމުގެ ތެރެއަށް ނުވަންނާނެ ކަމަށެވެ.

ނަމަވެސް އިނގިރޭސިވިލާތުން އަބަދުވެސް އެ "ގައުމުގެ ގާނޫނުތައް އަދި ހަމަ އެގޮތަށް ބައިނަލްއަގްވާމީ ގާނޫނުތަކުން ކަނޑައަޅާފައިވާ ގާނޫނީ މަސްއޫލިއްޔަތު އަދާކުރާނެ" ކަމަށް ވިދާޅުވި އެވެ.

އައިސީސީ އުފެއްދި ބައިނަލްއަގްވާމީ މުއާހަދާ ކަމަށްވާ ރޯމް ސްޓެޓިއުޓްގައި އިނގިރޭސިވިލާތުން 1998 ވަނަ އަހަރު ސޮއިކުރުމަށް ފަހު އޭގެ ތިން އަހަރު ފަހުން އެ މުއާހަދާ ތަސްދީގު ކުރި އެވެ.

އިނގިރޭސިވިލާތުގެ "އައިސީސީގެ ގާނޫނު 2001" ގައި ބުނެފައި ވަނީ ދައުވާ ލިބޭ މީހަކު ހައްޔަރު ކުރުމަށް އައިސީސީން އެދި ސަރުކާރުގެ ވަޒީރަކަށް ހުށަހެޅުމުން، ކަމާ ގުޅޭ ލިޔެކިޔުންތަކާ އެކު އެ ހުށަހެޅުން، އެކަމާ ގުޅޭ ކޯޓަކަށް ފޮނުވަންޖެހޭނެ ކަމަށެވެ.

"އެއީ ހައްޔަރުކުރުމުގެ އަމުރަކާ އެކު އައި ހުށަހެޅުމެއް ނަމަ އަދި އެ އަމުރަކީ އައިސީސީން ނެރެފައިވާ އަމުރެއް ކަމަށް ގަބޫލުކުރެވޭ ނަމަ އެ އަމުރު އިނގިރޭސި ވިލާތުގައި ތަންފީޒުކުރުމުގެ އަމުރެއް ނެރެންވާނެ" ކަމަށް ވެސް އެ ގާނޫނުގައި އޮވެ އެވެ.

އޮފިޝަލުން ވިދާޅުވާ ގޮތުގައި، އައިސީސީން އެފަދަ އަމުރެއް އޮތް މީހަކު މިހާތަނަށް އިނގިރޭސި ވިލާތަށް ގޮސްފައި ނުވާތީ އެ ގައުމުގައި އަދި ދުވަހަކު ވެސް މި ގާނޫނަށް އަމަލުކޮށްފައެއް ނުވެ އެވެ.

މިފަދަ މައްސަލަތަކުގައި އިނގިރޭސި ވިލާތުގެ ކޯޓު މަރުހަލާ ފެށެނީ އައިސީސީން ހައްޔަރު އަމުރު ނެރުމާ އެކު ކަމެއް ނުވަތަ ދައުވާ އުފުލާފައިވާ މީހާ އިނގިރޭސި ފަސްގަނޑަށް އެރުމާ އެކު ކަމެއް ސާފެއް ނުވެ އެވެ.

"ހަމަ ޔަގީން. އެ ގާނޫނުގެ ދަށުން އަދާކުރަންޖެހޭ މަސްއޫލިއްޔަތު އަދާކުރާނެ،" ބޮޑުވަޒީރުގެ ތަރުޖަމާނު ވިދާޅުވި އެވެ. -- އޭއެފްޕީ