އެފްރިކާގެ މޮޅު ކުޅުންތެރިޔާގެ އެވޯޑް ލުކްމަން އަށް

އެފްރިކާގެ މި އަހަރުގެ އެންމެ މޮޅު ފުޓްބޯޅަ ކުޅުންތެރިޔާގެ މަގާމް އިޓަލީގެ އެޓަލާންޓާގެ ނައިޖީރިއާ ފޯވާޑް އަޑެމޯލާ ލުކްމަން ހޯދައިފި އެވެ.

ލުކްމަން ވަނީ މި އަހަރު ކްލަބާއި ގައުމީ ޓީމުގައި އެއް ފެންވަރެއްގައި މޮޅު ކުޅުމެއް ދައްކައިފަ އެވެ. މި އަހަރުގެ އެފްރިކަން ކަޕް އޮފް ނޭޝަންސްގެ ފައިނަލަށް ނައިޖީރިއާ ދަތުރުކުރީ އޭނާ ޖެހި ތިން ގޯލުގެ އެހީއާ އެކު އެވެ. އެކަމަކު ފައިނަލުން އައިވަރީ ކޯސްޓް އަތުން ބަލިވީ އެވެ.

އޭނާގެ އެންމެ ބޮޑު ކާމިޔާބަކީ އެޓަލާންޓާ އަށް ޔުރޮޕާ ލީގު ކާމިޔާބުކޮށްދިނުމެވެ. މުޅި ސީޒަނުގައި މެޗަކުން ބަލިނުވެ އޮތް ޖަރުމަނުގެ ބެޔާ ލެވަކޫސަން އަތުން 3-0 އިން އެޓަލާންޓާ މޮޅުވި މެޗުގައި ތިން ގޯލް ވެސް ޖެހީ ލުކްމަން އެވެ.

"މިއީ އަހަންނަށް ލިބުނު އާދަޔާހިލާފު ކާމިޔާބެއް،" ލުކްމަން ބުންޏެވެ. "އަހަރެން އެފްރިކާގެ ޒުވާނުންނަށް ބުނެލަން ބޭނުންވަނީ އުއްމީދު ދޫކޮށްނުލާށޭ."

މި އެވޯޑަށް ވާދަކުރި ކުޅުންތެރިންގެ ތެރޭގައި ސައުތު އެފްރިކާ ލީގުގައި ކުޅޭ އެ ގައުމުގެ ގޯލްކީޕަރު ރޮންވެން ވިލިއަމްސް އާއި ފްރާންސްގެ ޕީއެސްޖީ އަށް ކުޅޭ މޮރޮކޯގެ ފުލްބެކް އަޝްރަފް ހަކީމީ އާއި ޖަރުމަނުގެ ބޮރޫޝިއާ ޑޯޓްމަންޑަށް ކުޅޭ ސެރްހޫ ގުއިރާސީ ހިމެނެ އެވެ.

މި އެވޯޑް މިދިޔަ އަހަރު ހޯދި ނައިޖީރިއާގެ ވިކްޓަ އޮސިމްހެން އަށް އަނިޔާގެ ސަބަބުން ގިނަ މެޗުތަކެއް ގެއްލިފައިވާތީ އެވޯޑަށް ވާދައެއް ނުކުރެ އެވެ. ނައިޖީރިއާގެ ކުޅުންތެރިން މި އެވޯޑް މި ޑޮމިނޭޓްކުރީ އަހަރުތަކަށް ފަހު އެވެ. އޮސިމްހެންގެ ކުރިން ނައިޖީރިއާ ކުޅުންތެރިއެއް މި އެވޯޑް އެންމެ ފަހުން ހޯދީ 1999 ގައި، އެންވަންކޫ ކާނޫ އެވެ.

މި ފަހަރު އެވޯޑް ކާމިޔާބުކުރި ލުކްމަން އަކީ އިނގިރޭސި ވިލާތަށް އުފަންވި ކުޅުންތެރިއެކެވެ. އޭނާ ވަނީ ނައިޖީރިއާ ގައުމީ ޓީމަށް 2022 ގައި ކުޅެން ފެށުމުގެ ކުރިން އިންގްލެންޑުގެ ޔޫތު ގައުމީ ޓީމަށް ކުޅެފަ އެވެ. އޭނާ ކްލަބް ކެރިއަރު ފެށީ ވެސް އިންގްލެންޑުގެ ޗާލްޓަން އެތުލެޓިކް އިންނެވެ. އޭގެ އިންގްލެންޑުގެ އެވަޓަން އާއި، ފުލަމް، އަދި ލެސްޓާ ސިޓީ އަށް ވެސް ކުޅުނެވެ.